12
Corregisqa kayta munaq runaqa
yachaytam munan.
Qaqchachikuy mana munaqmi ichaqa
asno kayta munan.
2 Allin runaqa
Tayta Diospa favornintam chaskin.
Sacre runam ichaqa
Tayta Diospa sentencianta chaskin.
3 Mana allin kawsaq runaqa
manam takyanqachu.
Allin ruraq runakunam ichaqa
mana kuyunqachu.
4 Allin warmiqa qosanpa
umanpi kaq sumaq corona hinam.
Qosan penqachiq warmiqa
qosanpa tullunpi onqoy hinam.
5 Allin ruraq runakunaqa Diospa
munasqanman hinam yuyaymananku.
Mana allin ruraq runakunam
ichaqa engañollata consejanku.
6 Mana allin ruraq runakunapa rimayninqa
wañuchinanpaq wateqaq runa hinam.
Diospa munasqanman hina ruraq runapa rimayninqa
runamasin libraq hinam.
7 Mana allin ruraq runakunaqa
vencechikuspam chinkanqaku.
Allin ruraq runakunapa castanmi
ichaqa hinalla seguinqaku.
8 Runaqa yachayniyoq kasqanraykum
alabasqa kanqa.
Huchalla piensaq runam ichaqa
despreciasqa kanqa.
9 Mana mikunayoq allin reqsisqa runamantaqa
despreciasqa kaspapas
servienteyoq kaymi aswan allinqa.
10 Allin ruraq runaqa
nanachikunmi animalninkunamanta.
Mana allin ruraq runam
ichaqa mana yachanchu llakipayakuyta.
11 Chakranpi llamkakuq runaqa
saksanankama mikunayoqmi kanqa.
Yanqa purikuq runam ichaqa
mana ancha yachayniyoq kasqanta reqsichikunqa.
12 Mana allin runakunapa qechusqantam
munapayan mana allin ruraq runaqa.
Allin sapichasqa sacha hinam
wiñan allin ruraq runakunaqa.
13 Mana allin rimasqanmi
urmaykachinqa mana allin runakunataqa.
Allin ruraq runakunaqa
lloqsinqam sasachakuyninmantaqa.
14 Rimasqankupa rurunwanqa
sapakamam saksanqaku.
Paykunaqa rurasqankuman hinam
pagonkuta chaskinqaku.
15 Mana tanteoyoq runapaqqa
tukuy rurasqankunam allinpaq rikchakun.
Yachayniyoq runam ichaqa
consejaqninkunata kasukun.
16 Mana tanteoyoq runaqa
piñasqa kasqantam chaylla qawachikun.
Yachayniyoq runam ichaqa
insultachikusqantapas pakaykun.
17 Cheqap willakuq testigoqa
imam kaqllatam willakun.
Llullakuq testigom ichaqa
engañollata willakun.
18 Nanay simikunam rimanku
espadawan tuksichkaq hina.
Yuyayniyoq runakunapa rimasqanmi
ichaqa hampi hina.
19 Cheqap rimaq runaqa
wiñaypaqmi takyanqa.
Llulla rimaq runam
ichaqa chaylla chinkanqa.
20 Mana allin piensaq runakunapa sonqonpiqa
engañollam kachkan.
Allin kaqkuna consejaq runapa sonqonpim
ichaqa kusikuylla kachkan.
21 Manam imapas pasanqachu
allin ruraq runataqa.
Mana allin ruraqkunam ichaqa
ñakarinqa tukuy mana allintaqa.
22 Tayta Diosqa cheqninmi
llulla rimaq runakunataqa.
Tayta Diosqa favorecenmi
cheqap rimaqkunataqa.
23 Tanteoyoq runaqa
manam alabakunchu yachayninmanta.
Sonso runam ichaqa
sutilla reqsichikun mana yuyayniyoq kasqanmanta.
24 Llamkakuq runaqa
munaychakuq runam kanqa.
Qella runam ichaqa
llamkachisqa kanqa.
25 Preocupasqa kaptinmi
runapa sonqon hukmanyasqa kachkan.
Kuyakuy palabrakunawanmi ichaqa
sonqon kusisqa kachkan.
26 Allin ruraq runaqa
runamasintam allinta pusachkan.
Mana allin ruraq runam
ichaqa pantay ñanninta pusachkan.
27 Hapinan animaltam
mana qatipaykunchu qella runaqa
Pipaqpas ancha valorniyoqmi
allin llamkaq runaqa.
28 Cheqap kawsaymi
allinta ruraspa kawsayqa.
Manam pipas wañunqachu
allinta ruraspa kawsakuqqa.