Kay pachata Tayta Dios castigananmanta
24
Qawaychik,
Tayta Diosmi purmachinqa kay pachata.
Qawaychik,
Tayta Diosmi chunnichinqa kay pachata.
Kay pachapa hawanta tikraruspanmi cheqechinqa chaypi yachaqkunata.
2 Runakunatawan sacerdotekunatam cheqerachinqa.
Sirviententawan patronnintam cheqerachinqa.
Sirvientantawan patronantam chaynallata rurarunqa.
Rantiqnintawan rantikuqtam rurarunqa chaynallata.
Cheqechinqam prestakuqnintawan prestaqninta.
3 Tayta Diosmi nin:
Kay allpam kanqa pasaypaq chunnichisqa.
Kay allpam kanqa pasaypaq saqueasqa.
4 Kay allpam chakiruspan hukmanyarun.
Enteron kay pacham pasaypaqta chakiruspa hukmanyarun.
Kay pachapi allin reqsisqa runakunam chakichisqa planta hina lliw hukmanyarun.
5 Kay pachatam runakuna millakuypaqta rurarunku.
Diospa yachachikuyninkunata mana kasukuspam
kay pachata millakuypaqta rurarunku.
Paypa decretonta mana kasukuspam
kay pachata millakuypaqta rurarunku.
Diospa wiñaypaq contratonta yanqacharuspam
kay pachata millakuypaqta rurarunku.
6 Chayraykum kay allpa pasaypaq ñakasqa kachkan.
Kay pachapi yachaqkunam castigonwan ñakarichkan.
Chayraykum kay pachapi yachaqkuna kañasqa kachkanku.
Chayraykum kay pachapi runakuna pisillaña kachkanku.
7 Vinom pisirun.
Uvas plantakunam qawirun.
Kusikuyllapi kawsaqkunam llakisqa rikurirun.
8 Tinyawan kusikuyninkuqa upallarunmi.
Fiestakunawan bulla rurayninkuqa upallarunmi.
Arpakunapa miskillaña waqayninqa upallarunmi.
9 Takillawaña vino tomayninkum tanirun.
Poqosqa aqam tomaqkunapaq lliw qatqeyarun.
10 Manaña imayoq llaqtam chunnichkan.
Mayqan wasipas manaña yaykunapaq hinam kachkan.
11 Vino tukuruptinmi callekunapi runakuna waqachkanku.
Tanirunmi lliw kusikuyninku.
Chinkarunñam kay pachapi kusikuyninku.
12 Purmasqatañam saqerun llaqtataqa.
Ñutupasqañam kachkan zaguanninkunaqa.
13 Enteron kay pacha nacionkunapim chayna kanqa.
Waqtaspa olivos sachapi puchuq aceitunas hinam kanqa.
Uvas cosecha tukuruptin maskapasqa uvas hinam kanqa.
14 Wañunankumanta puchuqkunam kusikuspa qayakunqaku.
Tayta Diospa atiyninta qawaspankum qaparinqaku.
Intipa seqaykunan lawmantam payta alabanqaku.
15 Intipa qespimunan lawpi kaqkunam Tayta Diosta alabanqaku.
Lamar qochapa patanpi kaqkunam payta alabanqaku.
Israelpa yupaychasqan Tayta Diostam alabanqaku.
16 Kay pachapa cantonmantaraqmi uyarirqaniku:
Alabaychik allinkuna ruraqta,
niqkunatam uyarirqaniku.
Kikiymi nikurqani:
¡Ay,
eqoyachkanim!
¡Ay,
eqoyachkanim!
Kikiymi nikurqani:
Traicionerom traicionan,
nispa.
Traicionerom pasaypaqta traicionan,
nispa.
17 Kay pachapi yachaqkuna,
animal hinam
kachkankichik qamkunaqa.
Animalkuna hapiqkunapa mancharichisqan hinam
kachkankichik qamkunaqa.
Uchkuman wichiykuq otaq toqllapa hapirusqan hinam
kachkankichik qamkunaqa.
18 Animalkuna hapiqkunapa vozninta
mancharikuspa lluptiqmi
uchkuman wichiykunqa.
Uchkumanta seqamuspa lluptiqmi
toqllawan hapirachikunqa.
Cielokunapi yakukunam taqtakaykamunqa.
Kay pachapa cimientonkunam katkatatanqa.
19 Kay pacham pasaypaqta pakipakurunqa.
Kay pacham pasaypaqta chitqakurunqa.
Kay pacham pasaypaqta katkatatarunqa.
20 Kay pacham sinka runa hina pasaypaqta tamsakachanqa.
Mana allin rurasqa chuklla wasi hinam aywikachanqa.
Mana kasukuq kasqan llasaruptinmi urmachkaq hina wichiykunqa.
Manaña masta hatarinankamam wichiykunqa.
21 Chay punchawmi cielokunapi mana allin tropakunata castiganqa.
Chay punchawmi kay pachapi reykunata castiganqa.
22 Paykunatam lliwta huñurunqa.
Uchkupim paykunata presocharunqa.
Carcelpim paykunata wichqarunqa.
Unay tiempomantañam paykunata castiganqa.
23 Llapallan Kamachiq Tayta Dios Sion Moqopi gobiernaptinqa,
llapallan Kamachiq Tayta Dios Jerusalen llaqtapi gobiernaptinqa
killam penqachisqa warmi hina pukayarunqa.
Intim penqachisqa runa hina tutayarunqa.
Paypa ancianonkunam qawanqaku.
Tayta Diospa kanchariynintam qawanqaku.