Pierdekuq warmipa engañakuyninmanta
7
Churilláy,
kasukuyá nisqaykunata.
Sonqoykipiyá churay kamachisqaykunata.
2 Kamachisqaykunata kasukuspaqa
wiñaypaqmi kawsanki.
Ñawi ruruykita hinam
yachachikuyniykunata waqaychanki.
3 Dedoykipi anillota hinayá waqaychay.
Papelpi qellqachkaq hinayá sonqoykipi qellqay.
4 Yachaytayá niy:
“Qamqa paniymi kanki” nispa.
Entiendeytañataq sutichay:
“Aylluymi kanki” nispa.
5 Chaynapim chuchumika warmimanta
librasunki.
Chaynapim llampu rimaq sapaq warmimanta
librasunki.
6 Wasiypa ventananmanta qawarispaymi,
ventanaypa rejillasninmanta qawarispaymi
7 rikurqani pisi experienciayoq mozokunata.
Paykunamantam rikurqani
manaraq yuyayniyoq kaqta.
8 Callentam
warmipa yachanan esquinaman pasarqa.
Chayninta rispanmi
chay warmipa wasinman pasarqa.
9 Inti seqaykuytaña tutaykuchkaptinñataqmi,
astawan tuta chayaramuptinñataqmi
10 paywan tupaqnin huk warmi lloqsimurqa.
Pachapakusqa sacre chuchumika warmim
taripaykamurqa.
11 Payqa rimaysapallaña warmim.
Payqa mana kasukuq warmim.
Wasinpipas mana takyaq warmim.
12 Chay warmiqa callekunapiraqmi wateqachkan.
Chay warmiqa plazakunapiraqmi wateqachkan.
Llapa esquinakunapiraqmi wateqachkan.
13 Chay warmim mozota hapiruspan muchaykurqa.
Mana recelaspantaqmi payta niykurqa:
14 “Tayta Dioswan allin kasqaymantam
ofrenday kapuwachkan.
Prometesqay ofrendakunam
pagasqaña kachkan.
15 Chayraykum qanwan
tupaykuq lloqsimurqani.
Qamta qawaykuyta munaspaymi
tariramunaykama hamurqani.
16 Camaytam sumaq colchakunawan
qataramuni.
Egipto nacionmanta colorniyoq
lino colchawanmi qataramuni.
17 Mirra sutiyoq miski asnaqtam
camaymanpas hinaramuni.
Aloes sutiyoq miski asnaqtam
camaymanpas hinaramuni.
Canela sutiyoq miski asnaqtam
camaymanpas hinaramuni.
18 Rispanchikyá
aminanchikkama kuyanakamusunchik.
19 Manam wasipichu qosayqa.
Karutam illarun payqa.
20 Wayqapi qollqeta apaspanmi pasarqa.
Chawpi killatañam kutimunqa payqa.”
21 Hikutaspanmi mozota convencerachirqa.
Sumaqllaña rimayninwanmi payta pasachirqa.
22 Chayllataqmi mozopas
payta qatirikurqa.
Camalman bueyes richkaq
hinaraqmi pasakurqa.
Toqllaman wichiykuq luwichu
hinaraqmi wichiykurqa.
23 Sonqonta flecha pasarunankamam
wañunanta mana yachakunchu.
Toqllaman urpitu pawaykuq hinataqmi
chay mozopas wañuyman risqanta mana yachakunchu.
24 Chaynaqa uyariykuwaychikyá,
churillaykuna.
Chaynaqa nisqaykunatayá atiendeychik,
churillaykuna.
25 Chay warmipa kawsasqanman hina
kawsaytaqa amayá piensayñachu.
Chay warmipa pantasqanta
hinaqa amayá pantayñachu.
26 Payqa achkaqtañam pantarachispan
heridasqata saqerun.
Nana-nanaq runakunatañam
wañusqata saqerun.
27 Wasinman riq ñanqa
wañuqkunapa kasqanmanmi richkan.
Wasinman riq ñanqa
wañuqkunapa kasqanmanmi chayachkan.