Rey Lemuelpa yachachisqankuna
31
Masa lawpi Rey Lemuelpa yachachisqankuna.
Chay yachachikuykunawanmi paytapas maman corregirqa:
2 ¿Imanikimantaq wawalláy?
¿Imanikimantaq wachakusqalláy?
¿Imanikimantaq prometekuspa mañakusqay wawalláy?
3 Warmikunawanqa amayá
kallpaykita tukuychu.
Reykuna chinkachiq warmikunawanqa
amayá kawsaychu.
4 Lemuel,
reykunaqa
manam vinotaqa tomananchu.
Poqosqa aqa tomay munaypas
manam munaychakuqkunapaqchu.
5 Tomaspankuqa Tayta Diospa
decretonkunatam qonqarunmanku.
Llapallan ñakariqkunapaq
allin arreglo ruraytam tikrarunmanku.
6 Wañunayaq runakunamanyá
poqosqa aqataqa qoykuy.
Llakisqa runakunamanyá
vinotaqa qoykuy.
7 Tomaspankuyá qonqachunku
wakcha kayninkuta.
Tomaspankuyá amaña
yuyarichunkuchu ñakarisqankuta.
8 Mana rimariqkunapa favorninpiyá rimariy.
Mana piyniyoqkunatayá qamqa defiendey.
9 Allinta arreglanaykipaqyá rimariy.
Humildekunata defiendenaykipaqyá rimariy.
Wakchakunata defiendenaykipaqyá rimariy.
Allin warmiqa alabasqam
10 Sasa tarinam allin warmiqa.
Alhaja rumimantapas ancha
valorniyoqmi payqa.
11 Paypiqa pasaypaqtam confiakun qosanpas.
Qosanpaqqa mirapunqam tukuy imanpas.
12 Kawsanankamam qosanta
tukuypi agradan payqa.
Kawsanankamam allin kaqkunallata
ruran payqa.
13 Rantinmi millwatawan linota.
Ganasllawanñam ruran tukuy imata.
14 Negociante buque hinam huñumun mikuyta.
Karumantaraqmi huñumun mikuyta.
15 Tutaraq hatarispanmi
familiankunaman mikuchin.
Sirvientakunamanpas
imam ruranantam kamachin.
16 Chakrata qawaramuspanmi rantirun.
Ganakusqanwantaqmi uvasta plantarun.
17 Chumpikuspanmi alistakun.
Makinkunatam kallpanchaykun.
18 Negociontam sumaqta
cuidan allin kananpaq.
Ancha tutakamam mecheronpas
ratan rurananpaq.
19 Kallapanta hapispanmi puchkan.
Puchka tullunta hapispanmi puchkan.
20 Ñakariqkunamanmi imallantapas qoykun.
Wakchakunamanmi makinta haywariykun.
21 Manam manchakunchu rititaqa.
Rakta pachayoqmi kachkan familiankunaqa.
22 Payqa awakunmi sumaq colchakunatapas.
Fino telamantam ruran pachakunatapas.
23 Qosanpas suti reqsillam llaqtapa zaguanninpa plazanpi.
Payqa suti reqsiyllam ancianokunawan
huñunakusqanpi.
24 Payqa camizonkunatapas ruraspanmi rantikun.
Chumpikunatapas negociantekunamanmi rantikun.
25 Kallpayoq chaynataq respetasqa
kayninmi pachankunaqa.
Manam manchakunchu
hamuq punchawkunamantaqa.
26 Payqa rimanpas ancha yachaywanmi.
Yachachinpas ancha kuyapayakuywanmi.
27 Sumaqtam qawan familiankuna
imaynam kawsasqantaqa.
Manam mikunchu
mana trabajonpa chanin mikuytaqa.
28 Wawankunapas allinllatañam
riman kaynata:
Qosanpas alabantaqmi kaynata:
29 “Achka-achka warmikunam ruranku allinkunata” nispa.
“Qanmi ichaqa masyarunki llapallankuta” nispa.
30 Warmipa kuyayllapaq kayninqa yanqam.
Buenamoza kayninpas chinkaruq
waspiy hinam.
Tayta Dios respetaq warmiqa
alabanapaq hinam.
31 Tukuy chaykuna rurasqanmantayá
qoychik premiota.
Rurasqankunayá llaqtapa zaguanninpa plazanpi
alabachun payta.