Tayta Diosmi waqaychawaqninchik
Diosman asuykunapaq taki
121
Orqokunata qawarispaymi
tapukullayman:
¿Maylawmantaraq yanapaqniyqa
hamullawanman?
2 Yanapakuyqa hamullawanqa
Tayta Diosmantam,
cielokunapas allpa-pachapas
unanchaqmantam.
3 Manam haykaqpas urmanaykita
munallanqachu.
Manam haykaqpas cuidaqnikiqa
puñullanqachu.
4 Israel castapa waqaychaqninqa
mana puñuqmi.
Israel castapa waqaychaqninqa
wiñay rikchaqmi.
5 Compañaqniki Tayta Diospunim
waqaychaqniki.
Compañaqniki Tayta Diospunim
llantusuqniki.
6 Manam punchawpas intiqariki
rupasunkichu.
Manam tutapas killaqariki
dañasunkichu.
7 Tayta Diospunim waqaychasunki
desgraciamanta.
Tayta Diospunim waqaychaykunqa
vidallaykita.
8 Tayta Diospunim maypi-chaypipas
waqaychasunki.
Tukuy tiempopim qamtaqariki
waqaychasunki.