13
Yachayniyoq churiqa
kasukunmi taytanpa correqisqanta.
Burlakuq runam ichaqa
mana kasunchu anyaqninta.
2 Rimasqankunapa ruruntam
cosechanqa runaqa.
Daño rurayllatam munanku
traicionaq runakunaqa.
3 Rimasqanta cuidakuq runaqa
kikillantam cuidakun.
Rimaysapa runam ichaqa
kikillanta dañakun.
4 Qella runaqa munaspapas
manam tarinchu imatapas.
Allin llamkaq runam
ichaqa chaskin tukuy imatapas.
5 Llulla rimaykunataqa cheqninmi
allin ruraq runaqa.
Cheqnipaymi hinaspa penqaypaqmi
mana allin ruraq runaqa.
6 Allinkuna rurasqanmi harkan
mana culpayoq runataqa
Mana allin rurasqanmi
wichichin huchallikuq runataqa.
7 Kanmi apu tukuq runakuna
mana imankupas kachkaptin.
Kantaqmi wakcha tukuqkunapas
tukuy imankupas kachkaptin.
8 Qori-qollqenmi wañunanmanta libran
apu runataqa.
Pipa amenazakuyninpas manam imapas qokunchu
wakcha runataqa.
9 Allin ruraqkunapa kawsasqanqa
kusikuyta apamuq kanchay hinaraqmi.
Mana allin ruraqkunapa kawsasqanqa
wañuruq mechero hinaraqmi.
10 Atipanakuyllatam hatarichin
orgulloso runaqa.
Yachayniyoq runakunam
allin consejo chakiqkunaqa.
11 Engañowan apuyaruqqa
chayllam menosyarunqa.
As-asllamanta apuyaruqqa
kapuqnintam mirachinqa.
12 Runapa imapas suyasqan unamuptinmi
sonqon hukmanyarun.
Suyasqan rikurimuptinmi ichaqa
kawsay qokuq sacha hinaraq rikurirun.
13 Kamachikuyta despreciaq runaqa
despreciasqanmantam paganqa.
Kamachikuyta respetaq runam
ichaqa premiasqa kanqa.
14 Yachayniyoq runapa yachachikuyninqa
kawsachikuq yaku hinam.
Paypa yachachikuyninqa
wañuchiq toqllamanta lluptichiqnin hinam.
15 Pipapas favorecesqanmi
tantearispa ruraq runaqa.
Sasallañam
traicionaq runakunapa kawsasqanqa.
16 Yachaywanmi ruran
yachayniyoq runakunaqa.
Sonso kasqantam qawaykachikun
sonso runaqa.
17 Mana allin ruraq runaqa kachaptinkupas
sasachakuymanmi wichiykun.
Allin willakuq runam ichaqa
hampi hinaraq allinyaykachikun.
18 Corregisqankuta mana chaskiq runaqa
wakchayaspam penqaypi kanqa.
Qaqchasqankuta kasukuq runam
ichaqa reqsisqa kanqa.
19 Ancha suyasqanta tariruspanmi
contentakun runaqa.
Sonso runakunam ichaqa
mana rakikuyta munanchu
mana allin ruraymantaqa.
20 Yachayniyoq runakunawan juntanakuspaykiqa
yachayniyoqmi kanki.
Sonso runakunawan juntanakuspam
ichaqa sasachakuypi kanki.
21 Huchallikuq runakunataqa
desgraciakunallam qatikachachkan.
Allin ruraq runakunaqa
allinkunawan premiasqam kachkan.
22 Allin runapa herencianqa
kanqa willkankunapaqmi.
Huchasapa runapa kapuqninkunaqa
kanqa allin ruraq runapaqmi.
23 Wakcha runapa llamkasqanpiqa
achka kawsaymi qespirun.
Ichaqa abusakuq runakunam
tarpukuyninta qechurunku.
24 Mana kasukuq churinta
mana latigay munaq runaqa
churintam cheqnin.
Churin kuyaq runam ichaqa
chaylla corregin.
25 Allin ruraq runaqa
saksanankamallam mikun.
Mana allin ruraq runam ichaqa
manaña saksarispa mikuylla-mikun.