Jerusalen llaqtata favorecesqanrayku Diosta alabasqan
147
¡Tayta Diosta yupaychaychik!
¡Mayna allinmi alabaspa
Diosninchikman takiyqa!
¡Mayna miskillañam
pay alabayqa!
Paypaq hinam chayna alabayqa.
2 Tayta Diosmi kaqllamanta
hatarichin Jerusalen llaqtata.
Paymi huñumun
Israel casta wischusqakunata.
3 Payqa llakisqa
sonqoyoqkunatapas consuelaykunmi.
Payqa heridankunatapas
hampiykunmi.
4 Payqa lucerokunatapas
yupaspam churarqa.
Chaynataqmi sapakamata
sutichan payqa.
5 Señorninchikqa hatunmi.
Payqa sinchi atiyniyoqmi.
Yachayninpas mana entiendey atinaraqmi.
6 Tayta Diosmi
humildekunata hoqarin.
Mana allin
ruraqkunatam ichaqa
pasaypaqta humillachin.
7 Tayta Diosmanyá
graciasta qospa
takiychik.
Diosninchikmanyá
alabaspa
arpawan takiychik.
8 Paymi puyukunawan
taparun cielokunata.
Paymi allpapaq
preparan parata.
Paymi wiñachin
orqokunapi pastokunata.
9 Paymi animalkunata mikuchin.
Ullachkuchakuna waqaptinmi mikuchin.
10 Caballokunapa kallpanwanpas
manam kusikunchu.
Runapa utqayman kallpasqanwanpas
manam contentakunchu.
11 Tayta Diosqa
kusikunmi respetaqninkunapi.
Payqa kusikunmi
kuyapayakuyninpi confiakuqkunapi.
12 Jerusalen llaqta,
Tayta Diosta alabay.
Sion Moqopi llaqta,
Diosnikita alabay.
13 Qampa punkuykikunapa
cerrojontam takyachin.
Qampi yachaq runakunatam bendecin.
14 Ukuykipi yachaqkunatam
hawkayachin.
Allinnin trigowanmi
saksaykachin.
15 Paymi kay pachaman
palabranta apachimun.
Chaymi chaylla
palabranqa cheqerun.
16 Paymi lastata
millwata hina chayachimun.
Paymi qasata
uchpata hina rikurichimun.
17 Runtuta hinam
parachimun chikchita.
¿Pitaq aguantanman
chay chirinta?
18 Rimaspa kamachiptinmi
ritipas chullurun.
Qoñi wayrawan
pukurachiptinmi
yakukunapas puririrun.
19 Jacobpa castankunamanmi
palabrankunata willarqa.
Israelpa castankunamanmi
decretonkunatapas willarqa.
Paykunamanmi
reglamentontapas willarqa.
20 Manam chaynatachu
rurarqa wakin nacionkunawanqa.
Chay nacionkunaqa
manam yacharqachu reglamentonkunataqa.
¡Aleluya!