Yachaypa qayakuyninmanta
8
Qayakuchkaq runa hinam
yachayqa qayakuchkan.
Qaparichkaq runa hinam
entiendeyqa qaparichkan.
2 Ñanpa hichpan alto moqokunapim
sayan qayakunanpaq.
Ñanpa pallqankunapim
sayaykun qayakunanpaq.
3 Llaqtaman yaykuna zaguankunapim
payqa qaparin.
Llaqtaman yaykuna punkukunapim
payqa qaparin:
4 “Runakuna,
qamkunatam qayachkaykichik.
Runakuna,
qamkunatam rimapayachkaykichik.
5 Pisi experienciayoq runakuna,
qamkunapas entiendeychikyá.
Sonso runakuna,
qamkunapas entiendeychikyá.
6 Uyariychikyá,
ñoqaqa
sumaqllaña kaqkunatam rimasaq.
Uyariychikyá,
ñoqaqa
Diospa munasqanman hinam rimasaq.
7 Cheqap kaqkunatam rimarisaq ñoqaqa.
Manam munanichu mana allinmanta rimaytaqa.
8 Allin kaqkunallamantam
rimani ñoqaqa.
Manam pantachinaypaqchu
rimani ñoqaqa.
Manam huchallichinaypaqchu
rimani ñoqaqa.
9 Tukuy nisqaykunaqa allinllam
entiendeqkunapaqqa.
Tukuy nisqaykunaqa Diospa munasqanman hinam
yachay maskaqkunapaqqa.
10 Chaynaqa qollqemantapas mastaqa
corregisqaytayá chaskiychik.
Chaynaqa akllasqa qorimantapas mastaqa
yachachisqaytayá chaskiychik.
11 Yachayniyoq kaymi alhaja
rumikunamantapas aswan allinqa.
Imaña munasqaykipas
manam igualanmanchu chay yachaymanqa.
12 Ñoqa yachayqa kuska kawsakuq runakuna hinam
allin tanteaywan tupanakuni.
Yuyaymanaspa allin consejokuna tariq runa hinam
ñoqapas yachayta hatallini.
13 Tayta Diosta respetaq runaqa
cheqninmi mana allintaqa.
Ñoqapas cheqninim
orgulloso runatawan
hatunchakuq runataqa.
Ñoqapas cheqninim
mana allinlla kawsaq runatawan
llullalla rimaq runataqa.
14 Ñoqallam kani allin consejo qokuqpas.
Ñoqallataqmi kani yachaywan allin rurachiqpas.
Ñoqallam kani allin entiendechiqpas.
Ñoqallataqmi kani atiywan rurachiqpas.
15 Ñoqaraykum reykunapas allinta gobiernanku.
Ñoqaraykum autoridadkunapas allinta decretanku.
16 Ñoqaraykum kamachikuqkunapas
allinta kamachikunku.
Ñoqaraykum munaychakuqkunapas
allin arreglota ruranku.
17 Ñoqaqa kuyanim kuyawaqniykunataqa.
Tariwanqakum chaylla maskawaqniykunaqa.
18 Ñoqapim tarinmanku
apuyaytawan reqsisqa kaytaqa.
Ñoqapim tarinmanku mana tukuy
riquezatawan allin ruraytaqa.
19 Qorimantapas aswan allinqa
ñoqapa qosqaymi.
Qori-puromantapas aswan allinqa
ñoqapa qosqaymi.
Akllasqa qollqemantapas aswan allinqa
ñoqapa qosqaymi.
20 Allin ñanpi purichkaq runa hinam
ñoqaqa purini.
Derecho ñanpi purichkaq runa hinam
ñoqaqa purini.
21 Kuyawaqniykunamanmi
tupaqnin herencianta qoni.
Qori-qollqewanmi
paykunapa wasintapas huntachini.
22 Tukuy ima rurayta qallarichkaspanqa
Tayta Diosmi hatalliwarqaña.
Rurasqankunatapas manaraq rurachkaspanmi
payqa ñawpaqmantaraq hatalliwarqaña.
23 Wiña-wiñaymantaraqmi ñoqaqa
nombrasqa karqani.
Kay pachapas manaraq unanchasqa kachkaptinmi
ñoqaqa churasqa karqani.
24 Uku-uku lamar qochakunapas
manaraq kachkaptinmi
rikurichisqa karqani.
Achka-achka yakuyoq pukyukunapas
manaraq kachkaptinmi
rikurichisqa karqani.
25 Orqokunapas manaraq takyachisqa kachkaptinmi
rikurichisqa karqani.
Moqokunapas manaraq rikurichkaptinmi
rikurichisqa karqani.
26 Kay pachatapas nitaq chakrakunatapas
Tayta Diosqa manaraqmi unancharqaraqchu.
Kay pachapa ñutu allpankunatapas
Tayta Diosqa manaraqmi unancharqaraqchu.
27 Cielokunatapas manaraq takyachichkaptinqa
chaypiñam karqani.
Uku-uku lamar qochapa muyuriqninta trazaptinqa
chaypiñam karqani.
28 Altokunapi puyukunata takyachiptinqa
chaypiñam karqani.
Kay pachapa uku-uku pukyunkunata
takyachiptinqa chaypiñam karqani.
29 Lindero churasqanmanta
mana pasananpaq lamar qochata kamachiptinqa
chaypiñam karqani.
Kay pachapa cimientonkunata trazaptinqa
chaypiñam karqani.
30 Payta ruraysiq maestro hinam
ñoqaqa karqani.
Paytam sapa punchaw kusichirqani.
Tukuy tiempom
paypa ñawpaqninpi kusikurqani.
31 Paypa unanchasqan kay pachapim
kusikurqani.
Runakunaraykum ñoqaqa
anchata kusikurqani.
32 Chaynaqa churillaykuna,
uyariwaychikyá qamkunaqa.
Mayna kusisqam
yachachisqayman hina kawsakuqkunaqa.
33 Corregisqayta kasukuspayá
yuyayniyoqña kaychik.
Yuyayta ama despreciaspayá
yuyayniyoqña kaychik.
34 Mayna kusisqam corredorniyman
hamuspan suyapayawaqniy runaqa.
35 Cheqap kawsakuytam tarirun
pipas tariwaqniyqa.
Tayta Diospa favornintam tarirun
pipas tariwaqniyqa.
36 Ichaqa ñoqamanta karunchakuq runaqa
kikinpa contranpim huchallikuchkan.
Ichaqa llapallan cheqniwaqniykunaqa
wañuytam munachkan.