Chuchumika warmimanta waqaychakunapaq
5
Churilláy,
uyariy yachaywan nisqaykunata.
Churilláy,
atiendey entendimientowan nisqaykunata
2 chaynapi allin kaqkunata akllanaykipaq,
chaynapi yachaywan rimanaykipaq.
3 Miel hina miskillañam
chuchumika warmipa rimayninqa.
Aceitemantapas aswan llampuraqmi
chuchumika warmipa rimayninqa.
4 Chaywanpas rurayninqa
ajenjopa qatqen hinaraqmi llakichikun.
Iskay filoyoq espadapa filonmantapas
aswanraqmi kuchukun.
5 Chay warmiqa wañuymanmi richkan.
Payqa wañuqkunapa kasqanmanmi richkan.
6 Chayna warmiqa wiñay kawsaytapas
manam maskanchu.
Pantaypi kawsasqantapas
manam cuentata qokunchu.
7 Churillaykuna,
chaynaqa uyariwaychikyá nisqaykunata.
Churillaykuna,
amayá rakikuychikchu nisqaykunamanta.
8 Karunchakuyá chay warmiman riq ñanmantaqa.
Amayá asuykuychu paypa wasinpa punkunmanqa.
9 Mana chayqa kallpaykitam qowaq hukkunaman.
Mana chayqa vidaykitam qowaq hukkunaman.
10 Mana chayqa mana reqsisqayki runakunam
imaykikunawanpas saksarunmanku.
Mana chayqa llamkasqaykipa ruruntam
mana reqsisqaykipa wasinpi saksarunmanku.
11 Chayna kaptinqa cuerpoyki tukunayaptinmi
qepataña waqawaq.
Chayna kaptinqa aychayki tukunayaptinmi
qepataña waqawaq.
12 Yanqataq niwaq:
“Yanqam aburrikurqani corregiwaptinku.
Manam tukuy sonqoywanchu
chaskirqani anyawaptinku.
13 Yachachiwaqniykunapa niwasqantapas
manam kasukurqanichu.
Maestroykunapa niwasqantapas
manam uyarikurqanichu.
14 Yaqallamya tukuy desgraciapi rikuriruni.
Llaqtamasiykunapa qayllanpim
yaqalla tukuy desgraciapi rikuriruni.”
15 Yakunayasuptikiqa kikikipa
pozoykimantayá tomay.
Pozoykimanta pullpumuq
yakutayá tomay.
16 Pukyuykipi yakuqa
amayá callekunaman usuchunchu.
Kallpaq yakuykipas
amataqyá plazakunamanqa usuchunchu.
17 Qamllapaqyá kachun pozoykipi yakuqa.
Amayá qoychu mana reqsisqayki runakunamanqa.
18 Kapusuqniki pukyuyki hina warmikiqa
Diospa bendecisqanyá kachun.
Mozo kasparaq kasarasqayki warmikiwanyá
sonqoykiqa contentakuchun.
19 Payqa kachun kuyayllapaq
luwichu hinayá.
Payqa kachun kuyayllapaq
monte cabra hinayá.
Paypa ñuñullanwayá
tukuy tiempopi contentakuy.
Paypa kuyakuynillanwanyá tukuy
tiempopi wañurinaykikama contentakuy.
20 Churilláy ¿imapaqtaq mana reqsisqayki warmiwanqa kusikuwaq?
Churilláy ¿imapaqtaq runapa warmintaqa abrazawaq?
21 Runapa vidantaqa Tayta Diosmi sumaqta yachan.
Paykunapa kawsasqantapas paymi qawarayan.
22 Mana allin ruraq runataqa
mana allin rurasqanmi presocharun.
Mana allin ruraq runaqa
waskawan chaqnasqa hinam
huchankunawan rikurirun.
23 Mana corregikusqanraykum wañurunqa.
Loco hina rurasqanraykum pantarunqa.