Tayta Diospa favorninkunamanta gracias qosqan
Davidpa takisqan
138
Tukuy sonqoywanmi
qamllamanña graciasta qosqayki.
Dioskunapa qayllanpim
qamllapaqña takipusqayki.
2 Sapaqchasqayki templo lawmanmi
ñoqaqa qonqorakusaq.
Kuyapayakuq kasqaykiraykum
qanman graciasta qosaq.
Confiakunapaq kasqaykiraykum
qanman graciasta qosaq.
Tukuy imamantapas
sutikita hatunchasqaykiraykum
graciasta qosqayki.
Tukuy imamantapas
palabraykita hatunchasqaykiraykum
graciasta qosqayki.
3 Qayakamuptiymi contestaykamuwarqanki.
Qayakamuptiymi kallpanchaykuwarqanki.
4 Dios Taytalláy,
kay pachapi llapallan reykunam
graciasta qosunki.
Palabraykikunata uyarispankum
graciasta qosunki.
5 Tayta Diospa rurasqankunamantam
paykunaqa takinqaku.
Paypa ancha reqsisqa kasqanraykum
paykunaqa takinqaku.
6 Tayta Diosqa humildekunatam yanapan
altopi kachkaspapas.
Orgulloso runatam ichaqa
karullamantaraq reqsirunpas.
7 Sasachakuypi kachkaptiypas
qam Tayta Diosmi kawsachillawanki.
Enemigoykunapa piñakuyninpa contranpim
atiynikiwan yanapawanki.
Hatun atiynikiwanmi
ñoqallaytaqariki salvaykuwanki.
8 Tayta Diosmi cumplinqa
ñoqapaq munasqantaqa.
Dios Taytalláy,
wiñaypaq kuyapayakuqmi kanki qamqa.
Amayá dejaruychu rurasqaykikunataqa.