29
Qaqchasqa kaspan sonqon rumiyachiqqa
mana musyayllatam chinkachisqa rikurirunqa.
Manaña remedioyoqmi chinkachisqa rikurirunqa.
2 Allin ruraq runakuna miraptinqa
runakunam kusikunku.
Mana allin ruraqkuna munaychakuptinqa
runakunam ñakarispa waqanku.
3 Yachayniyoq karuyta munaq runaqa
taytantam kusichin.
Chuchumikakunaman qokuq runam
ichaqa imankunatapas chinkachin.
4 Allin arreglota ruraspanmi
reyqa nacionninta takyachin.
Yanqamanta regalo chaskiq
reyqa nacionnintam wichirachin.
5 Amigonta chaylla-chaylla alabaq runaqa
amigonpaqmi toqllata churachkan chaywanqa.
6 Mana allin runapaqqa mana kasukusqanmi
toqlla hina kachkan.
Allin ruraq runapaqqa
takiwan kusikuymi kachkan.
7 Allin ruraq runaqa nanachikunmi
mana imayoq runakunapa derechonmanta.
Mana allin ruraq runataqa
manam imapas qokunchu chaykunamanta.
8 Burlakuq runakunam
llaqta runakunata hatarichin.
Yachayniyoqkunataqmi chay
hoqarikuqkunapa piñakuyninta tanichin.
9 Yachayniyoq runa mana tanteoyoq
runawan pleitoman yaykuptinqa,
chay mana tanteoyoqmi rabiaqlla burlakuqlla kanqa.
Manam hawkayay kanqachu paypaqqa.
10 Runa wañuchiq runakunam mana
huchayoq runata cheqninku.
Diospa munasqanman hina ruraq runakunatam
wañuchiypi rinku.
11 Sonso runaqa
chayllam piñakun.
Yachayniyoq runaqa
piñakuynintam munaychakun.
12 Gobiernaq runa llulla rimaqkunapa
rimasqanta kasuptinqa,
llapa serviqninkunam
mana allin ruraq rikurirunqa.
13 Wakchapas,
ñakarichiqninpas
chullallam kanku.
Iskayninkuman Tayta Dios ñawita qosqanraykum
chaynaqa kachkanku.
14 Wakchakunapaq allin arreglaq reyqa
gobiernontam wiñaypaq takyachinqa.
15 Runam yuyayta hapin azotesqaraq.
Runam yuyayta hapin anyasqaraq.
Munaysapa warmam
mamanta churan penqaymanraq.
16 Mana allin ruraq runakuna miraptinmi
huchapas mirarunraq.
Allin ruraq runakunam ichaqa
urmasqantapas rikunqakuraq.
17 Churikita corregiptikiqa
anchatam kusichisunki payqa.
18 Tayta Diosmanta hamuq
palabra mana kaptinqa
munasqankutañam ruranku runakunaqa.
¡Mayna kusisqam Tayta Diospa
yachachikuyninkuna kasukuq runakunaqa!
19 Sirvientetaqa manam simillawanqa corregichwanchu.
Entiendespanpas payqa manapunim kasukunmanchu.
20 Sonso runam aswan allinqa
mana piensarispa chaylla rimaruqmantaqa.
21 Warma kayninmanta
kuyapayasqayki sirvienteqa
wiñaruspanmi manaña
kasukuq rikurirunqa.
22 Chaylla piñakuruq runaqa
atipanakuyllatam hatarichinman.
Rabiakuruq runaqa anchallatañam
huchallikurunman.
23 Orgulloso runaqa
humillachisqam kanqa.
Humilde runañataqmi
allin reqsisqa kanqa.
24 Suwakunawan hukllawakuq runaqa
cheqninmi vidanta.
Suwachikuq ñakachkaptinpas
manam willakunchu rurasqanmanta.
25 Kikinpaq toqlla churachkaq hinam
runamasin manchakuq runaqa.
Tayta Diospi confiakuqñataqmi
paypa amparasqan kanqa.
26 Achkaqmi maskanku gobiernaq
runapa favorninta.
Tayta Diosllam runapa
asuntontaqa arreglan allinta.
27 Allin ruraq runakunam millakun
mana allin ruraqkunata.
Paykunañataqmi millakun Diospa munasqanman
hina kawsaqkunata.