Yachayniyoq kayqa runakunapa allinninpaqmi
2
Churilláy,
palabraykunatayá chaskiykuy.
Kamachisqaykunatayá sonqoykipi churaykuy.
2 Churilláy,
yachaytayá uyarispa atiendey.
Churilláy,
entiendenaykipaqyá piensay.
3 Entiendeq kanaykipaqyá qayakuy.
Cuenta qokuq kanaykipaqyá qayakuy.
4 Qollqeta hinayá maskay.
Pakasqata hinayá maskay.
5 Hinaspaqa entiendenkim
Tayta Dios respetayta.
Hinaspaqa tarinkitaqmi
Diospa yachayninta.
6 Tayta Diosmi yuyay qokuqqa.
Paymi palabranwan yachay qokuqqa.
Paytaqmi rimasqanwan entiendechikuqqa.
7 Diosqa munasqanman hina ruraqkunamanmi
allin kanankupaq yuyayta qoykun.
Payqa mana culpayoq kawsaqkunatam
imamantapas harkaykun.
8 Diosqa reglamenton kasukuqkunatam cuidan.
Diosqa paypi sonqoyoqkunatam waqaychan.
9 Chaynaqa entiendenkim allin rurayta.
Chaynaqa entiendenkim reglamenton kasukuyta.
Entiendenkitaqmi
Diospa munasqanman hina ruraytapas.
Entiendenkitaqmi
tukuy allinman hina kawsaytapas.
10 Yuyaymi sonqoykiman huntarinqa.
Yachaymi vidaykita kusichinqa.
11 Yuyaymanaspam cuidakunki.
Allinta entiendespam waqaychakunki.
12 Chaynapim mana allin
kawsaymanta librakunki.
Mana allin rimaqkunamantam librakunki.
13 Chayna runakunaqa
manam Diospa munasqanman hinañachu
kawsachkankupas.
Chayna runakunaqa
tutayay ñanpi purichkaq hinam
kawsachkankupas.
14 Paykunaqa kusikunkuraqmi
mana allin rurasqankumantapas.
Anchataraqmi kusikunku
mana allin ruraykunamantapas.
15 Qewi-qewi ñankunapi purichkaq
hinam pantarunku.
Mana allinta kawsaspam pantarunku.
16 Yachayniyoq kaspaqa librakunkim
mana reqsisqayki mana allin warmimanta.
Yachayniyoq kaspaqa librakunkim
alabasuqniki pierdekuq warmimanta.
17 Chayna warmiqa
sipas kaptinraq casaraqnin qosantapas saqerunmi.
Chayna warmiqa
Dioswan contrato rurasqantapas qonqarunmi.
18 Chay warmipa wasinman riq ñanninta pipas rispaqa
wañuymanmi richkan.
Paypa wasinman riq ñanninta pipas rispaqa
wañusqakunapa kasqanmanmi richkan.
19 Chay warmiman llapallan yaykuqkunaqa
manam kutimunñachu.
Chay warmiman llapallan yaykuqkunaqa
manam wiñay kawsaymanqa rinqañachu.
20 Chaynaqa allin ñanta richkaq
hinayá kawsay.
Chaynaqa allin ruraqkunapa kawsasqanta
hinayá kawsay.
21 Diospa munasqanman hina kawsaqkunaqa
kay pachapim yachanqaku.
Mana culpayoq kaq runakunaqa
kay pachapim hinalla takyanqaku.
22 Mana allin ruraqkunam ichaqa
kay pachamanta chinkachisqa kanqaku.
Traicionaqkunam ichaqa qora pilarusqa
hina kay pachamanta qechusqa kanqaku.