14
Familianmantam nanachikun
yachayniyoq warmiqa.
Familiantam pierdechin
mana yuyayniyoq warmiqa.
2 Diospa munasqanman hina kawsaq runaqa
Tayta Diostam respetan.
Pantaypi kawsaq runam ichaqa
Tayta Diosta desprecian.
3 Mana yuyayniyoq runaqa
hatun tukuspa rimasqamantam
castigasqa kanqa.
Yachayniyoq runam ichaqa
rimasqanwan waqaychasqa kanqa.
4 Taqepas vaciorayanmi
bueyeskuna mana kaptinqa.
Bueyeskunapa kallpanwanmi
ichaqa achka kawsaykuna kanqa.
5 Cheqap rimaq testigoqa
mana llullakuspanmi riman.
Llullakuq testigom ichaqa
llullallata riman.
6 Yachayta maskaspapas
burlakuq runaqa manam tarinchu.
Allin entiendeq runapaqmi ichaqa
yachay tariypas mana sasachu.
7 Karunchakuyá sonso runamantaqa.
Paypa rimayninpiqa
manam tarinkichu yachaykunataqa.
8 Yachayniyoq runaqa
entiendenmi imaynam kawsakuyta.
Sonso runakunam ichaqa
engañakuspa piensan yachayniyoq kasqanta.
9 Mana tanteoyoq runakunaqa
culpayoq kasqankumantam asikunku.
Diospa munasqanman hina kawsaqkunam
ichaqa allin sonqoyoq kawsakunku.
10 Runaqa sonqollanpim yachan
llakisqa kasqantaqa.
Paypa kusikuyninwanqa
Manam kusikunmanchu sapaq runaqa.
11 Mana allin ruraqkunapa wasinqa
chinkachisqam kanqa.
Diospa munasqanman hina
kawsaqkunapa yachananmi ichaqa takyanqa.
12 Kanmi allin ñanman rikchakuq ñan.
Ichaqa chay ñanpa tukupayninqa wañuyllam.
13 Asikuspanpas runaqa
sonqonpim llakisqa kanman.
Kusikuyninñataqmi
llakikuyman tikrakunman.
14 Piensasqanpi pantaruq runaqa
mana allin kawsasqanwanmi contentakun.
Allin runam ichaqa
allin kawsasqanwan contentakun.
15 Pisi experienciayoq runaqa creerunmi
tukuy imapas nisqankuta.
Yachayniyoq runam ichaqa
entienden imaynam kawsananta.
16 Yachayniyoq runaqa mana allinmantam
manchakuspan karunchakun.
Sonso runam ichaqa
atrevido kaspan kikillanpi confiakun.
17 Imatapas loco hinam ruran
chaylla piñakuruq runaqa.
Sacre runam ichaqa
cheqnisqa kanqa.
18 Pisi experienciayoq runakunaqa
mana tanteoyoqmi kanqaku.
Yuyaysapa runakunam ichaqa
yachaywan coronasqa kanqaku.
19 Mana allin runakunam
allin runakunapa ñawpaqninpi humillakunqaku.
Mana allin ruraq runakunam
allin ruraqkunapa punkunpi humillakunqaku.
20 Amistadninkunapas cheqninmi
wakcha runataqa.
Achkallaña runakunam
kuyan apu runataqa.
21 Huchallikunmi
runamasin despreciaq runaqa.
Mayna kusisqam
ñakariqta llakipayaq runaqa.
22 Mana allinllapi yuyaymanaq runakunaqa
pantayllapim kachkanku.
Allin kaqkunapi yuyaymanaq runakunam
ichaqa kuyapayasqa kachkanku.
Allin kaqkunapi yuyaymanaqkunapas
confianza runakunam kachkanku.
23 Imapipas llamkaq runaqa
allin kaqkunatam tarin
Rimaylla-rimaq runaqa
wakchayayllatam tarin.
24 Yachayniyoq runakunataqa
qori-qollqenmi corona hina adornan.
Sonso runakunataqa
mana tanteoyoq kayninmi adornan.
25 Cheqap rimaq testigoqa
runamasintam libran.
Llulla rimaq testigoqa
engañokunallatam riman.
26 Tayta Dios respetaq runaqa
confianzallawanñam kawsakunqa.
Payta respetasqanraykum mirayninkunapas
allin amparasqa kawsakunqa.
27 Tayta Diosta respetayqa
kawsachikuq yaku hinam.
Chayqa kanqa wañuchiq toqllamanta
lluptichiqnin hinam.
28 Achka runata gobiernaq reyqa
allin reqsisqam kanqa.
Pisi runakunallata gobiernaspanmi
ichaqa penqaypi kanqa.
29 Anaq piñakuq runaqa
ancha entiendeq runam.
Chaylla piñakuruq runaqa
mana tanteoyoq runam.
30 Allinlla piensaq runaqa
cuerpontam kawsachin.
Envidioso kayninmi ichaqa
tullunpi onqoy hina ñakarichin.
31 Mana imayoq runata ñakarichiq runaqa unanchaqnintam insultan.
Wakcha runa llakipayaq runam
ichaqa unanchaqninta hatunchan.
32 Mana allin ruraq runaqa
desgracia hamuptinmi wichirunqa.
Allin ruraq runaqa
wañuruspanpas amparaqniyoqmi kanqa.
33 Entiendeq runapa sonqonpiqa
yachaymi kachkan.
Sonso runakunapa
kasqanpipas yachayqa reqsisqam kachkan.
34 Allin ruraq runakunaqa
nacionnintam hatunchan.
Huchalla ruraq runakunam ichaqa
nacionninta penqayman churan.
35 Reymi favorecen
yuyaywan serviqnin runataqa.
Piñakuyninpi castigasqam kanqa
penqayman churaqnin runaqa.