Libraqninchikta alabasun
¡Aleluya!
146
Tukuy sonqoywanmi
Tayta Diosta alabasaq.
2 Kawsanaykamam
Tayta Diosta alabasaq.
Kawsanaykamam
takispa Diosniyta alabasaq.
3 Kamachikuqkunapiqa
amayá confiakuychikchu.
Runallapiqa
amayá confiakuychikchu.
Paykunaqa manam
salvawachwanchikchu.
4 Paykunaqa
wañuruspankum allpayarun.
Chay punchawllapitaqmi
tanteasqankupas chinkarun.
5 ¡Mayna kusisqam
Jacobpa Diosninpa
yanapasqan runaqa!
¡Mayna kusisqam
yupaychasqan Tayta Diospi
confiakuspa suyaqqa!
6 Paymi cielokunatapas
kay pachatapas rurarqa.
Paymi lamar qochatapas,
chaypi tukuy kaqkunatapas rurarqa.
7 Ñakarichisqakunapaqpas
allin arreglotam ruran payqa.
Yarqaymanta kaqkunamanpas
mikuykachinmi payqa.
Tayta Diosqa
libraykunmi presokunatapas.
8 Tayta Diosqa
qawariykachinmi ñawsakunatapas.
Tayta Diosqa
hatariykachinmi urmasqakunatapas.
Tayta Diosqa
kuyanmi allin ruraqkunatapas.
9 Tayta Diosqa
waqaychanmi forasterokunata.
Payqa mantienenmi
mana tayta-mamayoqkunata.
Payqa mantienentaqmi
viudakunatapas.
Chaqwarachintaqmi
mana allin ruraqkunapa vidantapas.
10 Sion llaqta,
Tayta Diosmi
wiñaypaq gobiernanqa.
Diosnikiqa
wiña-wiñaypaqmi
gobiernanqa.
¡Aleluya!