Jerusalen llaqta hawka kananpaq mañakusqan
Diosman asuykunapaq Davidpa takisqan
122
Ñoqam kusikurqani:
Tayta Diospa templonmanmi
risunchik,
niwaptinku.
2 Jerusalen llaqta,
ñoqaykuqa callekikunapiñam
purichkaniku.
3 Jerusalen llaqtaqa
huk hawaqllapim kachkan.
Suma-sumaq hatarichisqam kachkan.
4 Chaymanmi rinku
Tayta Diospa akllasqan runakuna.
Chaymanmi rinku
Israel casta llapallan runakuna.
Tayta Diosman graciasta
qonankupaqmi rinku.
Kamachikuyman hina
ruranankupaqmi rinku.
5 Allinta arreglaq gobiernoqa
chay llaqtapim kachkan.
David castapa gobiernonqa
chay llaqtapim kachkan.
6 Jerusalen llaqtamantayá
mañakuychik kaynata:
Jerusalen llaqtaqa
hawkayaypiyá kachun.
Qamta kuyasuqniki runakunaqa
hawkallayá kachun.
7 Murallaykikunapa ukulawninpi kaqkunapas
hawkallayá kachunku.
Palacioykikunapi kaqkunapas
hawkallataqyá kachunku.
8 Aylluykunapaqmi Jerusalen llaqtata nisaq:
Hawkayay kachun qampi,
nispa.
Amigoykunapaqmi Jerusalen llaqtata nisaq:
Hawkayay kachun qampi,
nispa.
9 Jerusalen llaqta,
yupaychasqayku Diospa templonraykum
allinnikita maskasaq.
Jerusalen llaqta,
Tayta Diospa templonraykum
allinnikita maskasaq.