Tayta Diospa admirakuypaq rurasqankunamanta
¡Aleluya!
135
Tayta Diostayá alabasunchik.
Paypa serviqninkunayá alabasunchik.
2 Tayta Diospa templonpi serviqkuna,
paytayá alabaychik.
Templonpa pationpi serviqkuna,
paytayá alabaychik.
3 Allin kasqanraykuyá
Tayta Diosta alabasunchik.
Paypa sutinqa kuyayllapaq
kasqanraykuyá takisunchik.
4 Tayta Diosqa Jacob castakunatam
kikinpaq akllakurun.
Payqa Israel castakunatam
kapuqninpaq akllakurun.
5 Ñoqaqa yachanim
Tayta Diosqa
ancha hatun kasqanta.
Yachanim Señorninchikqa
llapallan dioskunamanta
aswan hatun kasqanta.
6 Cielokunapipas Tayta Diosqa
tukuy munasqantam ruran.
Kay pachapipas payqa
tukuy munasqantam ruran.
Lamar qochakunapipas
tukuy munasqantam ruran.
Lamar qochapa tukuy ukunpipas
chaynatam ruran.
7 Kay pachapa cantonkunamantam
puyukunata hatarichimun.
Parananpaqmi llipyaykunata
hatarichimun.
Churasqan sitiomantam
wayrakunata pukuchimun.
8 Paymi Egipto nacionpi
runakunapa piwinkunata wañurachirqa.
Paymi Egipto nacionpi
animalkunapa piwinkunata wañurachirqa.
9 Egipto nacionpa chawpinmanmi
milagrokunata apachimurqa.
Egipto nacionpa chawpinmanmi
admirakuypaq kaqkunata apachimurqa.
Faraonpa contranpim payqa
apachimurqa.
Llapallan serviqninkunapa contranpim
apachimurqa.
10 Achka nacionkunatam chinkarachirqa.
Atiyniyoq reykunatam wañurachirqa.
11 Amor casta runakunapa
reynin Sehontam wañurachirqa.
Basan lawpi Rey Ogtam
payqa wañurachirqa.
Canaan runakunapa
lliw reyninkutam wañurachirqa.
12 Chay reykunapa allpantam
runankunaman qoykurqa.
Israel castakuna
dueñochakunanpaqmi qoykurqa.
13 Dios Taytalláy,
wiñaypaqmi sutillaykiqa.
Dios Taytalláy,
wiñaypaqmi kanki yuyarisqa.
14 Tayta Diosmi runankunapaq
allinta arreglanqa.
Paymi serviqninkunamanta
llakipayarikunqa.
15 Nacionkunapa taytacha-mamachankuqa
qori-qollqellam.
Tukuy chaykunaqa
runakunapa rurasqankunallam.
16 Simiyoq kaspapas
manam rimankuchu.
Ñawiyoq kaspapas
manam qawakunkuchu.
17 Rinriyoq kaspapas
manam uyarinkuchu.
Manataqmi siminkupi
samayninkupas kanchu.
18 Chaykunamanmi rikchakun
chaykuna ruraqkunapas.
Chaykunamanmi rikchakun
chaykunapi confiakuqkunapas.
19 Israel castakuna,
Tayta Diosta alabaychik.
Aaron castakuna,
Tayta Diosta alabaychik.
20 Leviy castakuna,
Tayta Diosta alabaychik.
Tayta Dios respetaqkuna,
payta alabaychik.
21 Sion Moqomantayá
Tayta Diosqa alabasqa kachun.
Jerusalen llaqtapi yachaq
Tayta Diosqa alabasqayá kachun.
¡Aleluya!