Israel nacion librasqa kananmanta
27
Chay punchawmi culebrata
Tayta Dios castiganqa.
Manchakuypaq espadawanmi payqa castiganqa.
Leviatanwan sutichasqa arwirikuq culebratam castiganqa.
Hatun espadawanmi castiganqa chay culebrataqa.
Leviatanwan sutichasqa millqoykachakuq culebratam castiganqa.
Lamar qochapi manchakuypaq animaltam
atiyniyoq espadanwan castiganqa.
2 Chay punchawmi Tayta Dios ninqa kaynata:
“Takiychik miskillaña vino qokuq uvas huertamanta.
3 Ñoqa Tayta Diosmi chay huertata waqaychani.
Sapa kutillam ñoqaqa chayta parqopayani.
Mana imapas pasananpaqmi chayta waqaychani.
4 Chay huertaypaqqa manam piñakunichu ñoqaqa.
Kichkakuna otaq cardokuna huertaypi kaptinqa
guerrapi peleaq hina rispaymi kañaykamuyman.
Rispaymi pasaypaqta chaykunata kañaykamuyman.
5 Sichu chay huerta defiendenayta munaspaqa
ñoqawan amistachun.
Sichu chay huerta defiendenayta munaspaqa,
arí,
ñoqawan amistachun.”
6 Hamuq tiempopim Jacobpa castan sacha hina sapichakunqa.
Israel castam sacha hina iklliruspan sisarunqa.
Sacha hinam rurunkunawan kay pachata huntarachinqa.
7 Israel castakunataqa manam Tayta Diosqa castigarqachu.
Paykuna ñakarichiqkunata castigasqanta hinaqa
manam paykunataqa castigarqachu.
Israel castakunataqa manam Tayta Diosqa wañuchirqachu.
Paykuna wañuchiqkunata wañuchisqata hinaqa
manam paykunataqa wañuchirqachu.
8 Merecesqanta hinallam Tayta Diosqa
Israel castata castigarqa.
Huklaw nacionman presochasqata pusachispam
paykunataqa castigarqa.
Manchakuypaq wayrawan hinaraqmi
paykunataqa aparurqa.
Intipa qespimunanmanta pukumuq
wayrawan hinaraqmi aparurqa.
9 Chaywanpas Jacob castakunapa mana allin rurasqankunataqa
pampachanqam kayrayku.
Chaywanpas Jacob castakunapa huchankunaqa
qonqasqam kanqa kayrayku.
Isku rumita hina altarkunapa ruminkunata
ñutupaptinkuqa pampachanqam.
Asera sutiyoq mamachankuta
pampaman wikapaptinkuqa pampachanqam.
Taytachankunaman kañananku altarkunata
wikapaptinkuqa pampachanqam.
10 Mana yaykuy atina llaqtam kunanqa chunnichkan.
Manaña runayoq wasi hinam kunanqa chunnichkan.
Chayqa kachkan chunniq sitio hina saqesqañam.
Chayqa kachkan animal michinanku sitioñam.
Chayqa kachkan sachakunapa rapinta mikuspa animalpa puñunan sitioñam.
11 Sachapa kallman chakiruptinmi pakiparunku.
Warmikunam chaykunata huñuruspanku ninata ratachikunku.
Mana entiendeq runakunam kay runakunaqa.
Unanchaqninkupas manam llakipayanqachu paykunataqa.
Ruraqninkupas manam kuyapayanqachu paykunataqa.
12 Erapi gamillakunata trillachkaq hinam
Tayta Dios chay tiempopi castiganqa.
Eufrates achka yakuyoq mayumantam
Egipto law wayqokama castiganqa.
Israelpa mirayninkuna,
qamkunatam ichaqa huñusunkichik.
Qamkunatam chulla-chullallamanta payqa huñusunkichik.
13 Chay tiempopim hatunnin cornetata tocanqaku.
Asiria nacionpi chinkaruqkunam kutimunqaku.
Egipto nacionman presochasqa pusasqakunam kutimunqaku.
Hamunqakum Jerusalen llaqtapi Tayta Diosta adoranankupaq.
Hamunqakum sapaqchasqan Sion Moqopi Tayta Diosta adoranankupaq.