Unanchasqankunam Tayta Diosta alaban
¡Aleluya!
148
Hanaq pachapi kaqkuna
¡Tayta Diostayá alabaychik!
Altokunapi kaqkuna
¡Tayta Diostayá alabaychik!
2 Llapallan angelninkuna
¡paytayá alabaychik!
Llapallan tropankuna
¡paytayá alabaychik!
3 Inti,
killa
¡Tayta Diostayá alabaychik!
Kanchariq lucerokuna
¡llapallaykichikyá alabaychik!
4 Cielokunapa hawanpi cielokuna
¡paytayá alabaychik!
Cielokunapa hawanpi yakukuna
¡paytayá alabaychik!
5 ¡Tayta Diostayá
alabaychik qamkunaqa!
Pay kamachiptinmi
unanchasqa karqa chaskakunaqa.
6 Paymi chaykunata
wiña-wiñaypaq takyachirqa.
Paymi mana cambiana
decretota kamachirqa.
7 Kay pachapi kaqkuna
¡Tayta Diosta alabaychik!
Lamar qochapi manchakuypaq animalkuna
¡payta alabaychik!
8 Llipyawan runtu-parapas
¡paytayá alabaychik!
Lastawan puyukunapas
¡paytayá alabaychik!
Kamachisqan ruraq wayra-parapas
¡paytayá alabaychik!
9 Orqokunawan llapallan moqokunapas
¡paytayá alabaychik!
Ruruq sachakunawan
llapallan cedro sachakunapas
¡paytayá alabaychik!
10 Monte animalkunawan
llapallan uywa animalkunapas
¡paytayá alabaychik!
Taksa animalkunawan
pawaq animalkunapas
¡paytayá alabaychik!
11 Kay pachapi reykunawan
llapallan nacionkunapas
¡paytayá alabaychik!
Kay pachapi
kamachikuqkunawan
llapallan cabecillakunapas
¡paytayá alabaychik!
12 Mozokunawan
doncellakunapas
¡paytayá alabaychik!
Yuyaqkunawan
warmakunapas
¡paytayá alabaychik!
13 Tayta Dioslla alto-altopi kasqanraykuyá
¡payta alabaychik!
Cielokunapa hawanpi kasqanraykuyá
¡payta alabaychik!
Kanchariyninqa kay pachapa hawanpi kasqanraykuyá
¡payta alabaychik!
14 Paymi runankunaman
atiyniyoq reyta qorqa.
Chay reyqa
llapallan payman sonqo runakunapa
alabasqanmi kanqa.
Chay reyqa
hichpanpi kaq Israelpa mirayninkunapa
alabasqanmi kanqa.
¡Aleluya!