Tiro llaqtapa hinaspa Sidon llaqtapa contranpi willakuymanta
23
Tiro llaqtapa contranpi rimaspanmi Isaias nirqa:
Tarsis lawmanta buquekunapi kaqkuna qapariychik.
Manaña wasiyoq Tiro llaqtapi kaqkuna qapariychik.
Soqoskuna sayachinanku llaqtatam tuñirachinku.
Chipre lawmanta hamuqkunamanmi chaymanta willarunku.
2 Costa law Tiro llaqtayoqkuna,
upallaychikña.
Sidon llaqtapi negociantekuna,
upallaychikña.
Lamar qochanta paykuna apachiptin riqkuna,
upallaychikña.
3 Buquepi chimpaspam nana-nanaq yakupa hawanta riqku.
Sihor lawmanta kawsaykunawanmi ganakuqku.
Nilo Mayupa patanpi cosechakunatam apamuqku.
Nacionkunamanmi paykunaqa rantikuqku.
4 Penqarikuy,
lamar qochapa patanpi Sidon llaqta.
Penqarikuy,
lamar qochapa patanpi amparakuna llaqta.
Lamar qocham ninqa:
Manañam wachakuqpa nanayninwan ñakarinichu.
Manañam wawakunata hina wachakunichu.
Manañam qari churiykuna kanñachu uywanaypaq.
Manañam warmi churiykuna kanñachu wiñachinaypaq.
5 Egipto nacionpi runakunam noticiata uyarinqaku.
Tiro llaqtata imam sucedesqantam uyarinqaku.
Chay noticiawanmi paykuna ñakarinqaku.
6 Tarsis lawman qamkuna ripukuychik.
Lamar qochapa patanpi yachaqkuna,
qapariychik.
7 ¿Kay Tiro llaqtachum fiestakunallapi kakuq llaqta?
¿Kay Tiro llaqtachum ñawpaq tiempomantaraq kakuq llaqta?
¿Kay llaqtachum karu nacionkunapi kananpaq runakuna kachaq llaqta?
8 ¿Pitaq kay castigota decretarqa
Tiro llaqtapa contranpi?
¿Pitaq kay castigota decretarqa
reykunapa kanan llaqtapa contranpi?
Negociowan puriqkunam munaychakuqkuna karqaku.
Negociantekunam kay pachapi ancha reqsisqa karqaku.
9 Llapallan Kamachiq Tayta Diosmi chaynata decretarqa.
Llapallan orgulloso runakunata
humillananpaqmi decretarqa.
Kay pachapi llapallan ancha reqsisqa runakunata
mana kaqman churananpaqmi decretarqa.
10 Tarsis lawpi runakuna,
chakrapiñayá llamkaychik qamkunaqa.
Manañam kanñachu buquekuna sayachinanku llaqtaqa.
11 Lamar qochapa hawanmanmi Tayta Dios makinta haywarirqa.
Nacionkunatam Tayta Dios katkatatachirqa.
Canaan law nacionkunapi llaqtakunata tuñichinanpaqmi kamachirqa.
Mana yaykuy atina llaqtakunata tuñichinanpaqmi kamachirqa.
12 Sidon llaqtatam nirqa:
Ñakarichisqa sipas hina sumaq Sidon llaqta,
dejayña fiestakunallapi kakuyta.
Chipre lawman ripuspaykipas
manam hawkaqa kankichu waklawpipas.
13 Qawariychik Caldea law nacionta,
manaña cuentaman churana nacionta.
Purun animalkuna yachananpaqñam Asiria nacion churarun.
Atacanankupaqmi paykunaqa torrekunata churarun.
Palacionkunata taqmaruspam purmachisqata dejarun.
14 Tarsis lawmanta buquepi runakuna,
qapariychik.
Purmachispa saqesqam kanqa amparakuna sitioykichik.
15 Chay tiempopim Tiro llaqtaqa qonqasqa kanqa qanchis chunka watakama otaq reypa kawsanan watakunata hina.
Qanchis chunka wata pasaruptinñam Tiro llaqtata sucedenqa chuchumika warmimanta kayna takisqankuman hina:
16 Yaw qonqasqa chuchumika warmi,
arpaykita hapiy.
Enteron llaqta ukupi allinta tocaspa muyurimuy.
Qanmanta yuyarinankupaq
achka takikunata takimuy.
17 Qanchis chunka wata pasaruptinmi Tiro llaqtata Tayta Dios castiganqa.
Kaqllamantam chuchumikayarunqa,
kaqllamantataqmi runakunaman alquilakunqa,
huchallikunqataqmi kaqllamanta kay pachapi gobiernokunawan.
18 Aswanqa negociaspa ganakusqankunaqa Tayta Diospaq sapaqchasqam kanqa.
Manañam huñuspankuqa waqaychanqakuchu aswanqa Tayta Dios serviqkunamanñam qonqaku achka mikuyta rantinankupaq chaynataq fino pachankunatapas rantinankupaq.