Babilonia nacion vencesqa kananmanta
21
Lamar qochapa hichapanpi kaq chunniq sitiopa contranpim Isaias kaynata nirqa:
Imaynam Neguev lawninta sinchi wayra hamuchkan,
chaynam chunniq lawmanta enemigo hamuchkan.
Mancharikuypaq sitiomantam hamuchkan.
2 Puramente manchakuypaqmi Tayta Diospa rikurichiwasqanqa:
Traicionaqkunam traicionachkanku.
Salteaqkunam salteachkanku.
Elam nacionmanta kaqkuna ¡atacaychik!
Waqayninkutam upallachisaq.
Media nacionmanta kaqkuna ¡muyurispa atacaychik!
Waqayninkutam upallachisaq.
3 Cuerpoymi pasaypaqta nanawachkan.
Wachakuywan ñakariq warmi hinam
nanaywan qewikachakuchkan.
Llakikuypi kaspaymi manaña uyarinichu.
Mancharikuypi kaspaymi manaña qawakunichu.
4 Muspaypi hinam rikuriruni.
Mancharikuywanmi katkatatachkani.
Tarden lawpi gustasqay tiempom mancharichiqniyña karun.
Ancha mancharichiqniyñam rikurirun.
5 Mesaqa kachkan alistasqañam.
Mantelkunapas kachkan mastasqañam.
Tropa kamachiqkuna ¡sayariychik!
¡Harkachikunaykichik armakunata
aceitewan llusiychik!
6 Señormi kaynata niwarqa:
Llaqta cuidaqta churamuy.
Tukuy rikusqanta
willakunanpaq churamuy.
7 Pares-pares caballokunapa aysasqan carretakunata qawaspanqa,
asnokunapi silladakuna hamuqta qawaspanqa,
camellokunapi silladakuna hamuqta qawaspanqa
llaqta cuidaqyá sumaqta qawarayachun,
nispa.
Llaqta cuidaqyá allinta qawarayachun,
nispa.
8 Llaqta cuidaqñataqmi qaparispan ninman:
Señor,
maymi churawasqankupim
puncha-punchaw sayachkani.
Señor,
maymi sayasqaypim
tutan-tutan cuidachkani.
9 Kunanmi qawachkani carretapi runa hamuqta.
Qawachkanim pares caballopa aysasqan carretapi runa hamuqta.
Vencerunkum Babilonia llaqtataqa.
Taytacha-mamachankupas pampakunapiñam wischurayachkan.
Chaykunaqa ñutupasqañam pampakunapi wischurayachkan.
10 Ñakarichisqa castamasillaykuna,
erapi trillasqa hina castamasillaykuna,
Llapallan Kamachiq Tayta Diosmanta
uyarisqaytam willaykichik.
Israelpa yupaychasqan Tayta Diosmanta
uyarisqaytam willaykichik.
Edom nacionpa contranpi willakuymanta
11 Duma llaqtapa contranpim Isaias nirqa:
Huk kaqninmi Seir Orqomanta nimuwachkan:
Yaw llaqta cuidaq runa
¿hayka horallañataq faltachkan achikyananpaq?
nispa.
Yaw llaqta cuidaq runa
¿hayka horallañataq faltachkan achikyananpaq?
nispa.
12 Llaqta cuidaqmi contestaspan nin:
Hamuchkanmi hora achikyamunanpaq.
Hamuchkantaqmi hora tutaykunanpaq.
Yachayta munaspaqa tapukuychik.
Yachayta munaspaqa kutimuychik.
Arabia runakunapa contranpi willakusqanmanta
13 Arabia runakunapa contranpim Isaias nirqa:
Dedan lawmanta viajerokuna,
Arabia law pukyu sachakunapi tuta samakuqkuna,
14 yakunayasqakunawan tupaykuq lloqsimuychik.
Yakullaykichiktapas qoykunaykichikpaqyá lloqsimuychik.
Tema lawpi yachaqkuna,
lluptiqkunamanyá taripaykamuychik.
Mikuyllaykichiktapas qoykunaykichikpaqyá taripaykamuychik.
15 Paykunaqa guerrapi wañunankumantam ayqekuchkanku.
Vainanmanta horqosqa espadawan wañunankumantam ayqekuchkanku.
Flechana armawan kamaykuqkunamantam lluptikuchkanku.
Manchakuypaq guerramantam ayqekuchkanku.
16 Señormi kaynata niwarqa:
Kaymanta huk watamanmi
otaq llamkapakuq runapa yupasqan watamanmi
Cedar castapa ancha reqsisqa kaynin
lliw puchukarunqa.
17 Israelpa yupaychasqan ñoqa Tayta Diosmi nini:
Flechawan peleaq soldadokunaqa aschallañam puchurunqa.
Cedar castamanta peleaqkunaqa aschallañam puchurunqa.