Ñakarichikuqkunamanta harkananpaq mañakusqan
Tocaqkunapa maestronpaq, Diosman Davidpa takisqan
140
Dios Taytalláy,
mana allin ruraq runamanta libraykullaway.
Lisollaña runakunamanta waqaychaykuway.
2 Paykunaqa mana allinllatam yuyaymananku.
Sapa punchawllañam peleollata hatarichinku.
3 Qallunkupas culebrakunapa lancetan hinam.
Siminkupas culebrakunapa venenon hinam.
4 Dios Taytalláy,
mana allin ruraqkunamanta waqaychaykuway.
Lisollaña runakunamanta waqaychaykuway.
Urmachiway munaqkunamanta waqaychaykuway.
5 Orgullosokunam toqllataraq pakarullanku.
Purinallaymanmi mallataraq mastarullanku.
Hapiwananpaqmi waskataraq churarullanku.
(Samariy)
6 Tayta Diostam nirqani:
Qanmi Diosniy kanki,
nispa.
Dios Taytalláy,
ruegakusqaytayá uyariykuy,
nispa.
7 Señor Diosnilláy,
atiywan salvaqlláy,
guerrapi kaptiymi
umallayta harkaykunki.
Casco hinam
umallayta harkaykunki.
8 Dios Taytalláy,
mana allin ruraqkunapa
munasqantaqa amayá cumplichiychu.
Mana allin piensasqankutaqa
amayá rurachiychu.
Mana hoqarikunankupaqyá
ama cumplichiychu.
(Samariy)
9 Contraypi tukuy
mana allin rimasqankuqa
hawanmanyá wichiykuchun.
10 Nina sansakunayá
wichiykuchun paykunamanqa.
Rupachkaq ninamanyá
wischusqa kachun paykunaqa.
Yakuyoq pozomanyá
wischusqa kachun paykunaqa.
11 Cuento qepi runaqa
amayá takyachunchu
kay pachapiqa.
Mana allinyá qatikachachun
chinkanankama liso runataqa.
12 Yachanim Tayta Diosqa
humillachisqakuna defiendesqanta.
Chaynataq wakchakunapaqpas
allin arreglo rurasqanta.
13 Qanmanmi graciasta qosunki
allin ruraqkunaqa.
Qayllaykipim kawsanqa
munasqaykiman hina ruraqkunaqa.