Diosta alabanapaq taki
25
Dios Taytalláy,
qamqa Diosniymi kanki.
Qamtam hatunchayki.
Qanmanmi graciasta qoyki.
Admirakuypaq tanteasqaykitam rurarqanki.
Ñawpaq tiempokunamantaraq tanteasqaykikunatam rurarqanki.
2 Rumikunapas montorayanankamam tuñichirqanki llaqtakunata.
Purmarachirqankim murallasqa llaqtakunata.
Huklaw nacionniyoqkunapa palacionkunatam tuñirachirqanki.
Haykappas manaña mosoqmanta hatarichinankukamam tuñirachirqanki.
3 Chayraykum yupaychasunki
mana vencey atina runakuna.
Chayraykum manchakusunki
llaqtakunapi mana llakipayakuq runakuna.
4 Qammi karqanki mana imayoqkunapa amparakunan.
Qammi karqanki wakchakunapa sasachakuyninpi amparakunan.
Qammi karqanki loco paramanta harkaqnin.
Qammi karqanki rupaymanta llantuykuqnin.
Mana llakipayakuq runakunapa samatyayninqa
perqapa contranpi nisyumanta chayaq paramanmi rikchakun.
5 Mana llakipayakuq runakunapa samatyayninqa
chunniq allpapi rupaymanmi rikchakun.
Qamqa huklaw nacionmanta hoqarikuq runakunatam
humillachinki.
Puyupa llantuynin rupayta menosyachichkaq hinam
paykunata humillachinki.
Alabakuspa llakipayakuq runakunapa takinkunatam
upallachinki.
6 Llapallan Kamachiq Tayta Diosqa
Sion Moqopim ruranqa.
Llapallan nacionkunapaqmi
hatun convidota ruranqa.
Miskillaña mikuykunatawan
unay watayoq vinotam convidanqa.
Miskillaña mikuykunatawan
suma-sumaq vinotam convidanqa.
7 Kay Sion Moqopim Tayta Diosqa
llapallan ayakunapa habitonta chinkachinqa.
Kay Sion Moqopim Tayta Diosqa
llapallan nacionkunapi ayakuna tapaq telata chinkachinqa.
8 Tayta Diosmi wiñaypaq chinkachinqa wañuyta.
Señor Diosmi pichanqa llapallan waqaqkunapa weqenta.
Paymi horqonqa runankunapa kay pachapi penqaypi kasqanta.
Chaynatam nirqa Tayta Dios.
9 Chay punchawpim ninqaku:
Paymi Diosninchik,
payllapi confiakusqanchikraykum
salvawanchik,
nispa.
Paymi Tayta Dios,
payllapi confiakuptinchik
salvawasqanchikraykum anchata kusikunchik,
nispa.
10 Tayta Diospa atiyninmi
kay Sion Moqopi kanqa.
Qopa patapi nuyusqa pajata sarupachkaq hinam
Moab nacionta sarupanqa.
11 Moab castakunaqa nadeaq runa hinaraqmi haywaykachanqapas.
Allin nadeaq runa hina kachkaptinpas
Moab nacionpa orgulloso kaynintam humillachinqa.
12 Tayta Diosmi alto-alto murallankunata tuñichinqa.
Mana yaykuy atina murallankunatam tuñichinqa.
Murallankunatam pampapi polvokama wichirachinqa.