Egipto naciontawan Cus nacionta Asiria nacion vencesqanmanta
20
Huk watam Asiria nacionpa reynin Sargon kachamurqa llapallan tropankuna kamachiqta Asdod llaqtaman hinaptinmi chay llaqtapa contranpi peleaspan vencerurqa.
2 Chay tiempopim Tayta Dios rimapayarqa Amozpa churin Isaiasta,
paytam nirqa:
—Chustukuy luto pachaykitawan usutaykita —nispa.
Hinaptinmi pay chaynata ruraspan mana pachayoq qala chakilla purirqa.
3 Hinaptinmi Tayta Dios nirqa:
—Serviqniy Isaiasmi mana pachayoq chaynataq qala chakilla purirqa kimsa watapuni.
Chaytam rurarqa señalpaq hina Egipto nacionta chaynataq Cus nacionta imam pasananmanta yachachinanpaq.
4 Asiria nacionpa reyninmi presochasqata pusanqa Egipto nacionpi kaqkunatawan Cus nacionpi kaqkunata.
Paykunamantam pusanqa mozokunatapas chaynataq machukunatapas.
Paykunataqa pusanqa mana pachayoqtam,
qala chakillatam chaynataq qala sikillatam chaynapi Egipto nacion penqaypi kananpaq.
5 Hinaptinmi Cus nacionpi confiakuqkuna chaynataq Egipto nacionmanta alabakuqkunapas mancharikuspanku penqakuywan kanqaku.
6 Chaymi lamar qochapa patanpi yachaqkuna chay tiempopi ninqaku:
—Qawaychik confiakusqanchik nacionta.
Asiria nacionpi reymanta librawaspanchik yanapawananchikpaqmi chay nacionman lluptirqanchik.
Chaynaqa ¿imaynatataq kunanqa lluptisunchik?
—nispa.