Diosmi tukuy ima yachaqqa.
Takiqkunapa maestronpaq, Diosman Davidpa takisqan
139
Dios Taytalláy,
qanmi sonqoyta qawaspayki
pim kasqayta yachawanki.
2 Qanmi yachanki
tukuy ima rurasqayta.
Karumantaraqmi cuentata
qokunki piensasqaykunata.
3 Purisqaytawan samasqaytam qawanki.
Imaynam kawsasqaytam yachanki.
4 Dios Taytalláy,
manaraqpas rimarichkaptiyqa
yachachkankiñam imam rimanaytaqa.
5 Tukuy muyuriqniymantam kichkicharuwanki.
Atiynikiwanmi hapiruwanki.
6 Admirakuypaqmi
tukuy chaykuna yachasqaykiqa.
Hatun kasqanraykum
mana entiendeyta atinichu ñoqaqa.
7 Espirituykimantaqa ¿maymantaq rillayman?
Qayllaykimantaqa ¿maymantaq lluptillayman?
8 Cielokunaman wichariptiypas
qamqa chaypim kachkanki.
Wañuqkunapa kasqanman uraykuptiypas
qamqa chaypim kachkanki.
9 Intipa qespimunan lawmanña pawariptiypas,
intipa seqaykunan lawpiña yachaptiypas
10 qampunim chay lawman pusawanki.
Atiynikiwanmi qamqa hapiykuwanki.
11 Ñoqallaytaqa tutayaymi
pakaykuwanqa,
niptiypas,
Muyuriqniypi achkiypas
tutayarunqam,
niptiypas
12 chay tutayaypas manapunim
pakawanmanchu qanmantaqa.
Punchaw hinam tutapas kancharinqa.
Tutayaypas,
kanchaypas iguallam qampaqqa.
13 Qanmi cuerpoypa ukunpi
kaqkunata rurarqanki.
Qanmi mamaypa
wiksanpi wiñachiwarqanki.
14 Chayna mana entiendey atina
rurawasqaykimantam graciasta qoyki.
Chayna admirakuypaq
rurawasqaykimantam graciasta qoyki.
Admirakuypaqmi chay rurasqaykikunaqa.
Sumaqtam yachani chaykunataqa.
15 Pakasqallapi tulluypa rikurisqanpas
qanmantaqa manam pakasqachu karqa.
Allpapa ukunpi hina wiñasqaypas
qanmantaqa manam pakasqachu karqa.
16 Sulluchallaraq kachkaptiymi
rikuwarqankiña ñoqataqa.
Ruranaykunaqa librollaykipi
qellqasqañam karqa.
Manaraqpas nacechkaptiymi
qellqasqaña karqa.
17 Diosnilláy,
¡mayna suma-sumaqmi
qampa piensasqaykikunaqa!
¡Mayna achka-achkam
tukuy chaykunaqa!
18 Aqomantapas aswan achkaraqmi
chaykunata yupayta munaptiypas.
Ñoqaqa qanwanraqmi
kachkani rikcharispaypas.
19 Diosnilláy,
wañuchiy mana allin ruraqkunata.
Runa wañuchiqkunaqa
anchurichunkuyá ñoqamanta.
20 Paykunaqa contraykipim
mana allinkunata rimanku.
Paykunaqa enemigoyki kachkaspankum
sutikita yanqa rimanku.
21 Dios Taytalláy,
cheqnisuqnikitaqa
¿manachum ñoqapas cheqnini?
Qampa contraykipi hoqarikuqkunataqa
¿manachum ñoqapas cheqnipakuni?
22 Pasaypaqtam cheqnini.
Enemigoypaqmi hapini.
23 Diosnilláy,
qawapaykuspayá
sonqollayta reqsiykuy.
Pruebaman churawaspaykiyá
piensasqaykunata yachaykuy.
24 Qawaykuyá
mana allinta kawsaptiyqa.
Wiñay kawsaypaq hinayá
kawsachiway ñoqataqa.