Mana reqsisqa runamanqa mana garantizanamanta
6
Churilláy,
runamasikita garantizaspaykiqa,
mana reqsisqayki runata garantizaspaykiqa
2 rimasqaykiwanmi toqllaman hina
wichiykunki.
Rimasqaykiwanmi preso hina
hapirachikunki.
3 Chayna kaptinqa churilláy,
runapa makinpiña kasqaykiraykuyá
kaynata ruray.
Librakunaykipaqyá
kaynata ruray:
Humillakuspaykiyá amistadnikita chaylla ruegakamuy.
4 Chaynaqa amayá puñuywan hapichikuychu.
Chaynaqa amayá ratollapas puñuruychu.
5 Hapiq runamanta lluptichkaq luwichu
hinayá lluptikuy.
Pawaq animalta toqllawan hapiqmanta
hinayá ayqekuy.
Qellakuna anyanapaq yachachikuymanta
6 Yaw qella runa,
yachayniyoq kanaykipaqyá
sisita qawamuy.
Yaw qella runa,
yuyayniyoq kanaykipaqyá
imaynam kawsasqanta qawamuy.
7 Sisipaqa jefenpas manam kanchu.
Sisipaqa capatazninpas manam kanchu.
Sisitaqa manam pipas kamachinchu.
8 Chaywanpas payqa rutuy tiempopim
mikuyninta segurakun.
Chaywanpas cosecha tiempopim
mikunanta huñukun.
9 Yaw qella runa
¡ima horakamataq qamqa puñunki!
Yaw qella runa
¡ima horañataq qamqa hatarinki!
10 Puñuywan hapichikuspa
puñunaykikamam,
makikikunatapas chupqaruspa samanaykikamam
11 yanqa purikuq runa suwarususpayki
wakchayarachisunki.
Salteaq runam mana imayoqta rikurirachisunki.
Mana allin ruraqkunapa imaynam kasqanmanta
12 Mana penqakuq runaqa
llullakunata willakachakustinmi purin.
Mana allin runaqa
llullakunata willakachakustinmi purin.
13 Chay runaqa ñawinkunatam
qemchityachin engañananpaq.
Chay runaqa chakinkunawanmi
señaschan engañananpaq.
Chay runaqa dedonkunawanmi
tupqen engañananpaq.
14 Mana allinllatam
tukuy tiempopi piensachkan.
Mana allinllatam
tukuy tiempopi yuyaymanachkan.
Tukuy tiempopim
runakunata peleanachichkan.
15 Chayraykum qonqaymanta
desgraciapi rikurirunqa.
Huk ñawi qemchiyllapim
pasaypaqtaña puchukarunqa.
Tayta Diospa millakusqankunamanta
16 Soqta huchakunatam cheqnin Tayta Diosqa,
qanchis kaqtaqa pasaypaqtam millakun payqa:
17 Cheqninmi hatun tukuq runata.
Cheqninmi llulla rimaq runata.
Cheqninmi inocente runa wañuchiqta.
18 Cheqninmi mana allinkunata
rurananpaq yuyaymanaqta.
Cheqninmi mana allinta ruramunanpaq
chaylla kallpaqta.
19 Cheqninmi llullakuna rimaq testigota.
Millakunmi wawqentinpuralla peleanachiqta.
Hukwan pierdekuy huchamanta
20 Churilláy,
kasukuyá
taytaykipa kamachisusqaykitaqa.
Churilláy,
amayá qonqaychu
mamaykipa yachachisusqaykitaqa.
21 Qasqoykipi adornota hinayá
mana qonqaspa apaykachay.
Kunkaykipi mana qonqaspa
collarta hinayá apaykachay.
22 Chaykunam puriptikipas pusasunki.
Chaykunam puñuruptikipas harkasunki.
Chaykunam rikchariptikipas rimapayasunki.
23 Taytaykipa kamachisusqaykiqa mechero hinam.
Mamaykipa yachachisusqaykiqa achkiy hinam.
Taytaykipa anyakuyninqa
wiñay kawsayman pusasuqnikim.
Taytaykipa corregisusqaykiqa
wiñay kawsayman pusasuqnikim.
24 Chay nisusqaykikunam
chuchumika warmimanta waqaychasunki.
Sapaq warmipa alabasunaykimantam harkasunki.
25 Buenamoza kaynintaqa
amayá sonqoykipi munapayaychu.
Sumaqllaña ñawinkunaqa
amayá sonqoykita suwachunchu.
26 Chuchumika warmiraykum qariqa rikurirun
huk millpuy tanta hinallaña.
Hukwan pierdekuq warmiñataqmi hapichkan
chay qaripa llumpay precioyoq vidantaña.
27 Pipas marqayninpi ninata apaspanqa
pachantam kañarachikun.
28 Pipas sansa hawanpi purispanqa
chakintam ruparachikun.
29 Chaynam kanqa
runamasinpa warminwan kakuq runaqa.
Manam lluptinmanchu
castigasqa kananmantaqa.
30 Manam pipas desprecianchu
wakcha runa suwakuruptinqa.
Manamá pipas desprecianchu
yarqaymanta suwakuruptinqa.
31 Chaywanpas hapirachikuspanqa
qanchis kuti mastam pagapunqa.
Chaywanpas hapirachikuspanqa
wasinpi lliw kapuqninwanmi pagapunqa.
32 Hukpa warminwan huchallikuq runaqa
mana yuyayniyoq runam.
Hukpa warminwan huchallikuq runaqa
kikillan wañuchikuq runam.
33 Chayna runaqa maqachikuspanmi
tukuyta nichikunqa.
Manam pipas qonqanqachu
penqaypi kasqantaqa.
34 Celoso kayninmi runapa piñakuyninqa.
Manam hawkayanqachu
vengakunan punchawpiqa.
35 Manam chaskinqachu imataña pagaptinpas.
Manam pampachanqachu
achkallaña regalokunata qoptinpas.