Diospa allin sonqo kasqanmanta alabanapaq taki
Davidpa alabasqan
145
Reylláy,
Dioslláy,
ñoqaqa qamtam
hatunchasqayki.
Wiña-wiñaypaqmi
alabasqayki.
2 Sapa punchawmi
alabasqayki.
Wiña-wiñaypaqmi
alabasqayki.
3 Tayta Diosqa
ancha hatunmi.
Payqa sinchi
alabanapaqmi.
Hatun kayninpas
mana entiendey atinaraqmi.
4 Tayta-mamakunam
lliw mirayninta
rurasqaykimanta alabanqaku.
Paykunam atiynikiwan
rurasqaykikunamanta
willakunqaku.
5 Rimanqakum allin reqsisqa
munaychakuq kasqaykimanta.
Ñoqañataqmi yuyaymanasaq
admirakuypaq rurasqaykimanta.
6 Rimanqakum manchakuypaq atiywan
rurasqaykikunamanta.
Ñoqañataqmi willakusaq
hatun kaynikimanta.
7 Allin sonqoyoqllaña kasqaykimantam
yuyarispa willakunqaku.
Allin ruraq kasqaykimantam
qaparispa takinqaku.
8 Tayta Diosqa kuyapayakuqmi.
Tayta Diosqa llakipayakuqmi.
Payqa mana chaylla piñakuruqmi.
Payqa ancha kuyakuq sonqoyoqmi.
9 Tayta Diosqa
ancha allinmi llapallanpaqpas.
Llakipayarikunmi
llapallan rurasqankunamantapas.
10 Dios Taytalláy,
llapallan unanchasqaykikunayá
graciasta qosunki.
Qanman sonqo runakunayá
alabasunki.
11 Gobiernoykipa
ancha reqsisqa
kasqanmantayá rimachunku.
Sinchi atiywan
rurasqaykimantayá rimachunku,
12 chaynapi sinchi atiywan rurasqaykimanta
runakunaman yachachinankupaq,
chaynapi allin reqsisqa
sumaq gobiernoykimanta yachachinankupaq.
13 Qampa gobiernoykiqa
wiña-wiñaypaqmi.
Munaychakuynikipas
wiñaymanta-wiñaykamataqmi.
Tayta Diosqa
cumplinmi prometesqankunatapas.
Tayta Diosqa
kuyapayarikunmi rurasqankunamantapas.
14 Tayta Diosmi takyachin
llapallan wichiqkunata.
Paytaqmi hoqarin
wichisqakunata.
15 Llapallaykum qamllamanta suyaniku.
Tiempollanpim mikunaykuta qowankiku.
16 Makillaykita kicharispam
llapallan kawsaqkunata saksaykachinki.
Qamqa munasqankuwanmi
llapallan kawsaqkunata saksaykachinki.
17 Tayta Diosqa tukuy rurasqankunapipas
allin ruraqmi.
Payqa llapallan rurasqankunapipas
kuyapayakuqmi.
18 Tayta Diosqa llapallan qayakuqninkunapa
hichpallanpim kachkan.
Confianzawan llapallan qayakuqninkunapa
hichpallanpim kachkan.
19 Respetaqninkunapa
munasqantam ruraykun.
Qayakuptinkum
uyariykuspa salvaykun.
20 Tayta Diosqa waqaychanmi
llapallan kuyaqninkunata.
Payqa chinkachinmi
llapallan mana allin ruraqkunata.
21 Tayta Diostayá
simillayqa alabachun.
Chuya kasqanmantayá
llapallanchikpa alabasqan kachun.
Wiña-wiñaypaqyá
alabasqa kachun.