Mana yachayniyoq kaypa contranpim kachkan yachayniyoq kayqa
9
Yachaymi wasinta hatarirachin.
Qanchis pilarninkunatam llaqllarachin.
2 Convidopaqmi animalkunata wañurachin.
Vinotapas alistaykuspam mesata mastarachin.
3 Serviqnin sipaskunawanmi
runakunata qayarachimun.
Llaqtapa altonkunamantaraqmi
paykunata qayarachimun:
4 “Pisi experienciayoqkuna,
asuykamuychik” nispa.
Mana ancha yuyayniyoqkunatam nichimun:
5 “Hamuychik mikuy preparasqayta mikunaykichikpaq.
Hamuychik alistasqay vinota tomanaykichikpaq.
6 Manaña pisi experienciayoq kaspayá kawsaychik.
Entiendeq runakuna hinayá
kawsaychik.”
7 Burlakuq runata pipas corregispaqa
despreciachikunqam.
Mana allin ruraq runata pipas qaqchaspaqa
insultachikunqam.
8 Burlakuq runata anyaspaqa
cheqnichikunkim.
Yachayniyoq runata anyaspaqa
kuyachikunkim.
9 Yachayniyoq runata consejaptikiqa
aswan yachayniyoqmi kanqa.
Allin ruraq runata yachachiptikiqa
aswan yachayniyoqmi kanqa.
10 Yachayniyoq kanapaqqa
Tayta Diostam respetana
tukuymanta puntataqa.
Entiendeq kanapaqqa.
Chuya Diostam reqsina
tukuymanta puntataqa.
11 Ñoqaraykum nana-nanaq punchawkunata kawsakunki.
Ñoqaraykum achka-achka watakunata kawsakunki.
12 Ancha yachayniyoq runa kaspaqa
qamllapaqchá yachayniyoq kanki.
Burlakuq runa kaspaykiqa
kikillaykim ñakarinki.
13 Llumpay rimaysapa warmi hinam
sonso kayqa.
Mana imallapas yachaqmi
sonso kayqa.
Pisi experienciayoqmi
sonso kayqa.
14 Chayna warmiqa wasinpa punkunpiraqmi tiyan.
Llaqtapa alton patakunapiraqmá tiyan.
15 Chaypi tiyaykuspanmi qayaypaq-qayan
ñannin pasaqkunata.
Chaypi tiyaykuspanmi qayaypaq-qayan
derecholla pasaqkunata:
16 “Pisi experienciayoqkuna,
asuykamuwaychik”
nispa.
Mana ancha yuyayniyoqkunatam qayan:
17 “Mayna miskillañam suwakuspa tomasqa yakukunaqa.
Mayna miskillañam pakakuspa mikusqa tantakunaqa” nispa.
18 Ichaqa chay qayasqankunaqa manam yachanchu
chaypiqa almakuna tarikusqanta.
Ichaqa chay qayasqankunaqa manam yachanchu
uku pachaman risqankuta.