Mana allinkunamanta waqaychananpaq mañakusqan
Diosman Davidpa takisqan
141
Dios Taytalláy,
qamtam qayakamullayki.
Utqaymanyá anchuykamuway.
Qayakusqaytayá uyariykullaway.
2 Kañasqa incienso hinayá
mañakuyniypas qayllaykipi kachun.
Tardeykuq ofrenda hinayá
makillaykuna hoqarisqaypas
chaskisqa kachun.
3 Dios Taytalláy,
qampuniyá simillay waqaychaqta
churaykuy.
Punku waqaychaq hina
simillayta waqaychaykuy.
4 Mana allinkuna piensaymanqa
amayá kachaykuwaychu.
Mana allinkuna ruraymanqa
amayá kachaykuwaychu.
Mana allin ruraqkunawan
chayna ruranaypaqa
amayá kachaykuwaychu.
Paykunapa miski mikuyninta
mikunaypaqa
amayá kachaykuwaychu.
5 Allin runa castigawaptinqa
allinniypaqmi.
Paypa anyawasqanqa
allinnin perfume hinaraqmi.
Chaynaqa manam harkakusaqchu
umayman talliwanantaqa.
Chaywanpas mañakusaqmi
mana allin rurasqankupa contranpiqa.
6 Mana allin ruraqkunapa cabecillankunaqa
qaqaman wischusqam kanqaku.
Chayraqmi paykunaqa
sumaq rimasqayta uyarinqaku.
7 Yapuptinku kurpakuna hinam
tulluykupas kachkan.
Sepulturapa patanpim
wischu-wischu kachkan.
8 Señor Dioslláy,
qamllatam qawachkayki ñoqallayqa.
Qamllamanmi amparakullani ñoqallayqa.
Amayá saqerullawaychu ñoqallaytaqa.
9 Mana allin ruraqkunapa
trampanmantayá waqaychaway.
Paykunapa churasqan
toqllamantayá waqaychaway.
10 Toqlla rurasqankumanyá
llapanku urmaykuchun
mana allin ruraqkunaqa.
Mana imapapas imanasqanmi
pasasaq ñoqaqa.