Rey kasqanraykuyá Tayta Diosta alabaychik.
¡Aleluya!
149
Tayta Diosmanyá
Mosoq takita takiychik.
Payman sonqo runakuna,
huñunakuyninpiyá alabaychik.
2 Israel castakuna,
unanchasuqnikichikraykuyá
kusikuychik.
Sion llaqtapi yachaqkuna,
reynikichikraykuyá
kusikuychik.
3 Kusikuymanta tususpa
payta alabaychik.
Tinyawan,
arpawan
payman takiychik.
4 Paymi runankunapi
kusikun.
Paymi humildekunata
vencechispan hatunchaykun.
5 Payman sonqo runakuna,
chayna vencesqaykichikmantayá kusikuychik.
Camaykichikpi kachkaspapas
qaparispayá takiychik.
6 Simikichikwanyá Diosta
alabaychik.
Iskay filoyoq espadatayá
hapiychik.
7 Nacionkunata vengakunaykichikpaqyá
hapiychik.
Runakunata castiganaykichikpaqyá
hapiychik.
8 Reyninkutapas cadenakunawan
watanaykichikpaqyá hapiychik.
Reqsisqa runakunatapas
fierromanta cadenakunawan
watanaykichikpaqyá hapiychik.
9 Chaynapim qellqasqa sentenciata
paykunapi rurankichik.
Payman sonqo runakunapaqmi
adorana hina kanqa vencesqaykichik.
¡Aleluya!