Diosman graciasta Rey qosqanmanta
Diosman Davidpa takisqan
144
Alabasqayá kachun Tayta Diosqa.
Amparakunay rumi hinam payqa.
Paymi makillaykunata
yachachin peleanaypaq.
Paymi dedollaykunata
yachachin guerrapaq.
2 Paymi ñoqallayta kuyapayariwaqniyqa.
Paymi wasi hina amparaykuwaqniyqa.
Paymi alto sitiopi hina pakakunayqa.
Paymi ñoqallayta lluptichiqniyqa.
Paymi harkachikuna armayqa.
Paymi ñoqallayta amparaykuqniyqa.
Paymi runaykunapi gobiernachiwaqniyqa.
3 Dios Taytalláy,
¿pitaq runaqa
paypi piensanaykipaq?
¿Pitaq runaqa
payta nanachikunaykipaq?
4 Runaqa chinkaruq
waspiy hinallam.
Watankunapas chinkaruq
llantuy hinallam.
5 Dios Taytalláy,
cieloykikunata kichaykuspayá uraykamuy.
Qosnirinanpaqyá orqokunata llachpaykamuy.
6 Llipyachimuspayá
enemigoykikunata cheqerachiy.
Flechata hina
llipyachimuspayá chaqwarachiy.
7 Altomanta makikita haywariykamuspayá
atiynikiwan libraykullaway.
Lloqllamanta horqochkaq hinayá
huklaw nacion runakunamanta libraykullaway.
8 Yanqa rimaqkunamanta librallaway.
Engañowan juramentaqkunamanta librallaway.
9 Diosnilláy,
qanmanmi mosoq takita
takimusqayki.
Chunka cuerdayoq arpawanmi
takimusqayki.
10 Reykuna vencechiq kasqaykiraykum
takimusqayki.
Kay serviqniki Davidta
librawasqaykiraykum takimusqayki.
Guerrapi wañunaymanta
librawasqaykiraykum takimusqayki.
11 Yanapawaspayá
huklaw nacion runakunamanta
librallaway.
Yanqa rimaqkunamanta
librallaway.
Engañowan juramentaqkunamanta
librallaway.
12 Qari churiykupas mozo kayninpiyá
plantakuna wiñaq hina kachunku.
Warmi churiykupas
palaciopi labrasqa pilar hinayá kachunku.
13 Taqeykupas tukuy rikchaq
kawsaykunawanyá huntasqa kachun.
Animalniykupas waranqanpiyá mirachun.
Wara-waranqanpiyá allpaykupi mirachun.
14 Uywaykupas llasaq
carga apaqyá kachun.
Amayá kachunchu
ñoqaykupaq sasachakuyqa.
Amayá presochasqachu
kasaqku ñoqaykuqa.
Guerrapaq qapariypas
amayá kachunchu plazaykupiqa.
15 ¡Mayna kusisqam
chaykunapa pasasqan runakunaqa!
¡Mayna kusisqam
Tayta Dios yupaychaq runakunaqa!