Babilonia nacionpa contranpi willakusqanmanta
13
Amozpa churin Isaiasman Tayta Dios revelaspanmi willarqa Babilonia nacionpi pasananmanta:
2 Qala orqopa hawanpi banderata sayachiychik.
Soldadokunata atacanankupaq qayaychik.
Paykunata kamachikuqkunapa punkunman
yaykunanpaq señaschaychik.
3 Guerrapi peleanankupaqmi sapaqchasqaykunata kamarachini.
Valeroso soldadokunatam qayaramuni.
Vencesqaywan kusikuqkunatam kamarachini.
Castiganaypaq ruraqkunatam kamarachini.
4 Orqokunapa hawanpim
achkallaña runakunapa qayakuynin hina uyarikun.
Nacionkunapa qapariynin hinam uyarikun.
Nacionkunamanta huñunasqa runakunapa qapariyninmi uyarikun.
Llapallan Kamachiq Tayta Diosmi runankunata yupachkan.
5 Karu nacionkunamantam hamuchkanku.
Kay pachapa cantonmantaraqmi hamuchkanku.
Tayta Diosmi hamuchkan
piñakuyninpi armakunawan hina castigananpaq,
chaynapi chay runakunawan
tukuy kay pachata purmachinanpaq.
6 Qaparkachaychik,
Tayta Diospa castiganan
punchawmi hichpamuchkanña.
Tukuy Atiyniyoq Diospa purmachinan
punchawmi hamuchkanña.
7 Chayraykum llapallan runaqa
manaña kallpayoq rikurirunqa.
Chayraykum llapallan runaqa
pasaypaq hukmanyasqaña rikurirunqa.
8 Pasaypaq mancharisqam rikurirunqaku.
Hatun llakipiwan hatun nanaypim rikurirunqaku.
Wachakuq warmipa nanayninwan hinam qewikachakunqaku.
Ancha hukmanyasqam sapakama qawanakunqaku.
Penqakuymantam uyankupas ruparisqa kanqaku.
9 Tayta Diospa castiganan punchawmi chayamuchkanña.
Mana aguantay atina piñakuyninmi chayamuchkanña.
Pasaypaq rabiakuynin punchawmi chayamuchkanña,
chaynapi kay pachata chunnirachinanpaq,
chaynapi kay pachapi huchasapakunata chinkarachinanpaq.
10 Cielokunapi lucerokunam manaña achkinqachu.
Cielokunapi huñunasqa lucerokunam manaña achkinqachu.
Qespiykamuspallam inti tutayaruspan manaña kanchanqachu.
Killapas tutayaruspam manaña kanchanqachu.
11 Tayta Diosmi nin kaynata:
Kay pachapi runakunatam huchankumanta castigasaq.
Mana allin ruraq runakunatam
mana allin rurasqankumanta castigasaq.
Orgulloso runakunapa
hatun tukuynintam tukuchisaq.
Orgullowan gobiernaqkunatam humillachisaq.
12 Runakunatam asllaña kanankukama pisiyachisaq.
Ofir law qori-puromantapas astawanraqmi menosyachisaq.
13 Chayraykum katkatatachisaq cielokunata.
Maymi kasqan sitiomantam
suchurichisaq kay pachata.
Chaynataqa rurasaq Llapallan Kamachiq
ñoqa Tayta Dios
chay punchawpi piñakusqayraykum.
Chaynataqa rurasaq chay punchawpi
rupariq nina hina rabiakusqayraykum.
14 Runakunam rikurinqa
qatikachasqa luwichu hina.
Runakunam rikurinqa
mana michiqniyoq oveja hina.
Sapakamam pasakunqaku ayllunkuman.
Sapakamam pasakunqaku nacionninkuman.
15 Pipas tarichikuqtam lanzawan tuksipanqaku.
Pipas hapichikuqtam espadawan wañuchinqaku.
16 Kikinku qawachkaptinkum
churi-wawankuta wañuchinankupaq pampaman choqapanqaku.
Wasinkutam suwanqaku,
warminkunatam abusanqaku.
17 Contrankupim kachamusaq
Media nacionmanta runakunata
otaq mana qollqemanta piensaq runakunata,
otaq qoritapas mana munaq runakunata.
18 Flechankuwanmi wañuchinqaku mozonkunatapas.
Manam llakipayanqakuchu llullu wawachakunatapas.
Manam llakipayanqakuchu warmachakunatapas.
19 Ñoqapa chinkachisqay Sodoma llaqta hinam
alhaja rumi hina nacionkunapa qawapayasqan
Babilonia llaqtaqa purmachisqa kanqa.
Ñoqapa chinkachisqay Gomorra llaqta hinam
Sumaq kayninmanta Caldea nacionpi runakunapa alabasqan
Babilonia llaqtaqa purmachisqa kanqa.
20 Babilonia llaqtaqa manaña
runapa yachanan llaqtam kanqa.
Qepa wiñaykunapa manaña
yachanan llaqtam kanqa.
Arabia runakunam chay sitiopiqa
karpankuta manaña sayachinqakuchu.
Michiqkunam chay sitiopiqa
ovejankuta manaña samachinqakuchu.
21 Babilonia llaqtapiqa purun animalkunallañam yachanqa.
Wasinkunatapas chuseqkunallañam huntanqa.
Avestruz sutiyoq animalkunañam chaypiqa yachanqa.
Monte cabrakunañam chaypiqa kallpakachanqa.
22 Palacionkunapim waqanqa hiena sutiyoq animalkunallaña.
Adornasqa palacionkunapim waqanqa atoqkunallaña.
Babilonia llaqtapa castigasqa kanan
tiempoqa hichpamuchkanñam.
Babilonia llaqtapa castigasqa kanan
punchawqa kayllañam.