21
Reypa piensasqanqa Tayta Diospa atiyninpim
kachkan parqona yaku hina.
Tayta Diosmi munasqanman hina
reyta piensachin parqona yaku pusachkaq hina.
2 Runamanqa allinpaqmi rikchakapun
tukuy ima rurasqanqa
ichaqa Tayta Diosmi tupun
runapa piensasqantaqa.
3 Animal wañuchipunamantapas mastaqa
Tayta Diosqa munan allin ruranatam.
Animal wañuchipunamantapas mastaqa
Tayta Diosqa munan allin arreglo ruranatam.
4 Hatun tukuspa
apuyaruy munayqa hucham.
Mana allin ruraqkunapa
kawsasqanqa hucham.
5 Ganaswan llamkakuq
runapa yuyaymanasqanqa apuyachinqam.
Mana tanteaq runapa chaylla rurasqanqa
wakchayachinqam.
6 Imaynam wañuy munaq runapa samaynin
chinkarun,
chaynam llullakuywan huñusqa riquezapas
chinkarun.
7 Mana allin ruraq runakunapa daño rurasqanqa
castigomanmi aysan paykunata.
Paykunaqa manam munanchu
Diospa munasqanman hina rurayta.
8 Qewi-qewi ñan hinam
huchasapa runapa vidanqa.
Chuya yaku hinam
Diospa munasqanman hina rurayqa.
9 Wasipa qatan cuartochapi yachakuymi
aswan allinqa
atipanakuq warmiwan
hatun wasipi yachaymantaqa.
10 Mana allin rurayllatam munan
mana allin ruraq runaqa.
Chayna runaqa manam
llakipayanchu runamasintaqa.
11 Pisi experienciayoq runapas
burlakuq runata castigaptinkuqa
yachayniyoqñam rikurirunqa.
Yachayniyoq runata anyaptinkuñataqmi
astawan yachaysaparaq rikurirunqa.
12 Allin ruraq Diosqa qawarayanmi
mana allin ruraq runapa familiantaqa.
Desgraciamanmi qaykun
mana allin ruraq runakunataqa.
13 Wakchakunapa ruegakusqanta
mana uyariy munaq runataqa qayakuptinpas
manam pipas
contestanqachu paytaqa.
14 Pakasqallapi regalo qosqanmi
runapa piñakuyninta tanichin.
Secretollapi pagaykuypas
runapa anchallaña rabiakuynintam tanichin.
15 Allin arreglo rurayqa
kusichinmi allin ruraq runata.
Ichaqa mancharichinmi
mana allin ruraq runata.
16 Allin tanteowan kawsasqanmanta pantaruq runaqa
wañuqkunapa kasqanpim samanqa.
17 Kusikuyllata kuyaq runaqa
wakchallam kanqa.
Vinotawan fiestakunalla kuyaq runaqa
manam haypanqachu apuyaymanqa.
18 Mana allin ruraq runaqa
Allin ruraq runapa rantinpim ñakarinqa.
Traicionaq runaqa Diospa munasqanman hina
ruraqkunapa rantinpim ñakarinqa.
19 Chunniqpi yachakuymi kanman allinqa
atipanakuq lisa warmiwan yachaymantaqa.
20 Yachayniyoq runapa wasinpiqa kapunmi
qori-qollqewan tukuy imankunapas.
Sonso runam ichaqa
yanqachan tukuy kapuqninkunatapas.
21 Allin rurayta munaspa kuyapayakuq runaqa
cheqap kawsaytam tarinqa.
Payqa allinta ruraspanmi
allin reqsisqa kanqa.
22 Yachayniyoq runam vencen
valeroso runakunapa defiendesqan llaqtata.
Tuñirachinmi confiakusqanku
mana yaykuy atina murallata.
23 Imam rimasqan cuidakuq runaqa
sasachakuykunamantam librakunqa.
24 Runa tukuspa
ancha piñakuruq runatam tratanku:
“Qamqa kanki runa tukuqllaña,
orgulloso,
burlakuq runam” nispanku.
25 Qella runataqa munapayasqanmi
wañurachinraq.
Mana llamkay munasqanmi
paytaqa wañurachinraq.
26 Payqa tukuy punchawmi
munaylla-munan imatapas.
Allin ruraq runam ichaqa
qokuykun imallantapas.
27 Mana allin ruraqkunapa animal ofrecesqantaqa
Tayta Diosmi millakun.
Mana allin sonqonwan ofrecesqankuraykum
Tayta Diosqa millakun.
28 Llullakuq testigoqa chinkachisqam kanqa.
Allin uyariq runam ichaqa rimarikunqa.
29 Mana allin ruraq runaqa
hawka tukuq runam.
Diospa munasqanman hina ruraq runaqa
hawkalla kawsakuq runam.
30 Runapa yachayninwan entiendeq kayninqa
manam valenchu Tayta Diospa contranpiqa.
Runapa allin consejaq kayninqa
manam valenchu Tayta Diospa contranpiqa.
31 Guerrapaqmi alistana caballotaqa.
Chaywanpas Tayta Diosmi vencechin guerrapiqa.