15
Allin simillawan contestaq runaqa
runamasinpa piñakusqantam tanichin.
Nanay simiwan contestaq runam
ichaqa astawanraq runamasinta piñachin.
2 Yachayniyoq runakunapa siminmantam
yachay lloqsin.
Sonso runakunapa siminmantam
ichaqa mana allin rimaykuna lloqsin.
3 Maypi kaq runatapas
Tayta Diosqa rikuchkanmi.
Mana allin runatapas
allin runatapas payqa qawachkanmi.
4 Allin ruruq sacha hinam
allin simiyoq runaqa.
Runamasintam llakichin
nina qallu runaqa.
5 Taytanpa corregisqantam desprecian
mana yachayniyoq runaqa.
Corregisqa kasqanta kasukuq runam
yachayniyoq runaqa.
6 Allin ruraq runapa wasinpiqa
achka qori-qollqem kachkan.
Mana allin ruraqpa ganasqanpim
ichaqa desgracia kachkan.
7 Yachayniyoq runakuna rimaspanqa
yachaytam cheqechin.
Sonso runakunam ichaqa
mana chaynatachu cheqechin.
8 Mana allin ruraq runakunapa ofrendantaqa
Tayta Diosqa millakunmi.
Paypa munasqanman hina ruraq runakunapa
mañakusqanqa agradonpaqmi.
9 Tayta Diosqa millakunmi
mana allin ruraqkunapa kawsasqantaqa
ichaqa kuyanmi
allin ruray munaqkunataqa.
10 Nisyutam castigana
allin kawsay mana munaq runataqa.
Wañunqapunim
anyasqa kayta cheqniq runaqa.
11 Tayta Diosqa qawachkanmi
wañusqakunapa kasqantapas.
Tayta Diosqa qawachkanmi
uku-pachatapas.
Yachachkantaqmi runakunapa imaynam
piensasqantapas.
12 Faltanmanta qaqchaqnintaqa
burlakuq runaqa manam kuyanchu.
Manataqmi yachayniyoqkunaman
hukllawakuytapas munanchu.
13 Runapa sonqon kusisqa kaptinqa
uyanpas kusisqam kanqa.
Sonqon llakisqa kaptinmi ichaqa
hukmanyasqa kanqa.
14 Allin entiendeq runaqa astawan
yachaytam munan.
Sonso runam ichaqa
mana tanteoyoq kayta munan.
15 Ñakariq runakunapaqqa sapa punchawmi
ñakariy punchawkunalla.
Kusisqa sonqoyoq runapaqmi ichaqa
punchawkunaqa fiesta punchawkuna hinalla.
16 Achka kapuqniyoq kachkaspa
llakisqa kaymantaqa
wakchalla kaspapas Tayta Diosta
respetaymi aswan allinqa.
17 Cheqninakuspa
wira aychayoq mikuruymantaqa
kuyanakuspa yuyu mikuyllapas
mikuruymi aswan allinqa.
18 Chaylla piñakuruq runaqa
hatarichinmi churanakuyta.
Anaq piñakuq runam ichaqa
amachan atipanakuyta.
19 Qella runapaqqa ñanpas
kichka-kichka ñanmanmi rikchakapun.
Diospa munasqanman hina ruraq runapaqmi
ichaqa carreteraman rikchakapun.
20 Taytantam kusichin
yachayniyoq runaqa.
Mamantam desprecian
sonso runaqa.
21 Mana allinta piensariq runaqa
mana tanteoyoq kasqanwanmi kusikun.
Allin entiendeq runam ichaqa
pantaruspanpas allin kawsayman kutirikun.
22 Runapa ruray munasqanmi
mana qespinchu mana consultaspa rurasqanrayku.
Runapa imapas rurasqanqa qespinmi
achka consejaqkunata consultasqanrayku.
23 ¡Maynatam kusikun
allinta contestaruq runaqa!
¡Mayna allintaqmi
tiempollanpi rimarisqa palabraqa!
24 Wiñay kawsayman riq ñanqa wichaymanmi
richkan yachayniyoq runapaqqa.
Chayna kawsasqanmi
uku pachaman rinanmanta libran paytaqa.
25 Orgulloso runapa wasintaqa
Tayta Diosmi tuñichin.
Viudapa linderonkunatam
ichaqa Tayta Dios takyachin.
26 Tayta Diosqa millakunmi
mana allin runakunapa tanteasqantaqa.
Tayta Diospa agradonpaqmi
allin sonqoyoqpa palabrankunaqa.
27 Engañowan ganay munaq runaqa
familianmanmi desgraciata apaykunqa.
Sayniyachikuyta cheqniq runaqa
hawkam kawsakunqa.
28 Contestananpaqmi sumaqta piensan
allin kawsaq runaqa.
Yakuta hichachkaq hinam riman
mana allin ruraq runaqa.
29 Mana allin ruraq runakunamantam
Tayta Diosqa karupi kachkan.
Allin ruraq runakunapa mañakusqantam
ichaqa Tayta Dios uyarichkan.
30 Kusisqa ñawiyoq runaqa runamasintam kusichichkan.
Allin noticiata willakuq runaqa
runamasintam kallpanchachkan.
31 Allin kawsananpaq anyasqa kasqanta
uyarikuq runaqa
yachayniyoq runakunawanmi yachanqa.
32 Corregisqa kasqanta mana kasukuq runaqa
kikillantam despreciakuchkan.
Anyasqa kasqanta uyarikuq runaqa
allin entiendeqñam kachkan.
33 Tayta Diosta respetaq runaqa
yachayniyoq kananpaqmi corregisqa kanqa.
Puntataqa humillakunam
ancha reqsisqa kanapaqqa.