22
Qori-qollqeyoq kaymantapas
aswan allinqa allin reqsisqa kaymi.
Qori-qollqeyoq kaymantapas aswan allinqa
kuyasqa runa kaymi.
2 Apupas-wakchapas chullallam kanku.
Iskayninkum Tayta Diospa unanchasqan kanku.
3 Tanteoyoq runaqa desgracia sucedenanta
qawarispanmi asurikun.
Pisi experienciayoq runañataqmi
chayninta pasaykuspan ñakarikun.
4 Tayta Diospa qayllanpi humillakuspa
respetaqnin runaqa kapuqniyoqmi kanqa.
Reqsisqa kaspataqmi
unaypaq kawsakunqa.
5 Pantaypi kawsaq runaqa kichkakunapa,
toqllakunapa kasqanpi purichkaq hinam.
Vidan cuidaq runaqa chaykunamanta
karunchakuq hinam.
6 Imaynam kawsananpaqyá
yachachiy warmataqa.
Yuyaqña kaspapas
manam pantanqachu payqa.
7 Apu runam munaychakun
wakcha runakunapi.
Prestaq runañataqmi
munaychakun prestakuqninpi.
8 Ñakarichiq runaqa
desgraciallatam cosechanqa.
Tukurunqam paypa varanqa.
9 Runamasin llakipayaq runaqa
paypa bendecisqanmi kanqa.
Wakchakunaman mikuykachisqanraykum
bendecisqa kanqa.
10 Burlakuq runata qarqoruptikiqa
churanakuykunapas tukurunqam.
Pleiteanakuypas chaynataq
insultanakuypas tanirunqam.
11 Limpio sonqoyoq kayta munaq runaqa
reypa amistadninmi.
Miskillaña rimaq runaqa
reypa amistadninmi.
12 Cheqap yachaytaqa
Tayta Diosmi cuidan.
Engañaq runapa rimasqantaqa
mana kaqmanmi churan.
13 Qella runam nin:
“Leonqa hawapim kachkan” nispa.
“Callepim wañurachiwanman” nispa.
14 Uku-uku pozo hinam
pierdekuq warmipa rimayninqa.
Tayta Diospa ñakasqan runaqa
chay pozomanmi wichiykunqa.
15 Yanqakunallapim
piensan warmaqa.
Latigowan corregisqam ichaqa
chaymanta karunchakunqa.
16 Apuyananrayku wakchata ñakarichiq runaqa
wakchayanqapunim.
Apu runaman qoq runapas wakchayanqapunim.
Yachayniyoq runakunapa nisqankunamanta
17 Atiendespayki sumaqta uyariy yachayniyoq
runakunapa rimasqankunata.
Sumaqta atiendey ñoqapa yachachisqaykunata.
18 Sonqoykipi waqaychaptikim kusichisunki.
Chaylla rimanaykipaqmi simillaykipi kapusunki.
19 Tayta Diospi confiakunaykipaqmi
kunanqa kaykunata yachachisqayki.
20 Kimsa chunka yachachikuykunatam
qellqarqani qampaq.
Kaykunatam qellqarqani
qamta consejaspay yachachinaypaq
21 chaynapi cheqap palabrakunapa
cheqap kasqanta yachanaykipaq,
chaynapi kachasuqnikimanqa cheqap
palabrakunata willanaykipaq.
- 1 -
22 Wakcha kasqanraykuyá
wakchamantaqa ama suwakuychu.
Humilde runataqa amayá
juzgadopi ñakarichiychu.
23 Tayta Diosmi paykunataqa
chay asuntonpi defiendenqa.
Chay qechuqninkunamantam
Tayta Diospas qechunqa.
- 2 -
24 Ama amigo kaychu
chaylla piñakuq runawan.
Ama puriychu
chaylla rabiakuq runawan.
25 Mana allin vidantam yacharuwaq.
Hinaspam toqllaman hina urmaykuwaq.
- 3 -
26 Ama garantizaychu pitapas
debekuq runataqa.
Amataq qoychu
paymantaqa prendatapas.
27 Mana chayqa paganaykipaq mana kaptinmi
qechusunkiman puñunayki camatapas.
- 4 -
28 Amayá asurichiychu ñawpaqmantaraq
churasqa linderokunataqa.
Amayá asurichiychu abueloykikunaparaq
churasqan linderokunataqa.
- 5 -
29 Reykunatam servinqa empeñowan llamkaq runaqa.
Manam servinqachu mana ancha reqsisqa runakunataqa.