Qamllapim confiakuni.
Diosman Davidpa takisqan
143
Dios Taytalláy,
mañakullasqaytayá uyarikuy.
Ruegakullasqaytayá uyariykuy.
Confiakuna kasqaykiraykuyá
contestaykamullaway.
Allin ruraq kasqaykiraykuyá
contestaykamullaway.
2 Amayá juzgadomanqa
qaykuwaychu kay serviqnikitaqa.
Lliwmi huchallikuqlla
qayllaykipiqa.
3 Enemigoymi ñakarichiwan.
Pasaypaqtam venceruwan.
Unayña wañukuqkunata hinañam
tutayaypi kawsachiwan.
4 Sonqollaymi
pasaypaqta hukmanyarun.
Pensamientollaymi
pasaypaqta musparun.
5 Pasaq tiempokunamantam
yuyarillani.
Llapa rurasqaykunapim
yuyaymanani.
Atiynikiwan rurasqaykikunapim
piensani.
6 Qanmanmi
makillayta hoqarini.
Qanmantam
yakunayasqa hina kachkani.
Chaki allpa hinam
yakunayasqa kachkani.
(Samariy)
7 Dios Taytalláy,
chayllayá contestaykamuway ñoqallaytaqa.
Wañuruchkaniñam ñoqallayqa.
Qamllayá favoreceykuway ñoqallaytaqa.
Wañuqkuna hinañach kallayman mana chayna kaptinqa.
8 Kuyapayakuynikimantayá
tutapaytaraq uyariykachillaway.
Qamllapi confiakusqayraykuyá
imaynam kawsanayta yachaykachillaway.
Qamllataña tukuy sonqoywan
mañakusqayraykuyá yachaykachillaway.
9 Dios Taytalláy,
enemigoykunamantayá libraykuway.
Qamllapi pakakusqayraykuyá libraykuway.
10 Munasqaykiman hina
ruranaytayá yachachillaway.
Qamqa Diosniy kasqaykiraykuyá
yachachillaway.
Pampantayá allin espirituykiwan
pusachiway.
11 Dios Taytalláy,
sutikiraykuyá
kawsachillaway.
Allin ruraq kasqaykiraykuyá
sasachakuymanta horqollaway.
12 Favorecewasqaykiraykuyá
enemigollaykunata chinkarachiy.
Ñoqa serviqniki kasqayraykuyá
llapallan cheqniwaqniykunata puchukarachiy.