Moab nacionpi kaq Ar llaqtata vencerusqanku tutam

Moab nacion desgraciapi rikurirqa.

Moab nacionpi kaq Kir llaqtata vencerusqanku tutam

Moab nacion desgraciapi rikurirqa.

2 Dibon llaqtapi runakunam waqaq richkanku.

Moqo capillakunapi waqaqmi richkanku.

Moab castam qaparkachachkan Nebo llaqta

tuñichisqankumanta.

Moab castam qaparkachachkan Medeba llaqta

tuñichisqankumanta.

Llapallankum umanku kachiy-kachiy rutusqa kachkanku.

Llapallankum barbanku rutusqa kachkanku.

3 Luto pachayoqmi callekunapi purichkanku.

Wasipa pampa hina techonpim

waqaspa qaparkachachkanku.

Llaqtapa plazankunapim

waqaspa qaparkachachkanku.

Waqaspankum paykunaqa wischurayachkanku.

4 Hesbon llaqtapi kaqkunam qayaykachakunku.

Eleale llaqtapi kaqkunam qayaykachakunku.

Jahaza llaqtakamam uyarikuchkan qayaykachakusqanku.

Chayraykum Moab soldadokuna manchakuymanta qaparinku.

Chayraykum Moab soldadokuna hukmanyarunku.

5 Moab castakunapaqmi sonqoymanta qayaykachakuchkani.

Moab castakunapaqmi yanapakuyta mañakuchkani.

Runankunam lluptikuchkanku Zoar llaqtakama.

Lluptikuchkankumá Eglat-selisiya llaqtakama.

Luhit wichaytam waqastin richkanku.

Horonaim llaqtaman riq ñantam

qayaykachakustin richkanku.

Desgraciapi kasqankuraykum qaparispa richkanku.

6 Nimrim Wayqopi pukyukunam chakirunña.

Qorakunapas lliwmi chakirunña.

Verde pastopas manaña kanankamam chakirunña.

7 Chayraykum runakunaqa

wasinkupi huñusqanku kapuqninkuta astachkanku.

Wayaw sachakunapa kasqan

wayqopa waklawninmanraqmi astachkanku.

8 Qayaykachakusqankum lliw Moab nacionpi uyarikuchkan.

Eglaim llaqtakamam qaparkachasqanku uyarikuchkan.

Beer-elim lawkamam qaparkachasqanku uyarikuchkan.

9 Dimon llaqtapi pozokuna yawarwan huntasqa kachkaptinpas

hatun castigotaraqmi kachamusaq chay Dimon llaqtamanpas.

Moab nacionmanta lluptiqkunatam leon mikurunqa.

Chay nacionpi puchuqkunatam leonkuna mikurunqa.