Egipto nacionpa contranpi willakuymanta
19
Egipto nacionpa contranpim Isaias willakun:
Egipto nacionman riq
Tayta Diostayá qawariychik.
Sillasqa hina puyupi kallpaylla
riqtayá qawariychik.
Egipto nacionpi taytacha-mamachakunam
paypa qayllanpi katkatatanku.
Egipto nacionpi llapallan runakunam
pasaypaqta hukmanyarunku.
2 Tayta Diosmi nin:
Egipto runakunatam takanarachisaq.
Kikinkupuratam peleanarachisaq.
Amistadpuram peleanqaku.
Llaqtapuram peleanqaku.
Nacionpuram peleanqaku.
3 Egipto runakunapa yuyaymanaynintam hukmanyarachisaq.
Egipto runakunapa tanteasqankutam yanqacharusaq.
Hinaptinmi taytacha-mamachakunata tapunqaku.
Brujokunatañam paykunaqa tapunqaku.
Tapunqakum espiritistakunata.
Qayakunqakum wañuqkunapa espiritunkunata.
4 Llapallan Kamachiq ñoqa Tayta Diosmi nini:
Egipto runakunatam entregaykusaq.
Ñakarichispa munaychakuqninku runakunamanñam qoykusaq.
Mana llakipayakuq reywanmi paykunata gobiernachisaq.
5 Nilo Mayupa yakunmi chinkarunqa.
Pasaypaqtam chay mayuqa chakirunqa.
6 Yarqakunam asnarirunqa.
Wayqokunapi yakukunam pisirunqa.
Egipto nacionpi Nilo Mayum chinkarunqa.
Ismurunqam lliw soqoskuna.
Ismurunqam lliw tuturakuna.
7 Nilo Mayupa patanpi plantakunam chakirunqa.
Nilo Mayupa patanpi tarpuykunam lliw chakirunqa.
Manaña kanankamam wayra aparunqa.
8 Nilo Mayupi challwaqkunam qaparkachanqaku.
Anzuelowan llapallan challwaqkunam waqanqaku.
Atarrayawan challwaqkunam eqoyarunqaku.
9 Pilchasqa linowan llamkaqkunam muspaypi hina kanqaku.
Yuraq tela awaqkunam muspaypi hina kanqaku.
10 Tela awaqkunam pasaypaqta hukmanyarunqaku.
Llapallan llamkaq runakunam llakisqa sonqoyoq kanqaku.
11 Zoan llaqtapi kamachikuqkunaqa
ancha roqrum kanku.
Rey Faraonta yuyaywan consejaq kachkaspankum
mana valeqllata consejanku.
¿Imaynanpitaq chayna runakunaqa Rey Faraonman niqku:
Yachaysapa runakunapa castanmi kaniku,
nispaqa?
¿Imaynanpitaq chayna runakunaqa Rey Faraonman ninku:
Ñoqaykuqa ñawpaq reykunapa castanmi kaniku,
nispaqa?
12 Yaw Egipto nacionpa reynin Faraon
¿maypitaq kachkan yachaysapa runaykikunaqa
chaynapi Llapallan Kamachiq Tayta Diospa
tanteasqanta willasunaykipaqqa?
¿Maypitaq kachkan yachaysapa runaykikunaqa
chaynapi Egipto nacionpa contranpi
tanteasqankuta yachachisunaykipaqqa?
13 Zoan llaqtapi kamachikuqkunaqa
sonso runakunam.
Menfis llaqtapi kamachikuqkunaqa
engañachikuq runakunam.
Ayllunkupi kamachikuqkunaqa
Egipto nacion pantarachiq runakunam.
14 Tayta Diosmi paykunapi rikurirachirqa.
Pantachikuq espiritutam rikurirachirqa.
Paykunam pantarachinku Egipto nacionta.
Tukuy rurasqankupim pantarachinku chay nacionta.
Vomitaq sinkata hinam rurarunku.
Tamsakachaq sinkata hinam rurarunku.
15 Uma kaqpas nitaq chupa kaqpas
Egipto nacionpa favorninpiqa
manam ima ruraytapas atinqachu.
Palmera kallmapas nitaq tuturapas
chay nacionpa favorninpiqa
manam ima ruraytapas atinqachu.
16 Chay tiempopim Egipto nacionpi runakunaqa warmikuna hinaña rikurirunqa.
Llapallan Kamachiq Tayta Dios atiyninwan paykunata castigaptinmi katkatataspanku mancharikunqaku.
17 Juda nacionpi kaqkunam tamsaykachachinqaku Egipto nacionpi yachaqkunata.
Chaymi pipas sapa kuti Juda nacionpi kaqkunamanta yuyarispankuqa mancharikunqaku Egipto nacionpa contranpi Llapallan Kamachiq Tayta Diospa tanteasqankunamanta.
18 Chay tiempopim kanqa Egipto nacionpi pichqa llaqtakuna Canaan allpapi rimayninkuta rimaqkuna.
Paykunaqa Llapallan Kamachiq Tayta Diosmanta mana rakikunankupaqmi juranqaku.
Chay llaqtakunapa huknintam Intipa Llaqtanwan sutichanqaku.
19 Chay tiempopim kanqa Egipto nacionpi Tayta Diospaq sapaqchasqa altar,
linderonpipas churanqakutaqmi Tayta Dios yuyarina monumentota.
20 Chay monumentom señal chaynataq testigo hina kanqa ñakarichiqninkupa contranpi Tayta Diosta mañakuptinku.
Paymi kachamunqa salvaqninkuta paykunata defiendespa librananpaq.
21 Tayta Diosqa Egipto nacionpi kaqkunamanmi reqsichikunqa,
paykunapas payta reqsikuspankum yupaychanqaku.
Adoraspankum paypaq animalkunata wañuchipunqaku,
ofrecenqakutaqmi kawsaykunamanta ofrendakunatapas hinaspam prometespanku cumplinqaku.
22 Tayta Diosqa azotechkaq hinam castiganqa Egipto runakunata,
chaywanpas kikillantaqmi paykunata sanoyachinqa.
Tayta Diosman kutirikuspa mañakuptinkum paykunataqa sanoyachinqa.
23 Chay tiempopitaqmi Egipto nacionmanta Asiria nacionkama hatun ñan kanqa hinaptinmi Asiria nacionpi kaqkuna rinqaku Egipto nacionman,
Egipto nacionpi kaqkunapas rinqakutaqmi Asiria nacion lawman.
Egipto nacionpi kaqkunawan Asiria nacionpi kaqkunam kuskanku adoranqaku Tayta Diosta.
24 Chay tiempopim Egipto nacionwan Asiria nacion hinaspa Israel nacion kimsanku bendicion kanqa kay pachapi nacionkunapaq.
25 Llapallan Kamachiq Tayta Diosmi bendecinqa paykunata kaynata nispan:
—Ñoqam bendecini Egipto runaykunata,
bendecinitaqmi unanchasqay Asiria naciontapas chaynataq herenciay Israel naciontapas —nispa.