Agurpa yachachisqankuna
30
Masa lawpi yachaq Jaquepa churin Agurpa yachachisqankuna.
Itielman chaynataq Ucalman yachachispanmi Agur kaynata nirqa:
2 Ñoqam kani wakin runakunamantapas
aswan mana umayoq runaqa.
Manam entiendenichu
wakin runakuna hinaqa.
3 Yuyayniyoq kaytaqa manam yachanichu.
Chuya Diosmantapas manam imatapas yachanichu.
4 ¿Pitaq cielokunaman seqaspa uraykamurqa?
¿Pitaq wayrakunata makinpi putqorqa?
¿Pitaq capanpi watarqa yakukunata?
¿Pitaq churarqa allpapa linderonkunata?
¿Imataq paypa sutinqa yachaptikiqa?
¿Imataq churinpa sutinqa yachaptikiqa?
5 Confiakunapaqmi
Diospa llapallan prometesqankunaqa.
Diosmi harkan llapallan
paypi amparakuqkunataqa.
6 Ama imatapas yapaychu paypa nisqanman.
Yapaptikiqa yanqam qaqchasunkiman.
Llullakuqpaqmi payqa hapisunkiman.
7 Iskay mañakuyllatam mañakurqayki,
Diosnilláy.
Manaraq wañukuchkaptiyyá qoykuway,
Taytalláy.
8 Engañaq kanaymantayá libraykuway.
Llullakuq kanaymantayá harkaykuway.
Amataq wakchayachiwaychu.
Nitaq apuyarachiwaychu.
Mikunaypaq kamaqllatayá qoykuway.
9 Puchu-puchu kapuwaptinqa yanqam negaykiman:
“Pitaq Tayta Diosqa” nispa.
Wakchayaruspayñataqmi suwakuyman
qam Diosniypa sutikita penqayman churaspa.
10 Patronninpa qayllanpiqa amam rimankichu
sirvientepa contranpiqa.
Yanqañataqmi qamña castigasqa
kawaq ñakasuptikiqa.
11 Kanmi taytan ñakaq runakuna.
Kantaqmi mamanmanta rimakuqkuna.
12 Wakin runakunaqa limpiopaqmi hapikunku
ichaqa manaraq qachanku mayllasqam kachkanku.
13 Kanmi alto tukuspa despreciaqkuna.
Kanmi despreciowan runamasin qawaqkuna.
14 Kanmi espada hina kiruyoq runakuna.
Kanmi cuchillo hina waqoyoq runakuna
kay pachapi humildekunata mikurunanpaq,
runakunamanta wakchakuna tukurunanpaq.
15 Yawar soqoq kuwikapa iskay wawankunam ninku:
“Qoway,
qoway” nispa.
Kanmi kimsa mana haykapipas saksaqkuna,
tawa kaqpas manam ninmanchu:
“Chayllapaqñam” nispa.
16 Sepulturaqa manam ninmanchu:
“Chayllapaqñam” nispa.
17 Taytan burlakuq runapa ñawintaqa
cuervokunayá horqochun.
Maman mana kasukuq runapa ñawintaqa
ankakunayá mikuchun.
18 Kimsa kaqkunatam mana entiendeyta atinichu.
Tawa kaqtaqa manataqmi reqsiyta atinichu.
19 Maynintam anka cielopi pawasqantaqa
manam reqsinichu.
Maynintam buque lamar qochanta risqantaqa
manam reqsinichu.
Imaynam sipaspa sonqonta qari suwasqantaqa
manam reqsinichu.
20 Pierdeq casada warmim nin:
“Manam huchallikurqanichu” nispa.
Mikuruspa simin pichakuchkaq hinam nin:
“Manam huchallikurqanichu” nispa.
21 Kimsa clase runakunam
nacionta chaqwaman churanku.
Tawa kaq clase runakunapas
mana aguantay atinam kanku.
22 Sirviente runapa rey kasqanqa
mana aguantay atinam.
Mana umayoq runapa
llumpa-llumpay mikusqanqa
mana aguantay atinam.
23 Mana kuyasqa warmipa casarakusqanqa
mana aguantay atinam.
Patronanpa rantinpi rikuriruq sirvientaqa
mana aguantay atinam.
24 Kantaqmi kay pachapi tawa taksa animalchakuna,
chaykunam llumpay yachaysapa animalchakuna.
25 Sisichakunam mana ancha kallpayoq kachkaspanpas
cosechapi mikunankuta huñukunku.
26 Purun qowi animalchakunam pisi kallpayoq
kachkaspankupas
ranrakunapi wasichakunku.
27 Aqarway urukunam reyninku mana kachkaptinpas
tropa-tropa lloqsinku.
28 Sukullukuykunam hapirunalla kachkaspapas
reypa palacionpiraq yachanku.
29 Kimsa kaqkunam sumaqllataña purin.
Tawa kaqpas sumaqllatañam purin.
30 Leonqa aswan kallpasapam
llapallan animalmantapas.
Payqa manam qepamanqa
kutirinmanchu imaraykupas.
31 Qari-qarim purin
gallopas chaynataq chivatopas.
Qari-qaritaqmi purin
mana vencey atina reypas.
32 Loco hina alabakuspaykiqa
simikitayá makikiwan taparuy.
Mana allinta piensaruspaykiqa
simikitayá makikiwan taparuy.
33 Lecheta qaywispaqa
chay lechetam tikarachinki.
Senqaykita llapiparuspaqa
yawartam lloqsirachinki.
Pitapas rabiachispaykiqa
maqanakuytam hatarirachinki.