20
Vinowanmi runaqa
burlakuq runa rikurirun.
Poqosqa aqawanñataqmi
qaparkachaq runa rikurirun.
Chaykunata upyaspa pantaruspaqa
manaña yachayniyoqmi rikurirun.
2 Malta leonpa qapariynin hinam
reypa piñakuyninqa.
Vidanpa contranpim huchallikun
reyta piñachiq runaqa.
3 Alabasqa runam
atipanakuymanta asurikuq runaqa.
Mana tanteoyoqmi
churanakuyta qallarichiq runaqa.
4 Tarpuy tiempo kachkaptinpas
qella runaqa manam yapunchu.
Cosecha tiempopi maskaptinqa
manam imanpas kapunchu.
5 Pozopi uku-uku yaku hinam
runapa tanteayninqa.
Imayna horqoytapas yachanmi
entiendeq runaqa.
6 Achka runakunam alabakunku
kuyapayakuq kasqankumanta.
¿Pitaqsi tarinman
imapipas confiakuna runata?
7 Mana culpayoqmi kawsakun
allin ruraq runaqa.
¡Mayna kusisqam kachkanku
paypa churinkunaqa!
8 Queja arreglananpaq tiyananpi
rey tiyaykuspaqa
qawarispallanmi chinkarachin
mana allintaqa.
9 Manam pipas ninmanchu:
“Sonqoyqa limpiasqañam” nispa.
Manam pipas ninmanchu:
“Huchaykunamanta limpiasqañam kani” nispa.
10 Tayta Diosqa cheqninmi
mana cabal kaq pesotaqa.
Tayta Diosqa cheqninmi
mana cabal kaq kullutaqa.
11 Rurasqankunawanmi mozoqa
imaynam kasqanta reqsichikun.
Diospa munasqanman hina kawsasqantam
reqsichikun.
12 Rinritaqa Tayta Diosmi rurarqa uyarikunanpaq.
Ñawitaqa Tayta Diosmi rurarqa qawakunanpaq.
13 Amayá puñukuqllaqa kaychu,
mana chayqa wakchayarunkim.
Rikchaspaqa saksaykunkim.
14 Rantiqmi rantikuqta nin:
“Kaynikiqa manam valenchu” nispa.
Pasakuspanñataqmi alabakun:
“Allintam rantiruni” nispa.
15 Qoriwan alhaja rumim
ancha valorniyoqqa.
Chaykunamantapas aswan valorniyoqraqmi
yachaywan rimaq runaqa.
16 Mana reqsisqan runata pipas garantizaptinqa
chay runapa pachantayá prendapaq hapiy.
Huklaw llaqtayoq runata pipas garantizaptinqa
chay runapa pachantayá prendapaq hatalliy.
17 Runaqa anchallatañam gustan
llullakuspa ganasqam mikuytaqa.
Ichaqa siminmi
aqopa huntasqam rikurirunqa.
18 Tanteasqaykikunata allinta qespichiy
allinta consejachikuspayki.
Guerrapi peleay
allinta consejachikuspayki.
19 Cuento qepi runaqa
manam secretota hatallinchu.
Rimaysapa runawanqa
amayá anchata puriychu.
20 Tayta-maman ñakaq runaqa mechero
hinam wañurunqa.
Chay mecheronqa
ancha tutayaypim wañurunqa.
21 Apuyaruyta munaruspa
qallariyninpi chaylla imapas armakurusqanqa
qepa punchawkunapim
manaña kusichinqachu hatalliqnintaqa.
22 Ama haykapipas rimaychu:
“Vengakurusaqmi” nispaqa.
Tayta Diosllapi hapipakuspa
suyay librasunaykipaqqa.
23 Tayta Diosqa cheqninmi
mana cabal kaq pesotaqa.
Manataqmi agradonpaqchu
engañakuq balanzakunaqa.
24 Runataqa Tayta Diosllam pusachkan
mayman rinanpaqpas.
Manam pipas yachakunchu
imaynam vidan kanantapas.
25 Manam valenmanchu Tayta Diosman
imapas chaylla sapaqcharuyqa.
Toqlla hinam kanman
mana tanteaspa chay rurarusqanqa.
26 Yachayniyoq reyqa
mana allin ruraqkunatam
wayrachichkaq hina cheqechin.
Paykunataqa trillachkaq hinam
trillananpa ruedanwan sarurachin.
27 Tayta Diospa mecheron hinam
runapa conciencianqa.
Chay conciencianmi kuchun-kuchunta
kanchan runapa sonqontaqa.
28 Kuyapayakuq confianza reyqa
allintam takyanqa.
Kuyapayakuywan gobiernaptinqa
gobiernonmi allinta takyanqa.
29 Mozokunapa kallpanqa
paykunapa adornon hinam.
Yuyaqkunapa soqo chukchanqa
paykunapa adornon hinam.
30 Heridayoq kanankama maqaspam
runamantaqa mana allinta qechuna.
Azotewan waqtapaspam runapa sonqonmantaqa
mana allinta qechuna.