Israel castakunapaq Tayta Diospa kuyapayakuyninmanta
136
Allin kasqanraykuyá
Tayta Diosman graciasta qoychik.
Wiñaypaq kuyapayakuq kasqanraykuyá
Tayta Diosman graciasta qoychik.
2 Wiñaypaq kuyapayakuq kasqanraykuyá
sapallan Diosman graciasta qoychik.
3 Wiñaypaq kuyapayakuq kasqanraykuyá
sapallan Señorman graciasta qoychik.
4 Wiñaypaq kuyapayakuq kasqanraykuyá
hatun milagrokuna ruraqman
graciasta qoychik.
5 Wiñaypaq kuyapayakuq kasqanraykuyá
entiendeywan cielokunata unanchaqman
graciasta qoychik.
6 Wiñaypaq kuyapayakuq kasqanraykuyá
yaku hawanpi allpa mastariqman
graciasta qoychik.
7 Wiñaypaq kuyapayakuq kasqanraykuyá
hatun achkiqkuna unanchaqman
graciasta qoychik.
8 Wiñaypaq kuyapayakuq kasqanraykuyá
punchaw munaychakunanpaq inti unanchaqman
graciasta qoychik.
9 Wiñaypaq kuyapayakuq kasqanraykuyá
tuta munaychakunanpaq
killatawan lucerota unanchaqman
graciasta qoychik.
10 Wiñaypaq kuyapayakuq kasqanraykuyá
Egipto runakunapa piwinkuna wañuchiqman
graciasta qoychik.
11 Wiñaypaq kuyapayakuq kasqanraykuyá
Egipto runakunamanta
Israel castakuna horqomuqman
graciasta qoychik.
12 Wiñaypaq kuyapayakuq kasqanraykuyá
Israel castakunata hatun
atiyninwan horqomuqman
graciasta qoychik.
13 Wiñaypaq kuyapayakuq kasqanraykuyá
Puka Lamar Qocha rakiruqman
graciasta qoychik.
14 Wiñaypaq kuyapayakuq kasqanraykuyá
Israel castakunata
lamar qochapa chawpinta pasachiqman
graciasta qoychik.
15 Wiñaypaq kuyapayakuq kasqanraykuyá
Rey Faraonta tropankunatawan
Puka Lamar Qochapi qeqeparachiqman
graciasta qoychik.
16 Wiñaypaq kuyapayakuq kasqanraykuyá
chunniqninta runankuna pusaqman
graciasta qoychik.
17 Wiñaypaq kuyapayakuq kasqanraykuyá
atiyniyoq reykuna venceqman
graciasta qoychik.
18 Wiñaypaq kuyapayakuq kasqanraykuyá
munayniyoq reykuna wañuchiqman
graciasta qoychik.
19 Wiñaypaq kuyapayakuq kasqanraykuyá
Amor casta Rey Sehon wañuchiqman
graciasta qoychik.
20 Wiñaypaq kuyapayakuq kasqanraykuyá
Basan lawpi Rey Og wañuchiqman
graciasta qoychik.
21 Wiñaypaq kuyapayakuq kasqanraykuyá
paykunapa allpanta runankunamanña qoqman
graciasta qoychik.
22 Wiñaypaq kuyapayakuq kasqanraykuyá
serviqnin Israel dueñochachiqman
graciasta qoychik.
23 Wiñaypaq kuyapayakuq kasqanraykuyá
ñakarichisqa kachkaptiyku yuyariwaqniykuman
graciasta qoychik.
24 Wiñaypaq kuyapayakuq kasqanraykuyá
enemigoykumanta libraqniykuman
graciasta qoychik.
25 Wiñaypaq kuyapayakuq kasqanraykuyá
tukuy kawsaqkuna mikuchiqman
graciasta qoychik.
26 Wiñaypaq kuyapayakuq kasqanraykuyá
hanaq pachapi munaychakuq Diosman
graciasta qoychik.