Yuyayniyoq kanapaq imaynam ruranamanta
3
Churilláy,
amayá qonqaychu yachachikuyniykunata.
Churilláy,
sonqoykipiyá waqaychay kamachikuyniykunata
2 hinaptinqa unay watakunam kawsakunki,
hinaptinqa hawkallañam kawsakunki.
3 Ama qonqaspamá kuyapayakuq kanki.
Ama qonqaspamá cheqapllata rimanki.
Chaykunataqa kunkaykimanyá
collarta hina wallqakuruy.
Chaykunataqa tablapi qellqachkaq hinayá
sonqoykipi qellqaruy.
4 Hinaptinqa Diospa chaynataq runakunapa
favorecesqanmi kanki.
Hinaptinqa Diospa chaynataq runakunapa
reqsisqanmi kanki.
5 Tayta Diosllapiyá confiakuy
tukuy sonqoykiwanqa.
Amayá confiakuychu kikikipa
entiendesqallaykipiqa.
6 Tukuy kawsasqaykipiyá
yuyariy Tayta Diosta.
Paymi munasqanman hina
kawsachisunki qamta.
7 Amayá ancha yuyayniyoq
kasqaykipaqchu hapikuy.
Tayta Diosta respetaspaykiyá
mana allinmanta asurikuy.
8 Chaynata ruraptikiqa cuerpoykipas
hampisqaraqmi kanqa.
Chaynata ruraptikiqa cuerpoykipas
kallpanchasqaraqmi kanqa.
9 Tayta Diosta alabay
tukuy kapuqnikikunawan.
Tayta Diosta alabay
llapallan kawsaynikipa punta kaq rurunkunawan.
10 Hinaptinqa kawsaykuna taqenaykipas
astawanmi huntarinqa.
Hinaptinqa uvas sarunayki
uvaspa zumonwanmi llimparinqa.
11 Churilláy,
amayá despreciaychu
Tayta Diospa castigontaqa.
Churilláy,
amayá hukmanyaychu
Tayta Diospa anyasusqaykiwanqa.
12 Tayta Diosqa kuyasqan runatam corregin.
Taytapas kuyasqan churinta castigachkaq hinam
payqa corregin.
13 ¡Mayna kusisqam yachayta tariq runaqa!
¡Mayna kusisqam allin entiendeq runaqa!
14 Yachay chaskisqanmi mastaqa
valen qollqemantapas.
Entiendeq kayninmi mastaqa
valen qorimantapas.
15 Coral alhaja rumimantapas
mastaraqmi valen yachayniyoq kayqa.
Kuyayllapaq kaq tukuy imapas
manam igualanchu yachayniyoq kaymanqa.
16 Yachayqa alleq makinwanmi
unay kawsakuyta qosunki.
Yachayqa ichoq makinwanmi apuyachisuspayki
reqsisqata rurasunki.
17 Yachaypa yachachisqanwanqa
runapas kusisqam kawsakunqa.
Yachaypa yachachisqanwanqa
runapas hawkallam kawsakunqa.
18 Yachayqa kawsay qokuq sacha hinam hatalliqninkunapaq.
Yachayqa kusikuy qokuqmi hapiqnin runakunapaq.
19 Tayta Diosqa chay yachaywanmi
kay pachata cimientarqa.
Tayta Diosqa chay entiendeywanmi
cielokunatapas takyachirqa.
20 Yachayninwanmi toqyachimurqa
uku-uku lamar qochata.
Yachayninwanmi sullatapas
sullachimurqa puyukunamanta.
21 Churilláy,
allin kanaykipaq yachayniyoq kaytaqa
amayá qonqaychu.
Yachaywan allin kaqkuna akllaytaqa
amayá qonqaychu.
22 Chaykunaqa qamtam kawsachisunki.
Chaykunaqa kunkaykipi collar hinam adornasunki.
23 Chaynaqa segurom purikunki ñannikipipas.
Chaynaqa manam mitkanqachu chakikipas.
24 Siriykuspapas mana manchakuspam puñunki.
Siriykuspapas miskillatañam puñukunki.
25 Qonqaymanta hamuq mancharikuypaq
kaqkunamantaqa manam manchakunkichu.
Mana allin runakunaman
hamuq desgraciamantapas
manataqmi manchakunkichu.
26 Tayta Diosmi kanqa
anchallataña confiakunaykiqa.
Toqllawan hapisqa kanaykimantapas
paymi waqaychasunkiqa.
27 Ama recelaspayá qoykuy mañakusuqnikimanqa.
Qoykuypuniyá qoykunaykipaq kachkaptinqa.
28 Kunan qonaykipaq kachkaptinqa
amayá dejaychu paqarin punchawpaqqa.
29 Runamasiki qampi confiakuchkaptinqa
amayá contranpiqa tanteaychu mana allintaqa.
30 Yanqamantaqa amayá piwanpas churanakuychu.
Mana ofiendesuchkaptikiqa amayá churanakuychu.
31 Daño ruraq runamantaqa amayá envidiakuychu.
Amayá paypa kawsasqanman hinaqa kawsaychu.
32 Malvado runataqa Tayta Diosqa millakunmi.
Ichaqa munasqanman hina ruraqkunapiqa confiakunmi.
33 Tayta Diosqa ñakanmi
mana allin ruraqpa wasinta.
Tayta Diosqa bendecinmi
allin ruraqkunapa yachanantaqa.
34 Burlakuqkunataqa paypas burlakunmi.
Humildekunataqa paypas favorecenmi.
35 Yachayniyoq runakunaqa
herencia chaskichkaq hinam allin
reqsisqa kanqaku.
Mana yachayniyoqkunañataqmi
penqayman churasqa kanqaku.