Qanmi amparakunayqa kanki.
Davidpa qellqasqan yachachikuy taki, machaypi kachkaspan Diosta mañakusqan
142
Qaparispaymi Tayta Diosta mañakuni.
Qaparispaymi Tayta Diosta ruegakuni.
2 Paypa qayllanpim quejakullani.
Paypa qayllanpim
ñakarisqaymanta willakullani.
3 Hukmanyasqa kaspaymi
willakullani.
Diosnilláy,
qamllam purinay ñantaqa reqsinki.
Qamllam purinay ñanpi
toqlla pakarusqankutaqa yachanki.
4 Alleq lawniytayá qawariykamuy.
Yanapaykuqniyqa manam pipas kanchu.
Manam mayman ayqenaypas kanchu.
Manam pipas nanachikuqniy kanchu.
5 Dios Taytalláy,
qamta qayakamullaspaymi niki:
Qanmi pakakunayqa kanki,
nispa.
Qamllam kay pachapi
llapa imay kanki,
nispa.
6 Humillachisqa kasqayraykuyá
uyariykullaway.
Qapariwan qayakamusqaytayá
uyariykullaway.
Ñakarichiwaqniykunamantayá
libraykullaway.
Ñoqamanta kallpayoq kasqankuraykuyá
libraykullaway.
7 Wichqasqa kasqaymantayá
qampuni horqoykullaway.
Qamllaman graciasta
qonaypaqyá horqoykullaway.
Allin ruraqkunam
kusikuymanta muyuriykuwanqa.
Favorecewasqaykiraykum
paykunaqa muyuriykuwanqa.