Allinta kawsanapaq yachachikuykunamanta
4
Churikuna,
uyariychikyá taytaykichikpa
corregisusqaykichikta.
Allin entiendeq kanaykichikpaqyá
uyariychik sumaqta.
2 Ñoqaqa allintam yachachirqaykichik
qamkunataqa.
Amamá qonqarunkichikchu
yachachikuyniykunataqa.
3 Ñoqapas taytaypa churin wawallaraq kaptiymi,
ñoqapas mamaypa sapallan wawan kaptiymi
4 taytay yachachiwaspan niwaq kaynata:
“Sonqoykipi hatalliy nisqaykunata,
hinaspayá kamachikuyniykunata kasukuy,
hinaspayá wiñaypaq kawsakuy.
5 Astawanqa maskay yuyayniyoq kaytayá.
Astawanqa maskay entiendeq kaytayá.
Amayá qonqaychu nisqaykunata.
Amayá rakikuychu nisqaykunamanta.
6 Yachayta mana saqeptikiqa
paymi waqaychasunki.
Chayta kuyaptikiqa
paymi cuidasunki.
7 Imamantapas puntataqa
yachaytayá maskay.
Imakuna maskanaykimantapas
entiendeq kayta maskay.
8 Yachayta hatunchaptikiqa
qamtam paypas hatunchasunki.
Yachayta hatalliptikiqa
paypas reqsisqatam rurasunki.
9 Umaykimanmi sumaq adornota churanqa.
Umaykimanmi sumaq coronata churanqa.”
10 Churilláy,
uyarispayá hatalliy nisqaykunata.
Hatalliptikiqa masyachinqakum wataykikunata.
11 Yachayniyoq runakunapa kawsasqanman hinam
yachachisqayki.
Diospa munasqanman hinam purichisqayki.
12 Chaynata kawsaspaqa
manam sasachakuypichu kanki.
Chaynata kawsaspaqa
mana mitkaqmi kanki.
13 Ama despreciaspayá
chaskiypuni corregisusqaykitaqa.
Kawsakunkim corregisusqaykita kasukuspaqa.
14 Amayá kawsaychu mana allin
ruraqkunapa kawsasqanman hinaqa.
Amayá kawsaychu mana allin runakunapa
kawsasqanman hinaqa.
15 Paykunapa kawsasqanmanta
karunchakuspayá
ama chaynataqa kawsaychu.
Paykunamanta rakikuruspaykiyá
paykunawanqa ama riychu.
16 Paykunaqa mana allinta
mana ruraspaqa manam puñunkuchu.
Pitapas mana allinman
mana urmaykachispankuqa
manam puñuytapas tarinkuchu.
17 Tanta mikuchkaq hinam
mana allinta ruranku.
Vino upyachkaq hinataqmi
daño rurayllapi kawsanku.
18 Allin ruraqkunapa vidanqa
chayraq achikyamuchkaq hinam.
Inti qespiramuspan
aswan-aswan punchawyaruq hinam.
19 Mana allin ruraqkunapa purisqanqa
tutayay hinam.
Imapipas mitkanankuta
mana yachaqkuna hinam.
20 Churilláy,
uyariy nisqaykunata.
Churilláy,
atiendey palabraykunata.
21 Tukuy tiempopiyá yuyay.
Sonqoykipiyá waqaychay.
22 Maskaqninkunatam palabrayqa kawsachin.
Tukuy cuerpontam hampi hina sanoyachin.
23 Piensasqaykikunatayá cuiday
tukuy ima cuidasqaykimantapas mastaqa.
Chay piensasqaykikunam
kawsachisunki qamtaqa.
24 Engañanaykipaqqa amayá yanqakunata rimaychu.
Pantachinaykipaqqa amayá llullata niychu.
25 Qamqa puntamanyá qaway.
Qamqa ñawpaqllamanyá qaway.
26 Cuidadowanyá puriy
maymi sarusqaykita qawaspayki.
Chaynata ruraspaykiqa
segurom kawsakunki.
27 Allin ñanmantaqa amayá muyuruychu.
Mana allinkuna ruraymanqa amayá riychu.