Tayta Diospa yachachikuyninqa sumaqllaña kasqanmanta
119
HUK1 ¡Mayna kusisqam
Tayta Diospa
munallasqanman hina kawsaqkunaqa!
¡Mayna kusisqam Tayta Diospa
yachachisqanman hina kawsaqkunaqa!
2 ¡Mayna kusisqam Tayta Diospa
kamachillasqan kasukullaqkunaqa!
¡Mayna kusisqam Tayta Diosta
tukuy sonqonwan maskallaqninkunaqa!
3 Allin ruraqmi paykunaqa.
Rurachkankupas Diospa munallasqantam.
4 Kunakuyniki kasukusqa
kanantamiki munallankiqariki.
5 Allin kawsaytam munallani
decretoykikunata kasukunaypaq.
6 Manam penqakullasaqñachu
lliw kamachisqaykita cumplillaspayqa.
7 Cheqap sonqollam gracias nisaq
lliw reglamentoykita yachallaspayqa.
8 Decretoykitam kasukusaq.
Pasaypaqtaqa amam saqewankichu.
ISKAY
9 Mozoqa ¿imaynatataq
mana huchallikuspa kawsanman?
Palabraykita kasukuspanmi
mana huchallikuqqa kawsanman.
10 Ñoqallayqa tukuy sonqoywanmi
maskayki qamtaqa.
Amayá karunchawaychu
kamachikuynikikunamantaqa.
11 Qampa palabraykitam
sonqoypi waqaycharqani.
Contraykipi mana huchallikunaypaqmi
sonqoypi waqaycharqani.
12 Dios Taytalláy,
alabasqam qamqa kanki.
Decretoykikunatamá yachaykachiwanki.
13 Ñoqaqa simiywanmi willakurqani.
Llapallan reglamentoykitam willakurqani.
14 Kamachisqaykiman hina
kawsaspaymi kusikuni.
Qori-qollqemantapas
mastaraqmi kusikuni.
15 Encargoykikunapim yuyaymanani.
Munasqaykiman hina kawsaytam munani.
16 Kusikunim decretoykikunamantaqa.
Manam qonqasaqchu palabraykikunataqa.
KIMSA
17 Kay serviqnikita favoreciwaptikiqa kawsasaqmi.
Palabraykitapas ñoqaqa kasukusaqmi.
18 Yuyaymananaypaqyá
ñawillaykunata kichaykuway.
Admirakuypaq yachachikuynikikunata
entiendenaypaqyá kichaykuway.
19 Ñoqaqa forasterollam
kani kay pachapiqa.
Amayá pakaykuwaychu
kamachisqaykikunataqa.
20 Tukuy tiempopim sinchillataña munachkani.
Reglamentoykikuna yachaykuytam munachkani.
21 Kamachisqaykikunamanta pantarusqankuraykum
hoqarikuq runakunata qaqcharunki.
Kamachisqaykikunamanta pantarusqankuraykum
ñakasqa runakunata qaqcharunki.
22 Kamachikuynikikunata kasukusqayraykuyá
amaña kamiwachunkuchu.
Kamachikuynikikunata kasukusqayraykuyá
amaña despreciawachunkuchu.
23 Kamachikuqkuna contraypi
rimanakuruptinkupas
kay serviqnikiqa
decretoykikunapim yuyaymanasaqpas.
24 Kamachikuynikikunaqa kusichiqniymi.
Runakuna hina consejawaqniymi.
TAWA
25 Pasaypaqñam wañunayachkani ñoqallayqa.
Prometewasqaykiman hinayá kawsaykachiwayqa.
26 Kawsasqaymanta willakuptiymi
contestaykuwarqankiqa.
Decretoykikunatapas
yachaykachiwayá ñoqallaymanqa.
27 Encargoykikunaman hina
kawsanaypaqyá entiendeykachiway.
Milagroykikunapi yuyaymananaypaqyá
entiendeykachiway.
28 Sinchi llakikuymantam
sonqollaypas tukukuruchkanña.
Prometewasqaykiman hinayá
kallpanchaykullawayña.
29 Llulla rimanaymantayá harkaykuway.
Yachachikuynikiwanyá llakipayaykuway.
30 Cheqap ñanpi puriytañam akllakurqani.
Reglamentoykikunata kasukunaypaqñam chaskikurqani.
31 Dios Taytalláy,
kamachikuynikikunamanmi
hapipakullani ñoqaqa.
Amayá penqaymanqa
churaykullawaychu ñoqataqa.
32 Kamachikuynikikunata cumplinaypaqmi
chaylla kachkani.
Allin yuyayta qoykuwasqaykiraykum
chaynaqa kachkani.
PICHQA
33 Dios Taytalláy,
decretoykikunaman hina
kawsakuytayá yachaykachiway.
Kawsanaykama kasukunaypaqyá
chaykunataqa yachaykachiway.
34 Yachachikuynikita kasukunaypaqyá
entiendechiway.
Tukuy sonqoywan kasukunaypaqyá
entiendechiway.
35 Kamachikusqaykikunaman hina
kawsanaypaqyá pusaway.
Chayman hina kusisqa
kawsanaypaqyá pusaway.
36 Kamachikuynikikunata kuyanaypaqyá
yanapaykuway.
Engañowan apuyaymantayá
harkaykuway.
37 Yanqa kaqkunata ama qawanaypaqyá
waqaychaykuway.
Munasqaykiman hina kawsanaypaqyá
waqaychaykuway.
38 Kay serviqnikiman
prometewasqaykitayá cumpliy.
Respetaqnikikunaman
prometesqaykitayá cumpliy.
39 Amañayá ñoqataqa kamiwachunkuchu.
Manchakusqayraykuyá ama kamiwachunkuchu.
Sentenciayki allin kasqanraykuyá
ama kamiwachunkuchu.
40 Encargoykikunatam kuyani ñoqaqa.
Allin kasqaykiraykuyá kawsariykachiway ñoqataqa.
SOQTA
41 Dios Taytalláy,
kuyapayariykullaway.
Prometesqaykiman hinayá salvaykullaway.
42 Chayna kaptinqa
contestasaqmi kamiwaqniytaqa.
Qampa palabraykipim
confiakuni ñoqallayqa.
43 Amayá haykapipas munaychu
llulla rimanaytaqa.
Reglamentoykikunapim
confiakuchkani ñoqallayqa.
44 Tukuy tiempopim
yachachikuynikikunata kasukusaq.
Wiña-wiñaypaqmi
yachachikuynikikunata kasukusaq.
45 Chayna kaptinqa
libreñam kawsakusaq.
Encargoykikunata cumplisqayraykum
libreña kawsakusaq.
46 Reykunapa ñawpaqninpim
kamachikuynikikunamanta rimasaq.
Mana penqakuspam
ñoqaqa rimasaq.
47 Kamachisqaykikunatam kuyani.
Chaykunawanmi kusikuni.
48 Kamachisqaykikunatam kuyani.
Kamachisqaykikunatam munani.
Decretoykikunapim yuyaymanani.
QANCHIS
49 Kay serviqnikiman
rimarisqaykitayá yuyariy.
Confiakunaypaq rimapayawasqayki
palabratayá yuyariy.
50 Chay prometewasqayki palabrawanmi
kawsachiwanki.
Llakisqa kachkaptiymi
consuelawanki.
51 Hoqarikuq runakunam
ñoqamanta burlakunku.
Yachachikuynikikunamantaqa
manam karunchakunichu.
52 Dios Taytalláy,
ñawpaq reglamentoykikunamantam yuyarini.
Chaykunawanmi ñoqallayqa consuelakuni.
53 Mana allin ruraqkunamantam
sinchita piñakuruni.
Yachachikuynikikunata saqerusqankuraykum
sinchita piñakuruni.
54 Decretoykikunamantaqa takirqanim.
Runapa llaqtanpipas takirqanim.
55 Dios Taytalláy,
tutanpas ñoqaqa qanmantam yuyarini.
Yachachikuynikikunatam kasukuni.
56 Ñoqapa imam ruranayqa kaymi:
encargoykikuna kasukuymi.
PUSAQ
57 Dios Taytalláy,
qanmi ñoqapa tukuy imayqa kanki.
Palabrayki kasukunaypaqmi
prometekurqayki.
58 Tukuy sonqoywanmi ruegakurqayki qamtaqa.
Prometewasqaykiman hinayá
kuyapayariykullaway ñoqataqa.
59 Imayna kawsasqaypim
ñoqaqa piensarqani.
Chaymi kamachikuynikikunata
kasqanllan kasukurqani.
60 Mana munaspaymi
kamachikusqaykikunata kasukurqani.
Apurawmanmi
kamachikusqaykikunata kasukurqani.
61 Mana allin runakunam chawpicharuwanku.
Yachachikuynikikunataqa manam qonqarqanichu.
62 Qanman graciasta qonaypaqmi
chawpi tutata hatarillani.
Allin reglamentoykikunarayku
graciasta qonaypaqmi hatarillani.
63 Llapallan respetasuqnikikunapa
amistadninmi kani.
Encargoykikuna kasukuqkunapa
amistadninmi kani.
64 Dios Taytalláy,
kuyapayankim
tukuy kay pachapi kaqkunataqa.
Qamqa yachaykachiwayá
decretoykikunataqa.
ISQON
65 Dios Taytalláy,
kay serviqnikiwanmi
allinta rurarunki.
Prometewasqaykiman hinam
allinta rurarunki.
66 Yuyayniyoq kanaypaqyá
yachaykachiway.
Yachayniyoq kanaypaqyá
yachaykachiway.
Kamachisqaykikunapi confiakusqayraykuyá
yachaykachiway.
67 Manaraq humillachisqa
kachkaspaymi pantarurqani.
Kunanmi ichaqa qampa
palabraykitaña kasukuni.
68 Qamqa allin Diosmi kanki.
Qamqa allinlla ruraqmi kanki.
Decretoykikunatam yachaykachiwanki.
69 Hoqarikuq runakunam hatarirunku.
Contraypi llullakunankupaqmi hatarirunku.
Ñoqam ichaqa tukuy sonqoywan
qamllataña kasukusaq.
Encargoykikunatam tukuy sonqoywan
ñoqaqa kasukusaq.
70 Rumi sonqo runakunam paykunaqa
ichaqa yachachikuynikipim kusikuni ñoqaqa.
71 Humillachisqa kasqayqa
allinniypaqmi karqa.
Chaynapim yacharqani
decretoykikunataqa.
72 Waranqantin qorimantapas ñoqapaq
aswan allinqa yachachisqaykikunam.
Waranqantin qollqemantapas ñoqapaq
aswan allinqa yachachisqaykikunam.
CHUNKA
73 Qanmi unanchaspa kawsachiwarqanki.
Kamachisqaykikunatam entiendechiwanki.
74 Respetasuqnikikuna
rikuwaspanyá kusikuchunku.
Palabraykipi confiakusqayraykuyá
paykunaqa kusikuchunku.
75 Dios Taytalláy,
reqsinim reglamentoykikunaqa
allin kasqanta.
Confiakunapaq kaspaykim
humillarachiwanki ñoqallayta.
76 Kay serviqnikita kuyapayariwaspaykiyá
consuelaykullaway.
Kay serviqnikiman prometewasqaykipi hinayá
consuelaykullaway.
77 Ñoqallaytaqa kawsanaypaqyá
llakipayariykullaway.
Yachachikuynikipi kusikusqayraykuyá
llakipayariykullaway.
78 Hoqarikuq runakunaqa
penqachisqayá kachunku.
Yanqamanta ñakarichiwasqankuraykuyá
penqachisqa kachunku.
Ñoqam ichaqa yuyaymanasaq.
79 Qamllataña respetasuqnikikunaqa
ñoqamanyá huñunakamuchunku.
Kamachikuynikikuna yachaqkunaqa
ñoqamanyá huñunakamuchunku.
80 Mana huchayoqtayá
decretoykikunallapi yuyaymanachiway.
Mana penqachisqa kanaypaqyá
chaynata yuyaymanachiway.
CHUNKA HUKNIYOQ
81 Salvawanaykita suyaspaymi
wañuy patanpiña kallachkani.
Chaywanpas ñoqallayqa
palabraykipim confiakullachkani.
82 Prometewasqaykikunata suyaspam
yaqaña ñawsayaruchkanipas.
¿Haykapitaq consuelawanki?
nispaymi waqachkanipas.
83 Qosnipi chakiruq
odre hinaña kaspaypas
decretoykikunataqa
manam qonqarunichu pasaypaqpas.
84 ¿Haykapikamataq kawsasaq
kay serviqnikiqa?
¿Haykapitaq castiganki
ñakarichiwaqniykunataqa?
85 Hoqarikuq runakunam
uchkukunata ñoqapaq toqorunku.
Yachachikuynikiman hina mana ruraspam
chaynata rurarunku.
86 Confiakunapaqmi lliw kamachisqaykikunaqa.
Mana imamantam ñakarichiwanku runakunaqa.
Qamyá yanapaykullaway ñoqallaytaqa.
87 Yaqallam kay pachamanta
chinkarachiwanku,
chaywanpas encargoykikunataqa
manam saqerqanichu.
88 Kuyapayakuynikiman hinayá
kawsachiway.
Kamachikuynikikunata kasukunaypaqyá
kawsachiway.
CHUNKA ISKAYNIYOQ
89 Dios Taytalláy,
palabraykiqa wiñaypaqmi.
Hanaq pachapipas
mana tukuqmi.
90 Qamqa wiña-wiñaypaq
confiakunam kanki.
Qanmi kay pachata
hinapi kananpaq takyachirqanki.
91 Chaykunaqa kunankamapas
reglamentoykikunaman hinam kachkan.
Tukuy imapas servisusqaykiraykum
hinalla kachkan.
92 Yachachikuynikipi mana kusikuspayqa
llakikuywanmi wañuruymanña karqa.
93 Manam haykapipas
qonqasaqchu encargoykikunataqa.
Chaykunawanmi
kawsachiwarqanki ñoqallaytaqa.
94 Qampa kallasqayraykuyá
salvaykullaway.
Encargoykikunata cumplisqayraykuyá
salvaykullaway.
95 Mana allin ruraqkunam
suyawachkan wañuchiwananpaq.
Ñoqam ichaqa kamachikuynikikunata
entiendeypi risaq.
96 Tukuy ima allin kaqkunapas
qawasqayman hinaqa tukuruqllam kachkan.
Qampa kamachisqaykikunam ichaqa
mana tukuyniyoq alli-allin kachkan.
CHUNKA KIMSAYOQ
97 ¡Maynatam yachachikuynikita kuyallani!
Chaypim tukuy punchaw yuyaymanani.
98 Enemigoykunamantapas mastaraqmi
yachayniyoqta ruraykullawanki.
Kamachisqaykikunawanmi
chaynataqa ruraykullawanki.
Ñoqapaqña wiñaypaq kasqanraykum
chaynataqa ruraykullawanki.
99 Llapallan maestroykunamantapas
aswan mastaraqmi entiendellani.
Kamachikuynikikunata yuyaymanasqayraykum
chaynata entiendellani.
100 Machukunamantapas aswan mastaraqmi
ñoqaqa entiendeni.
Encargoykikunata kasukusqayraykum
chaynata entiendeni.
101 Mana allinkunapi kawsanaymantam
anchurikurqani.
Palabraykita kasukunaypaqmi
anchurikurqani.
102 Reglamentoykikunamantaqa
manam rakikurqanichu.
Chaykunawan yachachiwasqaykiraykum
mana rakikurqanichu.
103 Simillaypaqpas
¡mayna miskillañam prometewasqaykiqa!
Mielmantapas aswan miskiraqmi
chay prometewasqaykiqa.
104 Encargoykikunawanmi
allin entiendeqña rikuriruni.
Chayraykum tukuy mana allin
kawsayta cheqnini.
CHUNKA TAWAYOQ
105 Palabraykiqa chakiykunata
kachaykuq mechero hinaraqmi.
Palabraykiqa purisqay ñanpipas
achkiy hinaraqmi.
106 Allin reglamentoykikunataqa
kasukusaqmi.
Chayta cumplinaypaq
jurasqaytaqa kasukusaqmi.
107 Dios Taytalláy,
sinchi llakisqa kasqayraykuyá
kawsachillaway.
Prometewasqaykiman hinayá
kawsachillaway.
108 Dios Taytalláy,
ruegakuykim ofrendata hina
alabasqayta chaskiwanaykipaq
chaynataq reglamentoykikunatapas
yachachiwanaykipaq.
109 Ñoqaqa sapa kutillam
wañuypa patanpiña kachkani.
Chaywanpas yachachikuynikikunataqa
mana qonqaqñam kachkani.
110 Mana allin ruraqkunam hapiruwanankupaq
toqllata churachkanku.
Ñoqam ichaqa encargoykikunamanta
mana karunchakunichu.
111 Kamachikuynikikunam wiñaypaq
herenciay hinaña kapuwachkan.
Sonqoyta kusichisqanraykum
herenciay hinaña kapuwachkan.
112 Tukuy sonqoywanmi
decretoykikunata cumplisaq.
Wiña-wiñaypaqmi
chaykunataqa cumplisaq.
CHUNKA PICHQAYOQ
113 Iskay uya runakunataqa cheqninim
ichaqa yachachikuynikitaqa kuyanim.
114 Qamqa kanki pakaykuqniymi.
Qamqa kanki harkaykuqniymi.
Palabraykipas ñoqapa confiakunaymi.
115 Mana allin ruraqkuna,
ñoqamantayá anchuriychik.
Diosniypa kamachisqankunata
kasukunaypaqyá anchuriychik.
116 Kawsallasaqmi prometewasqaykiman
hina kallpanchallawaptikiqa.
Amayá penqakusaqchu
qamllapi confiakuchkaspaqa.
117 Yanapawaptikiqa salvasqam kasaq.
Decretoykikunatam mana tukuyta estudiasaq.
118 Decretoykikunamanta
llapallan rakikuqtam cheqnirunki.
Engañasqankupas yanqalla kasqanraykum
paykunataqa cheqnirunki.
119 Qopata hinam qawanki
kay pachapi mana allin ruraqkunataqa.
Chaymi ñoqallaypas kuyallani
kamachikuynikikunataqa.
120 Qamta manchakusqayraykum
sayarirun chukchaykunapas.
Ñoqallayqa respetanitaqmi
reglamentoykikunatapas.
CHUNKA SOQTAYOQ
121 Allin arregloman hinam
allinta rurarqani ñoqaqa.
Amayá saqeruwaychu
ñakarichiqniykunapa kasqanpiqa.
122 Allin kanaypaqyá
nanachikuway kay serviqllaykita.
Amayá munaychu
hoqarikuq runakuna ñakarichiwananta.
123 Waqaptiymi ñawiykunapas
yaqaña tutayaruchkanpas.
Salvawanaykita suyaspam
yaqaña ñawsayaruchkanipas.
Allinpaq prometewasqaykita suyasqayraykum
yaqaña ñawsayaruchkanipas.
124 Kuyapayakuynikiman hinayá
kay serviqnikipaq allichaykapuway.
Decretoykikunatapas
kay serviqnikimanyá yachaykachiway.
125 Serviqniki kasqayraykuyá
entiendeykachiway.
Kamachikuynikita reqsinaypaqyá
entiendeykachiway.
126 Dios Taytalláy,
ñam chayaramunña
ruranaykipaq tiempoqa.
Manam kasukunkuñachu
yachachikuynikikunataqa.
127 Chayraykum kamachikusqaykikunata
qorimantapas mastaraq kuyaruni.
Chayraykum kamachikusqaykikunata
qori-puromantapas mastaraq kuyaruni.
128 Chaymi llapallan encargoykikunawan
allinta kawsanaypaq pusachikuni.
Tukuy mana allin kawsaytañataqmi cheqnini.
CHUNKA QANCHISNIYOQ
129 Admirakuypaqmi kamachikuynikikunaqa
chaymi kasukullachkani ñoqallayqa.
130 Achkiy hinaraqmi
palabrayki entiendesqankuqa.
Pisi experienciayoqkunatapas
entiendeykachinmi palabraykiqa.
131 Yakunayachikuspa
samatyachkaq hinam kachkani.
Kamachisqaykikunata kuyasqayraykum
chaynaqa kachkani.
132 Ñoqallayta qawarimuwaspaykiyá
llakipayariykullaway.
Kuyasuqnikikunawan rurasqaykita hinayá
llakipayariykullaway.
133 Ñoqallaytaqa palabraykiman hinayá
kawsachiway.
Mana allinkuna ama munaychakuwananpaqyá
kawsachiway.
134 Libraykuway runakuna
ñakarichiwananmanta,
hinaptinqa kasukusaqmi
encargoykikunata.
135 Favoreceykuwayá kay serviqnikitaqa.
Yachaykachiwayá decretoykikunataqa.
136 Ñoqapaqa weqellaykunapas
mayu hinaraqmi puririn.
Yachachikuynikita mana kasukusqankuraykum
chaynataqa puririn.
CHUNKA PUSAQNIYOQ
137 Dios Taytalláy,
ancha allin ruraqmi kanki qamqa.
Mana pantayniyoqmi reglamentoykikunaqa.
138 Kunawasqaykiku kamachikuynikikunaqa
allin ruranapaqmi.
Kunawasqaykiku kamachikuynikikunaqa
sumaq confiakunapaqmi.
139 Palabraykiraykum
anchallataña sientikuruni.
Enemigoykuna qonqarusqanraykum sientikuruni.
140 Chuyayachisqa qori-puro hinam
prometewasqaykiqa.
Chayraykum chaytaqa kuyallani
kay serviqnikiqa.
141 Mana pipa qawarinan kaspaypas
manam qonqanichu encargoykikunataqa.
Despreciasqa kaspaypas
manam qonqanichu encargoykikunataqa.
142 Qamqa kanki wiñaypaq
allin ruraqmi.
Qampaqa yachachikuynikipas
confiakunapaqmi.
143 Ñakarispaypas
kamachisqaykikunapim kusikuni.
Sasachakuypi kaspaypas
kamachisqaykikunapim kusikuni.
144 Wiñaypaq allinmi kamachikuynikikunaqa.
Kawsanaypaqyá entiendechiway ñoqallaytaqa.
CHUNKA ISQONNIYOQ
145 Dios Taytalláy,
tukuy sonqoywanmi
contestaykamuwanaykipaq qayakamullayki.
Decretoykikunata
kasukunaypaqmi qayakamullayki.
146 Salvawanaykipaqmi
qayakamullayki.
Kamachikuynikikunata kasukunaypaqmi
qayakamullayki.
147 Tutapayta hatarispaymi
qayakamullayki.
Prometewasqaykipi confiakuspam
qayakamullayki.
148 Mana puñuspaymi
tukuy tuta rikchani.
Palabraykikunapi
yuyaymananaypaqmi rikchani.
149 Dios Taytalláy,
kuyapayakuynikiman hinayá uyariykullaway.
Reglamentoykiman hinayá kawsaykachillaway.
150 Daño rurayllapi kaq
runakunam asuykuruwanku.
Ichaqa yachachikuynikikunamantam
karunchakurunku.
151 Dios Taytalláy,
ñoqapa hichpallaypim
kachkanki qamqa.
Confiakunapaqmi
llapallan kamachisqaykikunaqa.
152 Unayñam kamachikuynikikunamanta
yachani.
Wiñaypaq takyachisqaykitam
yachani.
ISKAY CHUNKA
153 Ñakarisqayta qawaykuspayá
libraykullaway.
Yachachikuynikitaqa mana qonqasqayraykuyá
libraykullaway.
154 Asuntollaypi defiendewaspayá
libraykullaway.
Prometewasqaykiman hinayá
kawsachillaway.
155 Mana allin ruraqkunaqa
manam salvakunqakuchu
decretoykikuna mana cumpliy
munasqankurayku.
156 Dios Taytalláy,
anchallañam runapaq
kuyapayakuynikiqa.
Reglamentoykikunaman hinayá
kawsachillaway ñoqallaytaqa.
157 Achkallañam kachkan
ñakarichiwaq enemigoykunaqa.
Chaywanpas manam rakikunichu
kamachikuynikikunamantaqa.
158 Traicionasuqniki runakunataqa
qawaspaymi cheqnini.
Palabraykikuna mana kasukuqkunatam
cheqnini.
159 Dios Taytalláy,
qawariyá encargoykikuna
kuyasqaytaqa.
Kuyapayakuynikiman hinayá
kawsachillaway ñoqallaytaqa.
160 Llapallan palabraykiqa
pasaypaq confiakunapaqmi.
Llapallan reglamentoykikunaqa
wiñaypaq allinmi.
ISKAY CHUNKA HUKNIYOQ
161 Kamachikuqkunam ñakarichiwanku
yanqapuni.
Ichaqa sonqoymantam
palabraykitaqa respetani.
162 Prometewasqaykipim
sinchita kusikullani.
Achka riqueza
tarikuq hinam kusikullani.
163 Llullataqa
cheqnispaymi millakuni.
Yachachikuynikitam
ichaqa kuyani.
164 Achka kutitam punchawpi
alabayki.
Reglamentoykikuna
allin kasqanraykum alabayki.
165 Yachachikuynikita kuyaqkunaqa
hawkallañam kawsakunku.
Paykunataqa manam imapas
urmachinmanchu.
166 Dios Taytalláy,
salvaykuwanaykipaqmi
suyallachkani ñoqallayqa.
Kamachisqaykikunata cumplisqayraykuyá
salvaykullawayqa.
167 Kamachikuynikikunatam kasukuni.
Tukuy sonqoywanmi chaykunataqa kuyani.
168 Encargoykikunataqa kasukunim.
Kamachikuynikikunataqa kasukunim.
Imaynam kawsasqaytaqa yachawankim.
ISKAY CHUNKA ISKAYNIYOQ
169 Dios Taytalláy,
qayakamusqaytayá uyariykullaway.
Palabraykiman hinayá entiendeykachiway.
170 Ruegakusqaytaqa qamyá chaskiykuway.
Prometewasqaykiman hinayá libraykullaway.
171 Ñoqallayqa sinchitam
alaballasqayki.
Decretoykikuna yachachiwasqaykiraykum
alaballasqayki.
172 Prometewasqaykimantam
takispa alabasqayki.
Llapallan kamachisqaykikunaqa
allin kasqanraykum alabasqayki.
173 Chaypunillayá atiynikiwan
yanapaykuway.
Encargoykikunata akllakusqayraykuyá
yanapaykuway.
174 Dios Taytalláy,
salvaykuwanaykitam munallachkani.
Qampa yachachikuynikimantam
kusikuchkani.
175 Qamta alabanaypaqyá
kawsachiway ñoqataqa.
Reglamentoykikunayá
yanapawachun ñoqataqa.
176 Chullaruq ovejata hinayá
kay serviqnikita maskaykullaway.
Kamachisqaykikunata mana qonqasqayraykuyá
kay serviqnikita maskaykullaway.