Cus nacionpa contranpi willakuymanta
18
¡Ay,
imaynaraq kanqa wanwakunapa
warwaryanan nacion!
¡Ay,
imaynaraq kanqa Cus law
mayukunapa waklawninpi kaq nacion!
2 Chay nacionmi lamar qochanta
purichin runankunata.
Tuturamanta buquekunapim
purichin willakuq runankunata.
Yaw kachasqa kallpaqkuna,
qamkunaqa chayllayá riychik.
Hatunkaray runakunamanyá chaylla riychik.
Chayllayá riychik lluchkay-lluchkay
uyayoq runakunaman.
Riychikyá tukuy hinastinpi kaq
runakunapa manchakusqan runakunaman.
Runamasin ñakarichiq kallpasapa
runakunamanyá chaylla riychik.
Mayukunapa partisqan nacionpi
yachaqkunamayá chaylla riychik.
3 Kay pachapi kawsaq runakuna,
enteron kay pachapi kawsaq runakuna,
orqokunapi banderakunata sayachiptinkum qawankichik.
Cornetata tocaptinkum uyarinkichik.
4 Tayta Diosmi niwarqa:
Maypi kasqaypim ñoqaqa hawkalla kasaq.
Maypi kasqaymantam ñoqaqa qawamusaq.
Usyaypi llipipipispa kanchariq
inti hinam ñoqaqa kasaq.
Cosecha tiempo rupaypi sulla hinam ñoqaqa kasaq.
5 Uvas plantakuna sisayta tukuruptinmi,
rurunkunapas poqoytaña qallaykuptinmi,
manaraqpas cosecha qallarichkaptinmi
kallmankunata cuchillowan rawmaruchkaq
hina chinkarachinqa.
Wiñaq kallmankunata kuchuparuspa
wischuruchkaq hinam chinkarachinqa.
6 Lliwmi moqokunapi saqesqa kanqa.
Aycha mikuq pawaqkunapaqmi saqesqa kanqa.
Purun animalkunapaqmi saqesqa kanqa.
Chay sitiopim alton pawaq animalkuna
poqoy tiempopi kanqaku.
Chay sitiopim purun animalkuna
cosecha tiempopi kanqaku.
7 Llapallan Kamachiq Tayta Diosmanmi
ofrendankuta apamunqaku.
Hatunkaray lluchkay-lluchkay uyayoq
runakunam apamunqaku.
Tukuy hinastinpi kaq runakunapa manchakusqan
runakunam apamunqaku.
Apamunqakumá ofrendankuta runamasin ñakarichiq
kallpasapa runakuna.
Apamunqakumá ofrendankuta mayukunapa partisqan
nacionpi yachaqkuna.
Apamunqakumá ofrendankuta Sion Moqopi llaqtaman.
Apamunqakumá Llapallan Kamachiq
Tayta Diosta alabana llaqtaman.