Juda nacionpa vencesqanmanta taki
26
Chay tiempopim Juda nacionpi takinqaku kayna niq takita:
Mana yaykuy atina llaqtam kapuwachkanchik.
Salvakunanchikpaq llaqtam kapuwachkanchik.
Murallakunatam Tayta Dios hatarirachin salvaykuwananchikpaq.
Amparakuna murallakunatam hatarirachin salvaykuwananchikpaq.
2 Allinkuna ruraq nacion yaykunanpaqyá
zaguanninkunata kichaychik.
Confianapaq hina nacion yaykunanpaqyá
zaguanninkunata kichaychik.
3 Dios Taytalláy,
mana iskayrayaspa piensaq runatam
hawkallata waqaychanki.
Qamllapi hapipakuq runatam
hawkallata waqaychanki.
4 Tayta Diosllapiyá wiña-wiñaypaq hapipakuychik.
Amparakuna qaqa hina kasqanrayku Tayta Diospi hapipakuychik.
5 Paymi humillachin alto-altopi yachaq runakunata.
Paymi humillachin alto tukuq llaqtakunata.
Pampakamaraqmi tuñirachin chay llaqtakunataqa.
Polvokamaraqmi tuñirachin chay llaqtakunata.
6 Chaynapim ñakarichisqa runakuna sarutyanqa.
Chaynapim mana imayoq runakuna sarutyanqa.
7 Pampalla ñan hinam allin ruraqkunapa vidanqa.
Qam allin ruraq Diosmi pampallata ruranki chay ñannintaqa.
8 Dios Taytalláy,
ñoqaykupas leynikiman hina kawsaspaykum
qamllapi hapipakuniku.
Sonqoykupim qamllamanta yuyarispa
yuyaymanayta munaniku.
9 Tutam piensani qamllamanta.
Qamllatam maskayki tukuy sonqoymanta.
Allinta arreglaspa gobiernaptikiqa
allinkuna ruraytam yachanqaku kay pachapi yachaqkunaqa.
10 Mana allin ruraq runakunata llakipayaptikipas
paykunaqa manam yachanqakuchu allin ruraytapas.
Honrado runakunapa nacionninpipas
hina mana allin runakunallam kanqakupas.
Manam cuentata qokunkuchu
ancha atiyniyoq kasqaykimantapas.
11 Dios Taytalláy,
castiganaykipaqmi
chaylla kachkanki qamqa.
Ichaqa manam cuentata qokunkuchu paykunaqa.
Runaykikunamanta ancha sienteq kasqaykitayá qawachunku.
Chay sientesqaykimantayá paykunaqa penqaypi kachunku.
Contraykipi kaqkunapas ninawan kañasqayá kachunku.
12 Dios Taytalláy,
qamllam hawkallataqa kawsachiwankikupas.
Qamllam rurarqanki tukuy rurasqaykutapas.
13 Yupaychasqayku Dios Taytalláy,
munayniyoq runakunam karqa patronniyku.
Ichaqa qamllatam Señorniykupaq yuyarikiku.
14 Wañurunkuñam paykunaqa.
Manañam kawsarimunqakuchu.
Almakunallam paykunaqa.
Manañam hatarimunqakuchu.
Castigaspaykim paykunata wañuchirqanki.
Paykunamanta manaña yuyarinankupaqmi qonqarachinki.
15 Dios Taytalláy,
nacionpi runakunatam mirachiwarqankiku.
Qam alabasqa kanaykipaqmi ñoqaykuta mirachiwarqankiku.
Allpaykupa lliw linderonkunatam hatunyachipuwarqankiku.
16 Dios Taytalláy,
llakikuypi kaspaykum maskarqaykiku.
Qasillallamantam mañakuykiku castigawaptikiku.
17 Dios Taytalláy,
wiksayoq warmi hinam qayllaykipi karqaniku.
Wachakuq warmi hinaraqmi nanaywan qewikacharqaniku.
Ñoqaykupas chay warmi hinam qayllaykipi qaparkachaniku.
18 Wiksayakuruq warmi hinam ñoqaykupas nanaywan karqaniku.
Ichaqa wayrallata wachakuchkaq hinam apamurqaniku.
Kay pachapi runakunamanqa
manam apamurqaniku salvaciontachu.
Kay pachapi yachanankupaqpas
manataqmi nacenqakuchu.
19 Dios Taytalláy,
wañuqnikikunam kawsarimunqa.
Llaqtamasiykunapa ayankunam hatarimunqa.
Allpapa ukunpi kaqkuna qaparimuychik.
Hatarimuspa kusikuyllawanña qaparimuychik.
Dios Taytalláy,
qampa sullaykim achikyaq sulla hina.
Wañuqkunam allpamanta hatarimunqa nacemuchkaq hina.
20 Runamasillaykuna,
rispaykichikyá cuartoykichikman yaykuychik.
Punkuykichikta wichqakamuspayá chaypi pakakamuychik.
Tayta Diospa piñakuynin pasarunankamayá ratollapas pakakamuychik.
21 Tayta Diosqa maypim kasqanmantam lloqsimunqa.
Kay pachapi yachaqkunata castigananpaqmi hamunqa.
Mana allin rurasqankumanta castigananpaqmi hamunqa.
Kay allpaqa qawachinqam wañuchisqakunapa yawarninta.
Kay allpaqa manañam pakanqachu wañuchisqakunata.