Jerusalen llaqtamanta
22
Revelacion Qawana Qechwamantam Isaias nirqa:
¿imataq qamkunata pasarusunkichik?
¿Imanasqataq wasipa qatanman seqarunkichik?
2 Bullakunawan huntasqa llaqta,
fiestakunapi bullakunawan huntasqa llaqta
Wañuqnikikunaqa manam espadawanchu wañurqaku.
Paykunaqa manam guerrapichu wañurqaku.
3 Kamachikuqnikikunam llapallan lluptirunku.
Mana flechasqa kachkaspallam presochasqa karunku.
Ukuykipi kaq runakunam kuska presochasqa karunku.
Enemigo karupi kachkaptinraqmi lluptirunku.
4 Chaymi nirqaykichik kaynata:
Amayá qawawaychikchu ñoqata.
Waqaytam munani ancha llakimanta.
Waqaptiyqa ama consuelawaychikchu ñoqata.
5 Llapallan Kamachiq Señor Diosmi decretarqa.
Chaqwasqa kanan punchaw hamunanpaqmi decretarqa.
Revelacion Qawana Qechwapi
munaychakunanpaqmi decretarqa.
Revelacion Qawana Qechwapi
muspaypi hina kanankupaqmi decretarqa.
Llaqtapa murallankunatam tuñichichkanku.
Orqokunapipas uyarikunankamam qaparichkanku.
6 Elam tropakunam flecha apanankuta alistarunkuña.
Manejaqkunam carretankuman seqarunkuña.
Soldadokunam caballonkuman sillakurunkuña.
Kir lawmanta tropakunam harkachikuna armankuta horqorunkuña.
7 Jerusalen llaqta,
sumaqllaña qechwaykikunapi
carretakunam huntallaña kachkanku.
Sillasqa tropakunam llaqtapa zaguanninkunata
atacanankupaq churakurunku.
8 Juda nacionpa harkachikunantam horqorunku.
Chay punchawmi qamkuna qawarqankichik Monte Palaciowan sutichasqa wasipi armakunata.
9 Qawarqankichiktaqmi “Rey Davidpa Llaqtan” sutiyoq barriopi murallakuna raqrallaña kasqantapas,
qocharachirqankichiktaqmi yakutapas uray law estanquepi.
10 Jerusalen llaqtapi wasikunatapas yupaspam wakinta tuñichirqankichik chaykunawan murallakunatapas allichanaykichikpaq.
11 Rurarqankichiktaqmi estanqueta iskay murallakunapa chawpinpi,
chaytaqa rurarqankichik ñawpaq estanquemanta hamuq yaku qochananpaqmi.
Ichaqa manam rikurqankichikchu tukuy chaykuna unanchaq Diosta nitaqmi qawarqankichikchu ñawpaqmanta ruraq Diostapas.
12 Chay punchawmi Llapallan Kamachiq Señor Dios qayasurqankichik.
Waqaspa qaparkachanaykichikpaqmi qayakurqankichik.
Umaykichikta rutuchikunaykichikpaqmi qayasurqankichikqa.
Luto pachawan pachakunaykichikpaqmi qayasurqankichikqa.
13 Kusikuyllawanñam rurarqankichik fiestakunata.
Nakarqankichikmi bueyeskunatawan carnerokunata.
Aychata mikuspam vino tomakuyllapi kankichik.
Mikukusun,
tomakusun,
paqarinmi wañukusun,
nispam ninkichik.
14 Llapallan kamachiq Señor Diosmi ñoqaman rikuriykuwarqa
hinaspam rinrillaypi kaynata niykuwarqa:
Kay mana allin rurasqaykichiktaqa
manam pampachasaqchu,
nispa.
Manaraq chayta rurachkaptiymi
qamkuna wañunkichik,
nispa.
Chaynatam llapallan kamachiq ñoqa Señor Dios nini.
Palaciopi mayordomo Sebna wañunanmanta
15 Palaciopi kaq Sebna sutiyoq mayordomoman yaykuspay ninaypaqmi Llapallan Kamachiq Señor Dios kaynata niwarqa:
16 Kaypiqa ¿imatataq rurachkanki?
¿Pitaq kaytaqa kamachisurqanki?
Sepulturata kaypi ruranaykipaqqa ¿pitaq kamachisurqanki?
Kay moqopi sepulturata uchkunaykipaqqa ¿pitaq nisurqanki?
Kay qaqa uchkupi waqtapanaykipaqqa ¿pitaq nisurqanki?
17 Imatapas wischuchkaq hinaraqmi wischurusunki.
Tayta Diosqa kallpasapa runa hinaraqmi wischurusunki.
Hapiykuspam kallpasapa runakunaraq wischurusunki.
18 Maytuykuspam pelotata hina wischurusunki.
Hatun nacionmanmi wischurusunki.
Chay hatun nacionpim wañunki.
Alabakunayki carretakunam chaypi sayarunqa.
Patronnikipa castanpaqmi hatun penqay kanki qamqa.
19 Puestoykimantam ñoqa qarqorusqayki.
Oficioykimantam patronniki wischurusunki.
20 Chay punchawmi serviqniyta qayamusaq.
Hilciaspa churin serviqniy Eliaquimtam qayamusaq.
21 Pachaykikunawanmi pachachisaq paytaqa.
Chumpikiwanmi weqawninta watasaq paytaqa.
Paytañam churasaq
qampa rantikipi kamachikunanpaq.
Paymi taytanku hina kanqa
Jerusalen llaqtapi yachaqkunapaq.
Paymi taytanku hina kanqa
Juda casta runakunapaq.
22 Hapichisaqmi David castapa wasinpa llaventaqa.
Manam pipas wichqayta atinqachu paypa kichasqantaqa.
Manam pipas kichayta atinqachu paypa wichqasqantaqa.
23 Perqaman estaca takarusqata hinam paytaqa takyachisaq.
Maymi churasqaypim paytaqa takyachisaq.
Reqsisqa runakunapa tiyanan asientopi hinam
payqa kanqa.
Taytanpa ayllunkuna reqsisqa kananpaqmi
payqa kanqa.
24 Tukuy rikchaq serviciota warkuchkaq hinam chay estacapi warkunqaku
achka preciopa chanin kaqkunata.
Abuelon castakunapa ancha reqsisqa kayninmi
pienden Eleaquinmanta.
25 Llapallan kamachiq ñoqa Tayta Diosmi nini:
Chay tiempopim perqaman takasqa estaca chutakaramunqa.
Chay seguro sitiomantam wichiramunqa.
Llapallan chaypi warkusqakunam lliw pierderunqa.
Ñoqa Tayta Diosmi chaynata nini.