Moab runakuna Juda nacionman ayqekusqankumanta
16
Nacionpi gobiernaqman malta carnerota qatichiychik.
Chunniqpi Sela llaqtamanta Sion Moqoman qatichiychik.
2 Moab nacionmanta warmikunam
otaq Arnon Mayuta chimpaqkunam
rapraykachaq mallqo urpitukuna hinaraq kachkanku.
Qesanmanta pawarachisqa mallqo urpitukuna hinaraqmi kachkanku.
3 Sion Moqopi yachaqkunatam ninku:
Tanteanakuychik amparawanaykikupaq.
Rimanakuychik defiendewanaykikupaq.
Chawpi punchawpiyá tuta hina llantuykuwayku ñoqaykuta.
Pakaykuwaykuyá qanman ayqemuqkunata.
Amayá traicionawaykuchu qanman lluptimuqkunata.
4 Qamkuna ukupiyá yachachunku Moab nacionmanta ayqemuqkunaqa.
Salteaqkunamantayá pakaykuwayku ñoqaykutaqa.
Ñakarichisqa kayniyku tukuruptinqa,
llaqtakuna purmachiyta tukuruptinkuqa,
chaynataq enemigopas nacionmanta pasaruptinqa
5 Diosmi hatun kuyakuyninpi huk gobiernota hatarichinqa.
Davidpa castanmantam confianza runata gobiernachinqa.
Juzgaspanmi allin arreglokunata ruranqa.
Runakuna allinta ruranankupaqmi hikutanqa.
6 Yachanchikmi Moab nacionpi runakunapa
orgulloso kayninta.
Yachanchikmi ancha hatun tukuq hinaspa runa
tukuq kayninta.
Yachanchikmi mana respetakuq kaynintapas.
Yachanchikmi yanqa alabakuq kaynintapas.
7 Moab nacionmanta kaqkunam
qaparkachanqaku nacionninkumanta.
Qamkunam waqankichik Kir-hareset llaqtamanta kaq
ñupupasqa uvas pasaskunamanta.
Qamkunaqa waqankichikmi
ñakarichisqa kasqankumanta.
8 Hesbon llaqta law chakrakunapi plantakunam qawikurun.
Sibma llaqta law uvas huertakunam pasaypaqta qawikurun.
Nacionkunapi munaychakuqkunam ikllimuqkunata lliw sarutyarun.
Jazer llaqtakamam kallmankuna mastarikururqa.
Chunniqnintam kallmankuna mastarikururqa.
Lamar qochapa waklawninkamaraqmi chayarurqa.
9 Chayraykum Jazer llaqtapi kaqkuna waqachkanku
Sibma llaqta law uvas huertamanta.
Chaynam ñoqapas waqachkani
Sibma llaqta law uvas huertamanta.
Hesbon llaqta,
qamraykum weqeyta chaqchuni.
Eleale llaqta,
qamraykum weqeyta chaqchuni.
Tarpukuynikikunapa hawanpim
guerrapi peleaqkuna qaparinku.
Cosechaykikunapa hawanpim
guerrapi peleaqkuna qaparinku.
10 Kusikuyninkum kunanqa tukurunña
tarpusqa chakrankunamanta.
Qapariyninkum kunanqa tukurunña
tarpusqa chakrankunamanta.
Uvas huertankupi takiyninkuqa
manañam kanqachu.
Uvas sarunankupiqa manañam sarunqakuñachu.
Vinopaq uvastaqa manañam sarunqakuñachu.
Qapariyninkuqa manañam kanqañachu.
11 Chayraykum arpa hina sonqoy
waqan Moab nacionmanta.
Chayraykum arpa hina sonqoy
waqan Kir-hareset llaqtamanta.
12 Moab nacionpi kaqkunaqa
moqokunapi capillakunaman yaykuspapas
manam ima ruraytapas atinqakuchu.
Moab nacionpi kaqkunaqa
pisipanankukama santuarionkupi mañakuspapas
manam ima ruraytapas atinqakuchu.
13 Chaynatamá unayña Tayta Dios rimarqa Moab nacionpa contranpi.
14 Kunanñataqmi Tayta Dios kaynata nin:
Kimsa watamantam
otaq llamkapakuq runapa yupasqan watamantam
ancha reqsisqa Moab nacionqa despreciasqa nacion kanqa.
Nana-nanaq runayoq kaspapas despreciasqa nacionmi kanqa.
Chay puchuq runakunaqa mana atiyniyoq runakunallam kanqa.