Israelpa mirayninkuna allpankuman kutimunankumanta
14
Arí,
Tayta Diosqa Jacob castakunamantam llakipayarikunqa.
Yapamantamá Israel castakunaqa paypa akllasqan runakuna kanqa.
Chayraykum paykunata Tayta Dios allpankupi kawsachinqa.
Huklaw nacionmanta kaqkunam paykunaman huñunakunqa hinaspam Jacobpa castankunaman hukllawakunqa.
2 Israelpa castankunatam achkaq runakuna chaskinqaku.
Kutiptinkutaqmi paykunata nacionninkuman compañanqaku.
Hinaptinmi Israel castakuna chay runakunata rantinqaku warmi-qarita sirvientenkupaqña Tayta Diospa qosqan allpapi.
Israel castakunapa presochaqnin runakunatam presochasqata pusanqaku hinaspataqmi munaychakunqaku ñakarichiqnin runakunapi.
Babilonia nacionpa reyninta burlakuspa imaynam takinankumanta
3 Israel castakuna,
ñakarisqaykichikmanta,
waqasqaykichikmanta chaynataq ancha llakikuypi sirviente kasqaykichikmanta Tayta Dios librasuptikichikmi
4 Babilonia nacionpa reyninta burlakuspa ninkichik kaynata:
¡Imaynatamya ñakarichikuq reyqa tukurun!
¡Imaynatamya piñakuyninpi rurasqanqa tukurun!
5 Mana allin ruraqpa atiynintam
kaspita hina Tayta Dios pakiparun.
Nacionkunapi gobiernaq runapa
tawnantam Tayta Dios pakiparun.
6 Piñakuyninpim chay reyqa nacionkunata castigaq.
Mana tanispam paykunata castigaq.
Piñakuyninpim nacionkunapi munaychakuq.
Mana sayaykuspanmi paykunata qatikachaq.
7 Kunanmi ichaqa kay pachapi nacionkuna
hawkayaypi kachkanku.
Kunanmi ichaqa kay pachapi nacionkuna
kusikuywan takichkanku.
8 Libano Orqopi cipres sachakunapas
kusikuywanmi nichkanku.
Libano Orqopi cedro sachakunapas
kusikuywanmi nichkanku:
“Qam wañusqaykimantaqa manañam
pipas hamuspa kuchuwankuñachu” nispanku.
9 Wañusqakunapa kasqan sitiopi kaqkunapas
kuyuparikuspankum lloqsimunku
chaskisunaykipaqpas.
Kay pachapim kamachikuqkunapa
almankunapas sayarinqaku.
Nacionpi llapallan reykunam
tiyanankumanta hatarinqaku.
10 Llapallanmi rimarispa nisuchkanki:
“Qampas mana kallpayoqmi rikurirunki.
Qampas ñoqayku hinaraqmi rikurirunki.
11 Hatunchakuq kaynikim kay wañuqkunapa
kasqanman chayaramun.
Arpaykikunapa waqayninpas kay wañuqkunapa
kasqanmanmi chayaramun.
Kaypi waqtapanayki camapas aycha urullañam.
Qataykikunapas kaypiqa asnariq urullañam.”
12 Achikyamuptin llipipipiq lucero
¡imaynanpimá cielomantaqa wichiykamunki!
Nacionkuna venceq kachkaspaqa
¿imaynanpimá kay pachamanqa wischurachikamunki?
13 Qanmi sonqoykipi nirqanki:
“Hanaq pachamanmi ñoqaqa seqarusaq.
Tayta Diospa luceronkunapa altonpim
tiyanayta churamusaq.
Norte lawman rispaymi
huñunakunanku orqopi tiyamusaq.
14 Alto-altopi kaq puyukunapa
altonmanraqmi seqarusaq” nispa.
“Ñoqaqa Alto-altopi Dios hinam kasaq” nispa.
15 Aswanqa wañusqakunapa kasqanmanmi
uraykachisurqanki.
Aswanqa uku-ukumanraqmi
uraykachisurqanki.
16 Rikusuqnikikunam qawarayasuspayki ninqaku.
Qanmanta yuyaymanaspankumá ninqaku:
“¿Manachum kay runaqa kay pachapi runakunata
chaqwachiq karqa?
¿Manachum kay runaqa
kay pachapi nacionkunata katkatatachiq karqa?
17 Kay pachatam payqa chunnichirqa.
Llaqtankunatam payqa tuñichirqa.
Presokunapas wasinman kutinanta
mana munaq runam karqa.”
18 Nacionkunapi llapallan wañusqa reykunam
sepulturankupi honrasqa chutarayachkanku.
Sapakamam sepulturankupi hawka chutarayachkanku.
19 Qanmi ichaqa sepulturaykimanta wischusqa kachkanki.
Mana valeq kallma hinam wischusqa kachkanki.
Espadawan tuksisqa wañuqkunapa ñitisqanmi kachkanki.
Sarutyasqa aya hinam wikapasqa kachkanki.
Rumikunapa kasqan uku-uku uchkumanmi aya
hina wischusqa kachkanki.
20 Manam wakin reykuna hinachu pampasqa kanki.
Nacionnikita pasaypaq purmachisqaykimantam
mana pampasqachu kanki.
Chaynam kanki runaykikuna wañuchisqaykimanta.
Wiñaypaqmi manaña yuyarinqakuchu
mana allin runakunapa mirayninta.
21 Churinkunapaq sitiota alistaychik
wañuchinankupaq,
chaynapi abuelonkupa mana allin rurasqankumanta
wañuchinankupaq,
chaynapi kay pachapi dueñochakuyta ama piensanankupaq,
chaynapi kay pachapi llaqtakunata
amaña hatarichinankupaq.
22 Llapallan Kamachiq Tayta Diosmi nin:
Ñoqam paykunapa contranpi hatarisaq,
Babilonia llaqtatam chinkachisaq,
nispa.
Tayta Diosqa nintaqmi:
Babilonia llaqtapi puchuqkunatawan kuskatam tukusaq,
churinkunatam willkankunatawan kuskata tukusaq,
nispa.
23 Llapallan Kamachiq Tayta Diosqa nintaqmi:
Chay llaqtataqa erizo animalkunapa
yachananmanñam tikrasaq.
Yakupa qocharayanan sitiomanñam tikrasaq.
Pichanawan qopata pichachkaq hinam chinkachisaq.
Asiria nacion purmachisqa kananmanta
24 Llapallan Kamachiq Tayta Diosmi juraspa nirqa:
Cheqaptapunipas ñoqapa piensasqayman hinam kanqa.
Cheqaptapunipas ñoqapa tanteasqayman
hinam cumplisqa kanqa.
25 Hina allpaypim Asiria runakunata wañuchisaq.
Hina orqoykunapim paykunata sarupasaq.
Yugo horqosqa hinam runaykunapi
munaychakuyninku tukurunqa.
Qepinku uraykachisqa hinam runaykunapa
ñakariynin tanirunqa.
26 Kay pachapa contranpim ñoqa Tayta Dios
chaynata tanteachkani.
Llapallan nacionkunata atiyniywan
castiganaypaqmi kachkani.
27 Llapallan kamachiq Tayta Diosmi
chaynata tanteachkan.
¿Pitaq paypa tanteasqanta michakunman?
Llapallan Kamachiq Tayta Diosmi
atiyninwan castigananpaq kachkan.
¿Pitaq paypa castigananta harkanman?
Filistea runakunapa contranpi willakusqanmanta
28 Rey Acazpa wañusqan watapim Isaias kaynata willakurqa:
29 Maqasuqnikichikpa tawnan pakirusqanraykuqa
amayá kusikuychikchu.
Filistea llapallan runakuna,
chay pakirusqanraykuqa
amayá kusikuychikchu.
Chay kuchusqa culebrapa puchuqninmantaqa
aswan kachukuq culebraraqmi lloqsimunqa.
Chay kachukuq culebrapa mirayninmantaqa
pawariq venenosapa culebraraqmi lloqsimunqa.
30 Pasaypaq wakcha runakunam
achka pastota mikuchkaq ovejakuna hina mikunqaku.
Mana imayoqkunam
hawkayaypi samachkaq ovejakuna hina hawka samakunqaku.
Yarqaymantam wañuchisaq qanmanta as puchuqkunata.
Lliwtam wañuchisaq qanmanta lliw puchuqkunata.
31 Zaguanpi kaqkuna ¡qaparkachayllawanñayá waqaychik!
Llaqtapi kaqkuna ¡llakimantayá qapariychik!
Norte lawmantam tropakuna hamuchkan.
Qosni hinaraqmi tropakuna kallpamuchkan.
Tropakunamanta chulla soldadopas
mana rakikusqam hamuchkan.
32 Chay runakunamanqa ¿ima nispataq nisunchik?
Chay nacionmanta kachamusqankumanqa ¿ima nispataq nisunchik?
Nisunchikqa:
Tayta Diosmi takyachinqa
Sion Moqota,
nispam.
Nisunchikqa:
Ñakarichisqa runankunam
chaypi amparakunqa,
nispam.