Egipto nacionman hapipakuqkunamanta
30
Tayta Diosmi nin kaynata:
¡Imaynaraq kankichik mana kasukuq churikuna,
ñoqata mana yuyariwaspaykichik imapas tanteaqkuna!
¡Imaynaraq kankichik espirituywan mana yanapachkaptiy vino hichaqkuna
otaq espirituywan mana yanapachkaptiy contrato ruraqkuna!
Chaynata ruraspaykichikmi huchata yapachkankichik.
Huchaykichikmanmi astawan huchata yapachkankichik.
2 ¡Imaynaraq kankichik ñoqata mana tapuwaspa
Egipto nacionman chaylla riqkuna,
Rey Faraonman amparakuspa auxilio maskaqkuna,
llantukuchkaq hina Egipto nacionpi pakakuqkuna!
3 Aswanqa Rey Faraonman
amparakuptikichikmi penqayman churasunkichik.
Llantukuchkaq hina Egipto nacionpi
pakakusqaykichikmi humillachisunkichik.
4 Jefekuna kachasqaykichik Zoan llaqtaman riptinpas,
kachasqaykichik runakuna Hanes llaqtaman chayaruptinpas
5 llapallaykichikmi penqaypi rikurinkichik
mana valeqkuna kasqankurayku.
Chay llaqtakunam mana yanapasunkichikchu
mana valeqkuna kasqankurayku.
Paykunaqa penqaymanmi churasunkichik.
Paykunaqa burlakunankupaqmi churasunkichik.
6 Neguev lawpi animalkunamantam Isaias kaynata willakurqa:
Sasachakuypa kasqan sitiontam,
peligrokunapa kasqan sitiontam,
orqo leonkunapa kasqan sitiontam,
kachukuqllaña pawaq culebrapa kasqan sitiontam
asnokunapi qori-qollqenkuta cargachkanku.
Camellokunapim kapuqninkuta cargachkanku.
Egipto nacionmanmi astachkanku.
Mana imapaq valeq nacionmanmi astanku.
7 Astankuqa waspiy hina mana imapaq valeq Egipto nacionmanmi.
Astankuqa mana yanapay atiqninku Egipto nacionmanmi.
Chayraykum Egipto nacionta suticharqani Rahab sutiwan.
Chayraykum suticharqani Mana Ima Ruraq Nacion sutiwan.
8 Kunanyá tablapi kay rikusqaykita qellqay.
Paykunapaqyá kaykunata qellqay.
Libropi qellqaruptikiyá hamuq tiempokunapaq kachun.
Wiñaypaqyá testigo hina kaykunaqa kachun.
9 Kay runakunaqa mana kasukuq runakunam.
Kay runakunaqa traicionero miraykunam,
Tayta Diospa yachachisqankunata mana uyariy munaqkunam.
10 Diospa qawachisqanta rikuq runakunatam ninku:
Amaña Diospa qawachisqanta rikuychikchu,
nispa.
Diosmanta revelacion rikuq runakunatam ninku:
Cheqapmanta revelacion rikusqaykichiktaqa
amaña willawaykuchu.
Willawaykuqa alabawanankupaq kaqkunallata.
Willawaykuqa engaño rikusqaykichik kaqkunallata.
11 Amaña chaynata ruraychikchu.
Amaña chaynata kawsaychikchu.
Amaña Israelpa Chuya Diosninmanta willawaykuchu,
nispa.
12 Chayraykum Israelpa Chuya Diosnin kaynata nin:
Kay nisqaykunatam qamkuna wischupakunkichik.
Runamasikichik ñakarichisqaykichikpim confiakunkichik.
Engañokuna rurasqaykichikpim confiakunkichik.
Chaykuna rurasqaykichikpim hapipakunkichik.
13 Chayraykum chay mana allinkuna rurasqaykichik
raqrasqa hinaspa tuñirunanpaq alto muralla hina kapusunkichik.
Chaynaqa chay murallam qonqaymanta tuñiykamunqa.
Chaynaqa chay murallam chaylla tuñiykamunqa.
14 Allpa puyñuta hinam pakipanqa.
Pasaypaq pakiparusqa puyñu hinam kanqa.
Chay kallpi puyñumanta puchuqkunaqa manam chullapas valenqachu.
Nina sansata hoqarinallankupaqpas manam valenqachu.
Pozomanta yakuta wisinallankupaqpas manam valenqachu.
15 Israelpa yupaychasqan Chuya Señor Diosmi nin kaynata:
Kutirimuspa hawka kakuspaykichikmi
salvasqa kankichik.
Hawkalla confiakuq kaspaykichikmi
kallpasapa kankichik,
nispa niptiypas mana kasukuy munaqkunam karqankichik.
16 Qamkunam nirqankichik:
“Caballokunapim ayqekusaqku” nispa.
Arí,
chaynatam ayqenkichik.
Nirqankichiktaqmi:
“Alli-allin kallpaq carretakunapim kallpasaqku” nispa.
Arí,
qatisuqnikichikpas kallpayllam qatisunkichik.
17 Waranqa runakunam chulla runa hinalla ayqenqaku
chullalla runapa manchachisqan.
Llapallaykichikmi ayqenkichik
pichqa runakunapa manchachisqan.
Ayqenkichikmi asllaña puchunaykichikkama.
Puchunkichikmi orqopa puntanpi
chullallaña kaspi hina kanaykichikkama.
Puchunkichikmi moqopa hawanpi
sayarachisqa bandera hina kanaykichikkama.
18 Chaywanpas Tayta Diosqa suyasuchkankichikmi
llakipayasunaykichikpaq.
Chayraykum payqa rikurimun
kuyapayariykusunaykichikpaq.
Allinlla arreglaq Diosmi Tayta Diosqa.
¡Mayna kusisqam llapallan paypi suyaqkunaqa!
Runankunata kuyapayananpaq Tayta Dios prometesqanmanta
19 Sion Moqopi yachaqkuna otaq Jerusalen llaqtapi yachaqkuna,
manañam haykapipas waqankichikñachu.
Payqa llakipayarisunkichikpunim.
Qaparispa mañakuptikichikmi contestasunkichik.
20 Señormi kawsanallaykichikpaq mikuchisuchkankichik,
kawsanallaykichikpaqtaqmi yakutapas qosuchkankichik.
Chaywanpas yachachisuqnikichikkunaqa manañam pakakunqachu,
aswanqa kikikichikmi paykunata qawankichik.
21 Alleq lawmanpas otaq ichoq lawmanpas rispaykichikqa uyarinkichikmi qepaykichikpi:
—Kaymi ñan,
chayninta puriychik —nispa niq palabrakunata.
22 Qollqewan hinaspa qoriwan qarachasqa taytacha-mamachaykichiktapas millakuypaqtam rurankichik.
Chaykunatam wischunkichik millakuypaq qacha latapata hina hinaspataqmi ninkichik:
—Pasawaychik kaymanta —nispa.
23 Tayta Diosmi parachimunqa tarpusqaykichikman,
allpaykichiktapas ruruchispanmi allinta cosechachisunkichik achkanpi.
Hinaptinmi animalnikichikkunatapas chay tiempopi michinqaku hatu-hatun echaderokunapi.
24 Llamkaq bueyesnikichikkunapiwan asnoykichikkunam mikunqaku palawan chaynataq horquetawan qarasqa allinnin kawsaykunata.
25 Hatun orqokunamantawan alto moqokunamantapas mayukunam paqchamunqa chay hatun wañuchinakuy punchawpi torrekuna tuñichisqa kaptin.
26 Hinaptinmi killapa achkiyninpas kanqa intipa achkiynin hinaraq.
Chaynataqmi intipas chulla punchawllapi kancharinqa qanchis kuti mastaraq imaynam qanchis punchawpi hina.
Chaynam kanqa Tayta Dios runankunapa nanayninta watasqan punchawpi chaynataq kikinpa heridasqanta hampiptin.
Asiria nacion castigasqa kananmanta
27 Qawariychik,
kikin Tayta Diosmi
karumanta hamuchkan.
Piñakuyninmi
yanay-yanay qosni puyuraq ruparichkan.
Simin huntam piñakuynin kachkan.
Tukuy ima ruparuq nina hinaraqmi qallunpas kachkan.
28 Samayninpas llimpariq lloqlla hinaraqmi.
Kunkankama haypaq lloqlla hinaraqmi.
Harnerowan suysuchkaq hinam nacionkunata tuñichichkan.
Hakimata animalman churachkaq hinam paykunata pantachichkan.
29 Qamkunam ichaqa takikunata takinkichik.
Tutapi hatun fiestata rurachkaq hinam takinkichik.
Sonqoykichikpim qamkunaqa kusikunkichik.
Qenata tocastin kusikuchkaq hinam kusikunkichik.
Tayta Diospa Orqonman richkaq hinam kusikunkichik.
Israel castapa amparakunan Diosman richkaq hinam kusikunkichik.
30 Admirakuypaq voznintam Tayta Diosqa uyarichinqa.
Atiynin hamuqtam payqa qawachinqa.
Manchakuypaq piñakuyninwanmi ruranqa.
Lenguachkaq ninawanmi tukurunqa.
Wayra-parawan,
loco parawan chaynataq runtu-parawanmi hamunqa.
31 Tayta Diospa vozninmi Asiria nacionta ñutuparunqa.
Tayta Diosmi varanwan paykunata castigarunqa.
32 Tayta Diosqa kaspiwan waqtachkaq hinam citasqaña castigonwan castiganqa.
Sapa kutilla varawan castigaptinmi
tamborkunapiwan arpakuna waqanqa.
Mancharikuypaq guerrawanmi
contranpi peleanqa.
33 Puntamantaraqmi Tofet sutiyoq qechwa listollaña kachkan.
Puntamantaraqmi Asiria nacionpa reyninpaq listollaña kachkan.
Ancho-ancho hinaspa uku-ukum chay sitioqa kachkan.
Achkallaña yantawan ratachisqa kunununuq ninam kachkan.
Tayta Diospa samayninmi asufreyoq mayu hina chaypi rupachkan.